Eyo, wang’ ma pol ka lembe ma wok rek unwang’u dhanu, Jumulembe pa Yehova gimiyo kony. Wamiyo piny ma tap ma yenyne tie ni Jumulembe ku Jumulembe ngo ceke; nimakere ku telowic mi Biblia ma nwang’ere i Jugalatia 6:10, m’uyero: “Watimu bero ni dhanu ceke, ento asagane ni juyic wadwa.” Bende, waii nimiyo kony mi tipo man jukocwiny ma dhanu gitie ku yenyne i saa kumeno.​—2 Jukorintho 1:3, 4.

 I ng’ey peko ma wok rek, judong cokiri mi kabedo ma peko ma wok rek utimere i iye giyenyo dhanu ceke ma gidikiri kugi i cokiri ku yore mi simu pi nineno ka nyo gin ceke gitie ma ber, man ning’eyo nia gicopo bedo ku yeny mi kony ma nenedi. I ng’eye, judong cokiri gidwoko rapor mi lembe ma ginwang’u man mi gin ma gidaru timo i biro ma dit mi Jumulembe pa Yehova mi kabedo ma gikwo i iye.

 Ka cokiri ma tung’ tung’ mi kabedone umbe ku copo mi miyo kony m’ukwayere, Guriri m’utelowic mi Jumulembe pa Yehova maku yub mi miyo kony ma yenyne utie. Lembuno urombo ku kite ma Jukristu mi rundi ma kwong’a gikonyiri ko i kindgi i saa ma kec ubodho i iye. (1 Jukorintho 16:1-4) Biro ma dit mi kabedone ng’iyo Komite ma miyo kony pi nipangu man nitelo wi lembene. Jumulembe mi kabedo mange de gimiyo saa migi man jamcingi ku berocwinygi pi nikonyo ju ma peko uwok i wigi.​—Lembrieko 17:17.

 Yo acel ma jutiyo ko ku giramiya ma judaru oro i biro ma dit mi Jumulembe pa Yehova, utie nikonyo ko ju ma peko ma wok rek unwang’ugi. (Tic mi Jukwenda 11:27-30; 2 Jukorintho 8:13-15) Calu dhanu ma gitimo tic maeno juculogi ngo acula, sente maeca cidho pi nimiyo kony ni dhanu ma peko uwok i wigi, ento ungo pi niculo dhanu ma gitimo tije. Watiyo cuu mandha ku giramiya ceke.​—2 Jukorintho 8:20.