Pirang’o Jumulembe pa Yehova gitimo ngo foc moko?
Ang’o ma konyo Jumulembe pa Yehova ning’eyo ka nyo foc moko nyayu mutoro i Mungu kunoke ngo?
Jumulembe pa Yehova gilar gineno cuu i juk mi Biblia i wang’ ning’iyo ka nyo gibitimo foc moko kunoke ngo. Foc man mutoro moko ma dhanu timo nen kamaleng’ nia girombo ngo ku cik mir ukungu mi Biblia. Jumulembe pa Yehova gitimo ngo kit foc ma kumeno. Pi kit foc mange lundo, Jamulembeman timo ng’iyong’ic pare en gire, etimo “kero nibedo ku pidocwiny ma leng’ i wang’ Mungu man i wang’ dhanu.”—Tic mi Jukwenda 24:16.
Piny e utie penji moko ma Jumulembe pa Yehova gipenjiri ko kinde ma gibeng’iyo ka nyo gibitimo foc moko kunoke ngo. *
Nyo foc maeni ujengere iwi ponji m’ukoc ku mi Biblia?
Cik mir ukungu mi Biblia: “‘Ka kumeno, wuwok cen kud i kindgi man wukoyuru giwu,’ Yehova wacu, ‘man kud wumul gin m’ucido.’”—2 Jukorintho 6:15-17.
Pi nikoyiri magwei kud i kum ponji ceke m’ucido i thenge mi tipo, niwacu ponji ceke m’ukoc ku lembe ma Biblia ubeponjo, Jumulembe pa Yehova gitimo ngo foc m’uketho i iye lembe m’ulubo e:
Foc m’uketho i iye yiyo mungu mange man nitimo igi. Yesu uyero kumae: “Icikiri nirwo ni Yehova Mungu peri, man icikiri nitimo tic ma leng’ ire kende.” (Matayo 4:10) Calu Jumulembe pa Yehova gilubo telowic maeno, gitimo ngo foc mi Noeli, Paska, kadi Nindo mi Jurutic (Nindo acel mi dwi mir 5), pilembe focne giai i thier ma jubed jutimo ni mungu m’araga, ento ni Yehova ngo. M’umedo maeno, gidikiri ngo bende i foc m’ulubo e:
Kwanzaa. Nying’ ma nia Kwanzaa “uai kud i wec mi Swahili ma nia matunda ya kwanza, ma thelembene tie ‘nying’ yen ma kwong’a’ man eno nyutho nia focne uai kud i fet ma kwong’a mi kayucam ma jucaku timo i Afrika.” (Encyclopedia of Black Studies) Kadok nwang’u jumoko neno nia Kwanzaa utie ngo foc mi jurudini de, ento buku moko (Encyclopedia of African Religion) uwacu nia etie rom ku foc moko ma jutimo i Afrika, ma i saane “juthiero mwoka mi cam ni mungu man ni kwaru pi nifoyogi.” Emedo bende kumae: “Kwanzaa ma tie foc ma nyithind Afrika ma gidok i Amerika gitimo, ucungo iwi lembe ma kumeno.”
Kwanzaa
Foc m’i kind dwi mir abung’wen kud apar. Eni tie “foc ma jutimo pi niworo mungu ma dhaku ma nyinge dwi.” (Holidays, Festivals, and Celebrations of the World Dictionary) Kinde ma gibetimo seremoni i saa mi focne, “mon mi pacu gicidh girum i wang’ mungu m’aragane.”—Religions of the World—A Comprehensive Encyclopedia of Beliefs and Practices.
Nauruz (Nowruz). “Foc maeni uai kud i dini mi Zoroastria. Nindo ma jubed jutime i iye ubino nindo acel ma leng’ nisagu i kalandrier ma con mi dinine. . . . Nimakere ku suru mi Zoroastria, i nindo mi foc maeno, jubed jujolo tipo mi dieceng’ ma julwong’o bende [Rapithwin] ku dieceng’ ma ling’ kum jubed juparu nia tipo mi koyo ugam utwiye i the ng’om i saa mir abu.”—United Nations Educational, Scientific and Cultural Organization.
Shab-e Yalda. Nimakere ku buku moko (Sufism in the Secret History of Persia) foc maeni ma jutimo i saa ma kum “ceng’ nen ungo i iye i theng’ ng’om ma yo malu, utie pi niworo Mithra,” ma tie mungu mi der. Juyero nia ve jubed jutimo foc maeno pi niworo mungu mi ceng’ mi Juroma man mi Jugiriki. *
Foc mi dwoko foyofoc. Calu Kwanzaa, foc maeni bende uai kud i foc ma jubed jutimo i saa mi kayu cam pi niworo mungu m’araga ma tung’ tung’. I ng’ei kare, “foc ma con maeno mi lembsuru umondo bende i kanisa mi Jukristu.”—A Great and Godly Adventure—The Pilgrims and the Myth of the First Thanksgiving.
Foc m’uai i lembe mi vupo man i lembe m’uneno bati. Biblia uyero nia dhanu ceke “ma giyiko mesa ni mierolembe (bati)” gitie ju ma ‘giweko Yehova.’ (Isaya 65:11) Pieno, Jumulembe pa Yehova gitimo ngo kit foc m’ulubo e:
Ivan Kupala. Buku moko (The A to Z of Belarus) ukoro kumae: “Dhanu dupa giyiyo nia i saa mi foc maeni [Ivan Kupala] ng’om wodho tego pare i ayi mir udu, man dhanu ma gitie weg amora man weg bati re ma gibimo wi tegone.” I acaki, jukafiri re ma gibed gitimo focne i saa mi oro. Ento buku moko (Encyclopedia of Contemporary Russian Culture), ukoro nia kinde ma dini mi Jukristu umondo, focne gidog gicebiri ku foc mi nindo ma jubed jupoy i iye pi Yohana ma Jababutisi.
Por pa dwi ma kwong’a mi oro (Oro ma nyen mi Chine kunoke mi Corée). “I saa maeno ma pire tek nisagu zoo m’i kind oro, lembe ma pire tek akeca ma juruot, jurimo, man wedi gidieng’ i kume utie nimiyo bati ni jumange, nimiyo woro ni mungu m’araga man ni tipo, man gimiyo mugisa pi oro m’ulubo.” (Mooncakes and Hungry Ghosts—Festivals of China) Rom rom kumeno, i foc mi oro ma nyen mi Corée bende “jubed jutimo thier ni kwaru m’utho, jutimo musana dupa pi niriemo tipo ma reco, jumiyo bati pi oro ma nyen, man jugoyo gagi pi ning’eyo lembe ma bitimere i oro ma nyen.”—Encyclopedia of New Year’s Holidays Worldwide.
Oro ma nyen mi Chine
Foc m’ucungo iwi paru ma nia ng’eyong’ec tho ngo. Biblia unyutho kamaleng’ nia ng’eyong’ec copo tho. (Ezekiel 18:4) Pieno, Jumulembe pa Yehova gitimo ngo foc m’ubecwalu dhanu niyiyo nia ng’eyong’ec tho ngo; focne gini e:
Nindo mi ng’eyong’ec ceke (Nindo mi ju m’utho). Nimakere ku New Catholic Encyclopedia, i nindo maeni “juparu pi jumaleng’ ceke ma githo. Yang’ con jubed juparu nia tipo dhanu ma gibesendiri gibed giwok i nindo maeno calu ulelu, jujogi, man ugwal pi nilero wi ju m’ubed usendogi kinde ma gibino kwo.”
Foc mi Qingming (Ch’ing Ming) man Foc mir ulelu. Jubed jutimo foc ario maeni zoo pi niworo kwaru ma githo. Buku Celebrating Life Customs Around the World—From Baby Showers to Funerals ukoro nia i saa mi foc mi Ch’ing Ming, “juwang’u cam, kong’o, man sente pi ninyutho ni ju m’utho nia juweko ngo gicidhi ma kec kunoke rieu ubenegogi man ma gikoso sente.” Bukune umedo bende nia “i dwi mi Foc mir ulelu, asagane i uthieno ma dwi gudo i iye, dhanu ma gitimo focne giparu nia winjiri ma lee utie i kind ju m’utho ku ju ma kwo nisangu uthieno mange ceke. Pieno, kwayu nimaku yub pi nikwiyo kum ju m’utho man pi niworo kwaru.”
Chuseok. Buku The Korean Tradition of Religion, Society, and Ethics, ukoro nia i saa mi foc maeni, “juthiero cam man kong’o ni tipo ju m’utho.” Eno nyutho nia “juyiyo nia ng’eyong’ec medere nikwo i ng’ei ma ng’atini utho.”
Foc m’utie ku winjiri ku lembajonga. Biblia uyero kumae: “Ng’atu ma lamu bila, ng’atu ma jakil got, kadi jalamlam, kadi jawodhtho, kadi ajoga, kadi weg tipo, kadi jacwitho, kadi adranga . . . en e ginmajudagu ni Yehova.” (Poi mi cik 18:10-12) Pi nigwokiri kara kud gimond i lembe mir ajoga, uketho i iye nisomo lembe mi nyikaluku, Jumulembe pa Yehova gitimo ngo foc mi Halloween ku foc mange bende m’ulubo e:
Oro ma nyen mi Sinhala kuTamil. “Nimakere ku jururieko mi nyikaluku, lembe ma tung’ tung’ ma jutimo i foc maeno miyo bati.”—Encyclopedia of Sri Lanka.
Songkran. Nying’ foc maeni mir Asia “uai kud i wec Sanskrit . . . ma thelembene tie ‘alokaloka,’ man jutimo focne pi ninyutho nia ceng’ ukadhu kud i yung’ini ma julwong’o Aries.”—Food, Feasts, and Faith—An Encyclopedia of Food Culture in World Religions.
Foc ma jubed jutimo i the Cik pa Musa, man m’ujik kinde ma Yesu uthiero kwo pare. Biblia uyero kumae: “Kristu en e ajiki mi Cik.” (Jurumi 10:4) Re asu cik mir ukungu ma nwang’ere i Cik pa Musa ma jugam jumiyo ni Juisrael ma con utie ku bero lee ni Jukristu. Ento Jukristu gitimo ngo foc ma Cikne ukwayu, asagane m’uweco pi bino pa Masiya, pilembe giyiyo nia edaru bino. Biblia uyero kumae: “Giki maeno gitie tipopiny mi gin ma bibino, ma re mandhane utie Kristu.” (Jukolosai 2:17) Pi thelembe maeno man pilembe focne moko utie ku lembsuru m’ukoc ku giragora, Jumulembe pa Yehova gitimo ngo foc m’ulubo e:
Hanukkah. Jutimo foc maeni pi nipoy i kum kite ma judog juthiero ko kendo hekalu mi Juhayudi i Yeruzalem. Ento Biblia uyero nia Yesu udoko jalam ma dit “i hema [kunoke hekalu] ma dit man ma leng’ magwei ma jutimo ku cing’ ungo, niwacu m’i ng’om maeni ngo.” (Juebrania 9:11) Ni Jukristu, hekalu maeno mi tipo ulagu kaka hekalu m’ubino i Yeruzalem.
Rosh Hashanah. Eni utie foc ma jutimo i nindo ma kwong’a mi oro mi Juyahudi. I rundi ma con, i saa mi focne jubed juthiero girathiera ma segi ni Mungu. (Wel 29:1-6) Ento, Yesu Kristu ma tie Masiya ‘ujigo lam ku girathiera’, edwoke ni gin ma tije mbe i wang’ Mungu.—Daniel 9:26, 27.
Nyo etie foc m’ubecwalujo nidikiri i dini mange?
Cik mir ukungu mi Biblia: “Winjiri ma kani m’utie i kind jayic ku jayic ungo? Man winjiri ma kani ma hekalu pa Mungu utie ko kud ayi gin m’acwiya?”—2 Jukorintho 6:15-17.
Kadok nwang’u Jumulembe pa Yehova giii nikwo ku kwiyocwiny ku jirani migi man giworo twero ma ng’atuman utiye ko mi ng’iyo yiyoyic pare de, re gitimo ngo foc m’ubecwalujo nidikiri i dini mange, calu ve m’ulubo e:
Foc ma jutimo pi niyungo jatela moko mi dini kunoke lembe ma diko dhu dhanu mi yic ma tung’ tung’ pi nirwo karacelo. Kinde ma Mungu utelo wi dhanu pare pi niroyogi i ng’om ma nyen ma dhanu m’i iye gibino ku dini mange, eyero igi kumae: “Kud irib lembe moko kugi, kadi ku mungu migi. . . . Kum tek itimo ni mungu migi, ebibedo ni uwic iri andha.” (Ai 23:32, 33) Pieno re m’uketho Jumulembe pa Yehova gidikiri ngo i foc moko ma kumeno, calu ve m’ulubo e:
Loy Krathong. I saa mi foc maeni mi Thailand, “dhanu yiko tabu mir uboko, giketho buji kunoke yend udoksegi i iye man gibolo tabune iwi pii. Giyero nia kinde ma tabune ubemol, ecidho ku bati ma rac bor. I andha jutimo foc maeno pi nimiyo yung ni Buddha.”—Encyclopedia of Buddhism.
Nindo mi yewo dubo i ng’om moko. Jurnal moko (The National) ma wok i ng’om mi Papouasie nouvelle guiné udwogo iwi lembe ma judongo pa gavmenti uyero nia dhanu ma gidikiri i foc maeni “gijolo yiyoyic mir ukungu mi Jukristu.” Ekoro bende nia nindone “konyo nimewo cik mi Jukristu i ng’om.”
Vesak. “Etie foc ma pire tek lee i kind foc ma dhanu ma giworo Buddha gitimo. Gitime pi nipoy pi nindo ma junyolo iye Buddha, nindo ma lero care i iye, man pi tho pare niwacu kinde m’etundo i Nirvana.”—Holidays, Festivals, and Celebrations of the World Dictionary.
Vesak
Foc m’ucungo iwi lembsuru mi dini ma Biblia ucwaku ngo. Yesu uyero ni judong’ dini mi rundi pare kumae: “Wudwoko lembe pa Mungu ni gin ma tije mbe pi lembe mi suru mwu.” Emedo igi bende nia tij thier ma gibetimo umbe pilembe “giponjo cik pa dhanu.” (Matayo 15:6, 9) Jumulembe pa Yehova gidikiri ngo i lembe dupa mi dini pilembe gineno cimowang’ maeno ma Yesu umiyo ni gin ma pire tek lee.
Epiphany (Three Kings’ Day, Timkat, or Los Reyes Magos). Dhanu ma gitimo foc maeni, gitime pi nipoy pi jururieko mi nyikaluku ma gicidh giliewo Yesu kunoke pi nipoy pi batizo pa Yesu. Foc maeni “m’ubenen nia kawoni utie foc mi Jukristu uai kud i foc mi jukafiri ma jubed jutimo i saa ma fodi koth udwongo adwonga, pi niyungo mungu mi nyithi pii ma thindho thindho, mi kulo man mi nam.” (The Christmas Encyclopedia) Timkat, ma tie bende foc m’uyenyo rombo kude, “de ulange nyang’ lee i lembe mi suru.”—Encyclopedia of Society and Culture in the Ancient World.
Foc mi poy pi nindo ma Bikira Maria uidho iye i polo. Ju ma gitimo foc maeni giyiyo nia min Yesu uidho i polo ku kume maeni. Buku Religion and Society—Encyclopedia of Fundamentalism, ukoro nia “yiyoyic maeno ubino mbe i kanisa mi rundi ma kwong’a man giragora moko acel de mbe m’uweco pire.”
Foc ma jupoy ko pi Maria nia junyole m’umbe dubo alaga. Buku New Catholic Encyclopedia ukoro nia “ponji ma nia junyolo Maria m’umbe dubo alaga, nwang’ere ngo dem dem i giragora . . . Etie lembe ma kanisa re m’uroyo.”
Karema. Nimakere ku buku New Catholic Encyclopedia, nindo maeni mi somo penetesia man mi kwiro cam ucaku i “rundi dage mir ang’wen” niwacu oro ma kadhu 200 i ng’ei ma judaru kiewo Biblia. Pi nindo ma kwong’a mi Karema, buku maeno umedo kumae: “Timo ma juwiro ko vuru i ter wang’ jumaleng’ i Ceng’ kas’adek mi vuru, udoko ni gin ma jutimo dong’ i ng’om zoo niai i coko ma jutimo i adhura mi Bénévent i oro 1091.”
Meskel (kunoke Maskal). Buku moko (Encyclopedia of Society and Culture in the Medieval World), ukoro nia jutimo foc maeni m’ucaku i Ethiopie pi nipoy “pi musalaba mandha (musalaba ma junego Kristu i wiye). I saa mi foc maeni judhuro mac man jubed jumiel i ng’ete tingili.” Ento Jumulembe pa Yehova gitiyo ngo ku musalaba i dini migi.
Nyo foc maeni ubeyungo ng’atu moko, dikiri moko, kunoke lanyuth mi ng’om moko?
Cik mir ukungu mi Biblia: “Yehova wacu kumae: Kwong’ ni wi ng’atu m’ugeno dhanu, man m’uketho ring’kum ni bote, man ma cwinye ai ku ba Yehova.”—Yeremia 17:5.
Kadok nwang’u Jumulembe pa Yehova gifoyo ku dhanu mange man girwo bende pigi, ento gidikiri ngo i lembe kunoke i foc m’ulubo e:
Foc ma jutimo pi niyungo ubimo moko kunoke ng’atu mange m’utie ku dito. Biblia uyero kumae: “Uwek dhanu, ma yuyo pare ni i odiume; kum jukwane ni gin moko ni kum ang’o?” (Isaya 2:22) Pieno, Jumulembe pa Yehova gitimo ngo foc mi nyoliri p’ubimo moko ci.
Foc pi niworo drapo mi ng’om moko. Jumulembe pa Yehova gitimo ngo foc mi Nindo mi drapo. Pirang’o? Pilembe Biblia uyero kumae: “Wugwokuru i kum ayi gin m’acwiya.” (1 Yohana 5:21) Tin, dhanu moko gineno ngo drapo nia utie ayi gin m’acwiya, niwacu gin moko ma juromo rwo ire. Ento jakor lembatada moko ma nyinge Carlton J. H. Hayes ukiewo kumae: “Drapo utie lanyuth ma dit mi yiyoyic ma dhanu ceke mi ng’om moko gibedo ko iwi ng’ombe, man etie gin ma pire tek lee.”
Ceng’ ma dit kunoke foc ma juyungo iye ng’atu moko ma leng’. Lembang’o m’utimere kinde ma ng’atu moko ma lworo Mungu ugam urum i wang’ jakwenda Pethro? Biblia uyero kumae: “Pethro uting’e man ewacu kumae: ‘Ai icungi; an de a dhanu.’” (Tic mi Jukwenda 10:25, 26) Calu ma Pethro ku jukwenda mange ceke gigam giyiyo ngo nia jumii igi woro ma segi kunoke jutim igi thier, Jumulembe pa Yehova gidikiri ngo i lembe moko ma jubetimo pi niyungo ng’atu moko ma juyero nia utie ng’atu ma leng’, calu ve focne ma e:
Ceng’ mi Jumaleng’ ceke. “Etie foc ma jutimo pi niyungo Jumaleng’ ceke . . . Ka ma focne ucaku i iye ung’eyere ngo.”—New Catholic Encyclopedia.
Foc ma julwong’o Notre-Dame de Guadalupe. Jutimo foc maeni pi niyungo “dhaku ma leng’ mi Mexique,” ma juparu nia utie Maria ma min Yesu. Jubed juyero nia ewok i ayi mir udu ni jarafur moko i oro 1531.—The Greenwood Encyclopedia of Latino Literature.
Foc ma julwong’o Notre-Dame de Guadalupe
Nindo mi nying’. Buku Celebrating Life Customs Around the World—From Baby Showers to Funerals uwacu nia “Nindo mi nying’ utie foc ma jutimo pi niyungo ng’atu ma leng’ ma jucaku nyinge i kum nyathin, ecopo bedo i saa mi batizo pare kunoke i saa ma jubemiyo ire konfirmasio.” Bukune umedo nia “nindo maeno utie ku winjiri ma pire tek mandha ku lembe mi dini.”
Foc mi lembgamba kunoke m’uneno lwak. Biblia uyero kumae: “Pondo ba Yehova e ber sagu geno dhanu.” (Zaburi 118:8, 9) Pi ninyutho nia gigeno ya Mungu re ma bidaru lembe mi dhanu ento ungo dhanu gin gigi, Jumulembe pa Yehova gidikiri ngo i foc mi Nindo mir aradu kunoke mi Nindo mi mon; kum focne gitielo lembgamba kunoke lembe m’uneno lwak. Pi thelembe ma rom eno, gitimo ngo foc mi Bedagonya kunoke foc mange ma kumeno. M’uweko maeno, gibekuro Ker pa Mungu re m’ubin udar lembe mir akoyakoya mi rangi man koso rom rom.—Jurumi 2:11; 8:21.
Nyo foc maeni ubedodo thek moko kunoke suru moko iwi jumange?
Cik mir ukungu mi Biblia: “Mungu umbe kud akoyakoya, ento kud i thek ceke, ng’atu m’ubelwore man m’ubetimo gin m’atira, ejole.”—Tic mi Jukwenda 10:34, 35.
Kadok nwang’u Jumulembe pa Yehova ma pol gimaru ng’om ma junyologi i iye de, ento gitimo ngo foc ma dodo thek kunoke suru moko calu ve foc m’ulubo e:
Foc ma jutimo pi niyungo udul mony mi ng’om moko. Kakare nicwalu julub pare nia gikied lwiny, Yesu uyero igi kumae: “Wumeduru nimaru judegi mwu man wurwo pi ju m’ubenyayu ragedo i kumwu.” (Matayo 5:44) Pieno, Jumulembe pa Yehova gidikiri ngo i foc ma jutimo pi nimiyo yung’ ni juaskari, calu ve foc m’ulubo e:
Nindo mir Anzac. “Anzac thelembene tie Australian and New Zealand Army Corps (udul mony mir Australie man mi Nouvelle-Zélande)”, man “i nindo mir Anzac jupoy pi dhanu ma githo i lwiny.”—Historical Dictionary of Australia.
Nindo mi bavetera (Nindo mi poy, Ceng’ yenga mi poy). I nindo maeni, jupoy pi “bavetera ma gibino basunda con man pi ju ma githo i lwiny pi ng’om migi.”—Encyclopædia Britannica.
Foc ma jutimo pi nipoy i kum lembatada mi thek kunoke i kum bedo angonya mi thek. Pi julub pare, Yesu uyero kumae: “Gitie ngo mi ng’om, calu ma an de atie ngo mi ng’om.” (Yohana 17:16) Kadok nwang’u gimaru niponjo lembatada mi ng’om ma gibekwo i iye de, Jumulembe pa Yehova gimondo ngo i lembe ma calu ve m’ulubo e:
Australia Day (Nindo mir Australie). Nimakere ku buku Worldmark Encyclopedia of Cultures and Daily Life, i foc maeni, jupoy pi “nindo acel mi oro 1788 kinde ma basuda mir Angleterre giguro drapo migi i ng’om mir Australie man giyero nia etie i the loc migi.”
Guy Fawkes Day (Nindo pa Guy Fawkes). “I nindo maeni, juparu pi yub m’ugam urombo ngo ma Guy Fawkes ku Jukatholiki mange gimaku pi ninego ubimo Jacques mi I man ninego the Parlema mir Angleterre i oro 1605.”—A Dictionary of English Folklore.
Nindo ma ng’om moko unwang’u iye bed’angonya. I ng’om ma pol, i “nindo maeni dhanu ceke paru pi nindo ma ng’om migi nwang’u iye bed’agonya.”—Merriam-Webster’s Unabridged Dictionary.
Nyo etie foc moko ma ng’atuman timo lembe ceke m’emaru kunoke tarwang’?
Cik mir ukungu mi Biblia: “Nindo m’udaru kadhu ma wubed wutimo iye yeny mi dhanu mi thek udaru romo; i saa maeca wubed wumiyuru i timo mir acidi man mi thwon, i awanya ma bimo wiye tek, mer ku kong’o, foc ma reco, kwaya mi meth, man rwo ma reco ni ayi gin m’acwiya.”—1 Pethro 4:3.
Nimakere ku cik mir ukungu maeni, Jumulembe pa Yehova gidikiri ngo i foc ma jumadhu iye kong’o nikadhu mukero, man i foc ceke ma reco. Jumulembe pa Yehova gimaru ninambu karacelo ku jurimbgi, man ka ging’iyo nimadhu kong’o, saa ceke gitimo kero nikadhu ngo mukero. Giii nilubo juk ma e mi Biblia: “Kadok wubecamu kadi wumadhu kunoke wutimo lembe moko ci, wutim lembe ceke pi dwong’ pa Mungu.”—1 Jukorintho 10:31.
Pieno, Jumulembe pa Yehova gidikiri ngo i foc ma tung’ tung’ ma cwalujo i timo m’umaku piny ungo ma Biblia ukwero. Eno uketho i iye bende foc mi Juyahudi ma julwong’o Purim. Kadok nwang’u niai con i foc mi Purim, Juyahudi gipoy i kum kite ma jubodho kogi i rundi dage mir abic W.N.Y. de, ento buku moko (Essential Judaism) uyero nia “focne umaku kaka foc mi Juyahudi ma julwong’o Mardi Gras.” Ju ma pol ma gitimo foc maeno “giranjiri i kendi ma dongo (ju ma co kendo kendi mi mon), jutimiri swa, jumer ku kong’o man jubaru wi dhanu ku kok.”
Calu ma Jumulembe pa Yehova gitimo ngo foc ma pol, nyo asu gimaru wedi migi?
Eyo. Biblia ubeponjowa nia wamar man wawor wedi mwa ceke, kadok nwang’u yiyoyic migi ukoc de. (1 Pethro 3:1, 2, 7) I andha, ka Jamulembe pa Yehova moko ujigo nidikere i foc moko, lembene copo ton i wedi pare moko, lembene romo timogi rac, kunoke gicopo nwang’u nia ewenjogi. Pieno, dupa m’i kind Jumulembe pa Yehova ginyutho ni wedi migi nia gimarugi, gikoro igi ku bodho thelembe m’ucwalugi nimaku yub ma kumeno, man giliewogi i saa mange.
Nyo Jumulembe pa Yehova gikwero dhanu mange nia kud gitim foc moko?
Ungo. Ging’eyo nia ng’atuman ucikere nimaku yub pare gire. (Yocuwa 24:15) Jumulembe pa Yehova ‘giyungo kwond dhanu ceke’ kadok nwang’u yiyoyic migi ukoc de.—1 Pethro 2:17.
Nen bende
PENJI MA DHANU BEPENJO AKECA
Yiyoyic mwa wa Jumulembe pa Yehova ucungo iwi ang’o?
Nwang’ i adundo lembe 15 mir ukungu mi yiyoyic mwa.