Nyo paru mi thieriri ni Yehova man mi limo batizo ubenyayu lworo i ii? Tekene kumeno, thiwiwec maeni bikonyi nivoyo lworo peri.

I thiwiwec maeni

•  Kan atimo dubo ma pek i ng’ey batizo ke?

•  Ka nyo tic m’ubekura i ng’ey batizo ubenyayu lworo i iya ke?

•  Ka nyo abenwang’ara nia aromo ngo nitimo ni Yehova ke?

•  Lembe m’aradu wedu giyero

 Pirang’o lworo ubenegi? Saa moko nyo ing’eyo ng’atu moko m’utimo dubo ma pek man ugam ukwayere nia jukoye kud i cokiri. (1 Jukorintho 5:11-13) Saa moko nyo in de cwinyi bepido nia lembe ma rom eno binweng’i.

 “Wang’ ma kwong’a kinde m’aparu pi limo batizo, pidoic ma nia lembe binyothere ira unyayu lworo lee i iya. Aparu wang’acel pir adwogi ma rac ma lembene copo kelo ni junyodo para.”​—Rebekah.

 Giragora ma pire tek: “Dong’ jadubo wek yo pare . . . Wek edwog ba Yehova, e kisa binege i kume; man ba Mungu mwa, kum ebiweko ire ma gwei.”​—Isaya 55:7.

 Kepar pi lembe ma e: Kadok nwang’u dhanu ma gikwero niyewo dubo ma gitimo jukoyogi kud i cokiri de, re Yehova tie ku kisa ma lee yor i bang’ ju ma giyewo dubo migi ku cwinygi ceke man ma gijolo twiny.​—Zaburi 103:13, 14; 2 Jukorintho 7:11.

 Tung’ ku maeno, lemandha ni e: Kadok nwang’u itie ku kum mi dubo de, re ku kony pa Mungu icopo ceriri i wang’ abidhe. (1 Jukorintho 10:13) Re, ng’a ma bimaku yub mi gin m’ibitimo? Nyo in, kunoke ng’atu mange?

 “Abino ku lworo ma nia saa moko abitimo dubo ma pek i ng’ey batizo para, re lundo anyang’ nia eromo bedo kosa ka tekene alimo ngo batizo. Bende, anyang’ nia mito ngo awek jiji mi lembe mi nindo m’ubino ucera ku timo gin m’acopo timo niai kawoni.”​—Karen.

 Lembe ma pire tek: Iromo ng’iyo niuro timo dubo ma pek, tap calu ma jurutic pa Yehova ma dupa de gibetimo.​—Jufilipi 2:12.

 Pi ninwang’u kony lee: Nen thiwiwec “Comment puis-je résister à la tentation ?”

 Pirang’o lworo ubenegi? Ku lapor, saa moko nyo ing’eyo aradu ma dupa ma giweko junyodo migi man jurimgi, gidok bor pi nitimo lee i tic pa Yehova. Nyo itie ku lworo nia dhanu biparu ya in de ibitimo lembe ma rom kumeno.

 “Jakristu m’ulimo batizo utie ku kaka mi nwang’u rwom dupa i tic pa Yehova, ento dhanu moko gibedo ngo ayika kunoke lembe ma ginwang’iri i iye re ma ketho gitimo ngo kumeno.”​—Marie.

 Giragora ma pire tek: “Ng’atuman ung’ii i tic pare gire, e anyong’a binege i kum tic pare gire, ento ungo pilembe ebeporere ku ng’atu mange.”​—Jugalatia 6:4.

 Kepar pi lembe ma e: Kakare nibeporiri ku jumange, keth wii zoo i kum wec ma nwang’ere i Marko 12:30 m’uyero: “Icikiri nimaru Yehova Mungu peri kud adundeni ceke.”

 Nen nia ubekwayu itim ni Yehova kud adunde peri ceke ento ungo ku pa ng’atu mange. Kan imaru Yehova andhandha, ibisayu yore m’itim ko ire ku copo peri ceke.

 “Kadok nwang’u batizo utie dagutielo ma pire tek de, re lundo etie ngo ter ma pek. Tekene ibedikiri ku jurimo ma beco, gibikonyi. Nok nok, timo tic ma tung’ tung’ bimedo anyong’a peri ameda. Kan iwotho uro limo batizo, ng’ey nia in giri de lembene bitimi rac.”​—Julia.

 Lembe ma pire tek: Med foyofoc peri pi mer ma Yehova unyutho iri. Eno bicweli nitimo ire ku copo peri ceke.​—1 Yohana 4:19.

 Pi ninwang’u kony lee: Nen thiwiwec “Est-ce que je suis quelqu’un de responsable ?”

 Pirang’o lworo ubenegi? Dhanu utie gin moko ngo ka ju porogi ku Yehova ma tie Jabim mi polo ku ng’om zoo! Saa moko nyo iromo bedo ku jiji kan andha ndhu Yehova ung’eyo nia in de itie.

 “Pilembe junyodo para gitie Jumulembe pa Yehova, abino lworo nia bidok nen ve ‘alagu’ winjiri para ku Yehova i bang’gi man nia utie ngo Yehova re m’utela athothi i bang’e.”​—Natalie.

 Giragora ma pire tek: “Ng’atu moko mbe ma copo bino i bang’a ka Wego m’uora utele en ungo.”​—Yohana 6:44.

 Kepar pi lembe ma e: Ayi m’ibeparu ko pi batizo ubenyutho nia Yehova ubeteli i bang’e pi nibedo ku winjiri ma ceng’ini kude. Nyo iromo maru ijol lwong’o maeno?

 Poy nia Yehova re ma ketho cik ni dhanu ceke m’ebitelo i bang’e, ento in ungo kadok ng’atu mange de ngo. Bende, Lembe pare de ubetielo cwinyi nia tekene ‘icoro ceng’ini i vut Mungu, . . . en de ebicoro ceng’ini i vuti.’​—Yakobo 4:8.

 “Pilembe ing’eyo Yehova man dong’ itie ku winjiri ma ceng’ini kude, eno ci ubenyutho nia andha emeri. Pieno, kan iparu nia iromo ngo nitimo ni Yehova, poy wang’acel nia en ebeparu ngo kumeno. Saa ceke Yehova utie pwe.”​—Selina.

 Lembe ma pire tek: Kan ipong’o lembe ma Biblia ubekwayu pi nilimo batizo, eno ci nwang’u iromo pi nitimo ni Yehova. Bende, poy nia en re m’eromo ya iwore.​—Lembanyutha 4:11.

 Pi ninwang’u kony lee: Nen thiwiwec “Pirang’o acikara nirwo?”