PENJI M’ARADU GIPENJIRI KO
Bikwayu atim ang’o i ng’ey Batizo para?—Thenge mir 2: Mediri niwotho i atira
Biblia uyero nia gin moko ma ber umbe ma Yehova bicero “ni ju m’uwotho [i] atira.” (Zaburi 84:11) “Niwotho [i] atira” thelembene tie ang’o? Thelembene tie niwotho i ayi ma nyutho nia ibegwoko lembang’ola m’itimo ni Yehova kinde m’ibino thieriri in giri ire. (Eklizia 5:4, 5) Dong’ iromo wotho nenedi i atira i ng’ey batizo peri?
I thiwiwec maeni
Mediri niciro peko
Giragora ma pire tek: “Wacikara nimondo i Ker pa Mungu nikadhu kud i masendi dupa.”—Tic mi Jukwenda 14:22.
Thelembene: I andha, Jukristu ceke binwang’iri ku peko i kwo migi. Pekone moko m’ibinweng’iri ko utie cac kunoke jai ma biwok i kumi pilembe itie Jakristu. Pekone mange ma calu ve can sente kunoke remokum copo mulo kum dhanu ceke.
Gin m’icopo geno: Kawoni kunoke saa mange, lembe romo lokere rek i kwo peri i ayi ma nwang’u nyo imaru de ngo. Biblia uyero nia lembe ma rac copo wok i kum dhanu ceke, nik’ebed Jukristu kunoke Jukristu ngo de.—Eklizia 9:11.
Gin m’iromo timo: Calu m’ing’eyo nia ibinweng’iri ku peko, iromo yikiri pi ninyego kugi. Nen peko ma tung’ tung’ ni yore mi dwoko yiyoyic peri udok tek man ma copo ketho i jengiri nisagu iwi Yehova. (Yakobo 1:2, 3) I ng’eye, ibiwinjiri calu jakwenda Paulo m’uyero kumae: “Pi gin ceke atie ku kero ni kum ng’atu m’ubemiyo ira tego.”—Jufilipi 4:13.
LEMBE M’UTIMERE ANDHA. “Nyanok i ng’ey m’alimo batizo, umego para giweko timo ni Yehova, remo upodho iwi junyodo para man an de acaku twoyo. Nwang’u cwinya copo tur yot yot mandha, man nang’u wiya romo wil nia kinde m’abino thierira an gira ni Mungu, ang’olo nia abiketho timo ire ni gin ma pire tek nisagu i kwo para. Ento, thieriri para re m’ukonya niciro peko maenogi ceke.”—Karen.
Juk: Ponj lembe iwi Yosefu. Iromo somo lembe iwi kwo pare i Thangambere thek 37 man 39 nitundo 41. Kenen lembe ma tek m’urube rek man kite m’enyego ko ku lembene. Yehova ukonyo Yosefu nenedi?
Pi ninwang’u kony lee
Mediri niceriri i wang’ abidhe
Giragora ma pire tek: “Ng’atuman nwang’ere kud amulaic nwang’u ebeweko awanya pare ma rac utele man ubidhe.”—Yakobo 1:14.
Thelembene: I saa moko, wan ceke wanwang’ara kud abidhe, ma ka wacerira ngo i wang’e eromo cwaluwa nitimo lembe ma rac.
Gin m’icopo geno: I ng’ey batizo peri, ibinweng’iri asu i wang’ “awanya ma reco m’i kum.” (2 Pethro 2:18) Icopo bedo kud ava mi timo ribiri i wang’ gamiri peri.
Gin m’iromo timo: Lar iyik paru peri niai kawoni ma fodi inweng’iri ngo i wang’ abidhe kara kud i bin i wek ava peri re m’uketh i mak yub ma rac. Poy nia Yesu uyero kumae: “Ng’atu moko mbe ma copo timo ni rwodhi ario.” (Matayo 6:24) Icopo ng’iyo nia ng’a ma bibedo rwoth peri. Ng’ii Yehova re m’ubed rwoth peri. Kadok nwang’u ava ma rac moko copo bedo ku tego ma lee de, iromo ng’iyo niceriri i kume.—Jugalatia 5:16.
Juk: Ke ng’ey lembe m’itek i iye ku m’itek ungo i iye. Ng’ii jurimo ma biketho ibed ku kura ma beco. Koc cen ku dhanu, kabedo, man lembe ma romo ketho ebed iri tek nitimo gin m’atira.—Zaburi 26:4, 5.
Pi ninwang’u kony lee
Mediri nimiyo tego i amora peri
Giragora ma pire tek: “Unyuth amora ma rom . . . cil i ajiki, wek kara kud wudok junyap.”—Juebrania 6:11, 12.
Thelembene: Ng’atu ma ketho ngo wiye i kum tic pare, amora pare romo caku jwik nok nok man edoko janyap.
Gin m’icopo geno: Copere nia ibino kud anyong’a man amora lee mandha i ng’ey batizo peri. Imaru Yehova de lee. Ento i ng’ey kare moko, ecopo bedo iri tek nia imediri niwore i lembe ceke, e lembuno copo ketho cwinyi tur man amora peri de jwik.—Jugalatia 5:7.
Gin m’iromo timo: Mediri nitimo lembe ma ber kadok nwang’u saa moko adundeni ubecweli ngo nitimo kumeno de. (1 Jukorintho 9:27) Nok nok, woth mediri nicoro ceng’ini i vut wuru mi polo ma nwang’u ibeng’eye ko ma ber mandha, man ibewotho weco ko i bang’e wang’ ma pol nikadhu kud i rwo. Bende, mediri nitheyo mer ma ceng’ini ku dhanu m’umaru nitimo ni Yehova.
Juk: Poy nia Yehova umeri lee dit man etie ayika pi nikonyi. Kud i par nia ng’eicwiny bimake i kumi kan amora peri ujwik pi nyathi saa moko. Biblia uyero kumae: “Emio tego ni ju m’uvoc; man emedo tego ni ng’atu ma tego mbe kude.” (Isaya 40:29) I saa ma tap, ebipoko mugisa iwi kero m’ibetimo pi nidok nwang’u amora peri kendo.
Pi ninwang’u kony lee
Som:
Nen:
Lembe m’aradu wedu beyero—Kwo ma cuu nisagu zoo
Lembe ma pire tek: Kan ibewotho i atira, ibinyayu anyong’a i Yehova! (Lembrieko 27:11) Ebibedo kud anyong’a nia i ng’iyo nibedo i thenge pare man ebimiyo iri piny ceke m’itie ku yenyne pi niceriri i kum abidhe pa Sitani.