Biblia uyero ang’o pi yamu m’ubelokere man pi nindo m’ubino
“Yamu m’ubelokere udaru doko peko acel zoo. Ng’om ubedoko ni kabedo ma jubikwo ngo i wiye.”—The Guardian.
Dhanu gibenwang’iri ku peko ma dongo ma ke gibenyayu gin gigi i kumgi. Jururieko ma dupa giyiyo nia gin ma dhanu ubetimo re m’ubenyayu lietho ma lee iwi ng’om. Lietho maeni m’ubemedere udaru niloko yamu man ebekelo matoke ma rac dit akeca. Matokene uketh’i iye lembe m’ulubo e:
Peko ma calu ve yamu m’ubelokere akeca man wang’ ma pol nikadhu mukero, lietho ma wanga wanga, kang’ pa koth, wavuvu; ma gitie lembe ma ginyayu dhir pa pii man pa luli ma wang’.
Loy pa lungu pei ma dongo man ma dhurere i tung ng’om ma yo malu (pôle Nord).
Pong’ pa nam.
Peko pa yamu m’ubelokere ubemulo theng ng’om ceke. I ng’ey lembe ma juyero i ng’om 193, rapor mi gazeti moko (New York Times) uyero kumae: “Ng’om ukwayu julare.” Nikum tho man peko m’alokaloka pa yamu ukelo, dilo m’iwi ng’om zoo ma neno lembe mi leng’kum (OMS) ulwong’e nia etie “peko ma dit ma segi mi leng’kum ma dhanu ubenyego ko.”
Kadok kumeno de, watie ku thelembe ma ber mi bedo ku genogen pi nindo m’ubino. Biblia ular uyero pi lembe ma wabeneno ubetimere tin, bende thelembe ma wacopo bedo ko ku genogen pi gin ma Mungu bitimo pi nidaru peko man pi niyiko lembe mi nindo m’ubino.
Nyo yamu m’ubelokere ubepong’o lembila mi Biblia?
Eyo. Ng’om m’udoko lieth ukelo alokaloka pa yamu, m’ubepong’o lembe ma tung’ tung’ ma Biblia ular uyero pi rundi mwa eni.
Lembila: Mungu ‘binyotho ju m’ubenyotho ng’om.’—Lembanyutha 11:18.
Biblia ular uweco pi saa ma timo pa dhanu bikelo iye nyoth iwi ng’om. Ng’om m’udoko lieth re m’utie acel m’i kind nyoth ma tin dhanu ubetimo iwi ng’ombe nisagu mi wang’e zoo.
Lembila maeni ubenyutho iwa thelembe acel ma wacopo paru ko ngo nia dhanu romo bodho ng’om. Kenen nia Mungu biyiko lembe i saa ma dhanu “ubenyotho [iye] ng’om.” Dhanu moko gitie ku pidoic ma ber man gibeii nicero yamu m’ubelokere. Ento kadok gitim lembang’o de, nicero dhanu kara kud unyoth ng’om bivoyogi.
Lembila: “Gin ma nyayu lworo ku giranyutha” de binen.—Luka 21:11.
Biblia ular uyero nia “lworo ku giranyutha,” kunoke lembe ma nyayu lworo bibedo nuti i rundi mwa eni. Yamu m’ubelokere ubekelo lembe ma nyayu lworo iwi ng’om zoo. Tin, dhanu moko cwinygi ung’abere pilembe nia ng’om e binyothere magwei ma dong’ jucopo kwo de ngo i iye.
Lembila: “I kajik ceng’ nindo mi can ma ciro tek bibedo nuti. Pilembe dhanu bibedo ma ng’atuman bimarere gire, gibibedo jumar sente, . . . ju ma gwoko ngo bedoleng’ migi, . . . ju ma winjiri ngo nyanok de ku jumange, . . . ju ma cibo juwagi, ju ma wigi tek.”—2 Timoteo 3:1-4.
Biblia ular uweco pi koth dhanu man kura timo m’uketho yamu nyothere. Gavmenti man lemkuloka giketho bero pa sente ni gin ma kwong’a man gidieng’ ungo pi bero mi kwo pa dhanu mange mi nindo m’ubino. Kadok kinde ma gibeii nitimo tic i acel de, dhoggi copo rombo ngo iwi gin ma gicikiri nitimo pi nijigo lembe m’uketho ng’om udoko lieth.
Lembila maeno unyutho nia ukwayu ngo nigeno nia dhanu e zoo biloko kura timo migi man gibibodho ng’om. Tung’ ku maeno, Biblia uyero nia dhanu m’ubekwo ku kit kura mi dieng’ pigi gigi “gibimediri nitimo lembe ma reco nisagu.”—2 Timoteo 3:13.
Pirang’o cwinywa copo bedo tek nia Mungu biyiko lembe m’unyothere?
Biblia unyutho nia Yehova a Mungu ma Jacwic mwa ubedieg’ lee dit pi ng’om mwa eni man pi dhanu ma gibekwo i wiye. Wakenen verse moko adek kende m’unyutho nia Mungu biyiko lembe m’unyothere.
1. Mungu “m’ucwie [ng’om] de ni uvuru ngo, m’ung’ine kara jubed i ie.”—Isaya 45:18.
Mungu bipong’o lembakeca pare pi ng’om. (Isaya 55:11) Ebiweko ngo junyothe kunoke edok ni uvuru.
2. “Ju ma mol gibicamu ng’om ni aba, man gibinyayu mutoro i igi gigi kum dit mi kwiocwiny. Won bedopwe bicamu ng’om ni aba, man ebibedo i ie mi nja.”—Zaburi 37:11, 29.
Mungu ung’olo nia dhanu bikwo iwi ng’om ku kwiyocwiny.
3. “Ento judubo jubikabu woko kud i ng’om.”—Lembrieko 2:22.
Mungu ung’olo nia ebikabu dhanu ceke m’ubemediri nitimo lembe ma rac, uketh’i iye ju ceke m’ubenyotho ng’om.
Gin ma Mungu bitimo pir anyim mwa
Mungu bipong’o lembang’ola pare pi ng’om nenedi? Ebitiyo ku bimobim pare m’iwi ng’om zoo ma julwong’o nia Ker pa Mungu. (Matayo 6:10) Ker maeno bibimo niai kud i polo. Ebidiko ngo cinge ku gavmenti mi dhanu pi nidaru peko mi ng’om ku piny ma n’i wiye. Tung’ ku maeno, Ker pa Mungu bikabu bimobim mi dhanu cen.—Daniel 2:44.
Ker pa Mungu utie lembe mir anyong’a ni dhanu ceke ku giracwiya mange ceke. (Zaburi 96:10-13) Kenen gin ma Yehova Mungu bitimo nikadhu kud i Ker pare.
Ebidwoko piny mi wi ng’om kakare
Lembe ma Biblia uyero: “Langa ku ng’om m’uthwo bibedo ku mutoro; anyong’a binego ng’om ngele, man ebithiwo calu thiuboko ma kume ju ukudho.”—Isaya 35:1.
Thelembene pir anyim mwa: Yehova biyiko ng’om kadok i kabedo ma dhanu unyotho ku rac magwei de.
Ebibimo wi yamu m’ubelokere nisagu
Lembe ma Biblia uyero: “[Yehova] kwio wavuvu ti, ketho mukurane ginindo.”—Zaburi 107:29.
Thelembene pir anyim mwa: Yehova utie ku copo mi bimo wi piny ceke. Dhanu gibisendiri ngo kendo pi yamu m’ubelokere nisagu mukero.
Ebiponjo dhanu nigwoko ng’om cuu mandha
Lembe ma Biblia uyero: “Abidwoki riek man abiponji ku yo m’ibiwotho i ie.”—Zaburi 32:8.
Thelembene pir anyim mwa: Yehova umiyo ni dhanu rwom mi gwoko ng’om. (Thangambere 1:28; 2:15) Ebiponjowa ku kite ma ber mi pong’o rwom maeno mi gwoko giracwiya pare man mi kwo nimakere ku giracwiyane m’udhokowa.
a Yehova utie nying’ Mungu ma segi. (Zaburi 83:18) Nen thiwiwec “Yehova tie ng’a?”