Wec ma juloko nia “cer” i Biblia, uai kud i wec mi dhu Jugiriki ma nia anastasis, ma thelembene tie “niai malu” kunoke “nicungo kendo.” Ka ng’atu moko ucer, eca nwang’u eai kud i kind ju m’utho man edoko kwo kendo calu m’elar ebino i wang’ tho pare.​—1 Jukorintho 15:12, 13.

 Kadok nwang’u wec ma nia “cer” umbe i Lembagora mi dhu Juebrania ma wang’ ma pol julwong’o nia Lembariba ma con de, re ponji iwi cer nwang’ere i iye. Ku lapor, nikadhu kud i bang’ jabila Hoseya, Mungu ung’olo kumae: “Abiwarugi kud i tego mi liel: abiwarugi kud i tho.”​—Hoseya 13:14; Yob 14:13-15; Isaya 26:19; Daniel 12:2, 13.

 Dhanu ma bicer gibibedo kani? Jumoko gibicer pi nicibimo karacelo ku Kristu i Ker m’i polo. (2 Jukorintho 5:1; Lembanyutha 5:9, 10) Biblia ulwong’o cer maeno nia “cer ma kwong’a” man eyero pi dhanune nia gitie “ju ma kwong’a ma bicer;” wec maeno zoo ubenyutho nia cer mange unuti m’ubelubo maeno. (Lembanyutha 20:6; Jufilipi 3:11) Cer ma tokcen eno bibedo pi dhanu ma wendgi kwanere ngo ma gibikwo kud anyong’a iwi ng’om.​—Zaburi 37:29.

 Dhanu bicer nenedi? Mungu umiyo copo mi cero ju m’utho ni Yesu. (Yohana 11:25) Yesu bidwogo “dhanu ceke ma gin’i kabuli” pi nidok kwo kendo; ng’atuman ku kite, ku kote man ku lembe m’eng’eyo. (Yohana 5:28, 29) Ju ma gibecer pi nicikwo i polo, ginwang’u kum mi tipo, ento ju ma gibicer pi nikwo iwi ng’om, gibibedo ku kum m’umbe remo, niwacu kum ma leng’ mandha.​—Isaya 33:24; 35:5, 6; 1 Jukorintho 15:42-44, 50.

 Jukani ma gibicer? Biblia uyero nia “cer bibedo nuti ni weg bedopwe ku weg bedopwe ngo de.” (Tic mi Jukwenda 24:15) Weg bedopwe uketho i iye dhanu ma calu ve, Noa, Sara, man Abraham. (Thangambere 6:9; Juebrania 11:11; Yakobo 2:21) Weg bedopwe ngo ke uketho i iye dhanu ceke ma gituc niworo ngo cik pa Mungu, pilembe gibino mbe ku kaka mi ponjo cikne man mi wore.

 Ento ju ma gidoko jutimrac man gikwero nilokiri, gibicer ungo. Tek dhanu maeno githo, githo migi magwei m’umbe genogen mi dok kwo kendo.​—Matayo 23:33; Juebrania 10:26, 27.

 Dhanu bicer awene? Biblia ular uyero nia cer pi kwo mi polo bitimere i saa mi bedonuti pa Kristu, m’ucaku i oro 1914. (1 Jukorintho 15:21-23) Dhanu bicer pi nidok kwo iwi ng’om i kind Oro elufu acel mi bimobim pa Yesu Kristu, kinde ma ng’om bidoko ni paradizo.​—Luka 23:43; Lembanyutha 20:6, 12, 13.

 Pirang’o wacopo yiyo nia cer bibedo nuti? Biblia uweco pi cer abung’wen m’ugam utimere ma dhanu de uneno. (1 Ubimo 17:17-24; 2 Ubimo 4:32-37; 13:20, 21; Luka 7:11-17; 8:40-56; Yohana 11:38-44; Tic mi Jukwenda 9:36-42; Tic mi Jukwenda 20:7-12; 1 Jukorintho 15:3-6) Cer ma Yesu ucero ko Lazaru utie lembe mi zungo ma lee dit, kum nwang’u Lazaru utho udoko nindo ang’wen man Yesu utimo udu maeno i wang’ udul dhanu. (Yohana 11:39, 42) Kadok ju ma gibed gijai ni Yesu de gikwero ngo lembene, pieno gigam gicamu ganda kara gineg Yesu giku Lazaru ceke.​—Yohana 11:47, 53; 12:9-11.

 Biblia unyutho nia Mungu utie ku copo man ava mi ketho ju m’utho i udok ukwo kendo. Etie ku copo m’ajikine mbe, pieno eng’eyo cuu lembe ceke m’uneno dhanu m’ebicero. (Yob 37:23; Matayo 10:30; Luka 20:37, 38) Mungu tie ku copo mi ketho ju m’utho gidok gikwo kendo man ebemito bende nicerogi! Kinde ma Biblia ubekoro pi cer mi nindo m’ubino, eyero lembe m’ulubo e pi Mungu: “Ibedo kud ava tic m’i cingi.”​—Yob 14:15.

Paru ma cuu ngo iwi cer

 Vupo: Cer utie niketho ng’eyong’ec ku kum udikere kendo i acel.

 Lemandha: Biblia ubeponjo nia ng’eyong’ec utie ng’atini en zoo, ento ungo watkum moko ma medere nibedo kwo i ng’ei tho. (Thangambere 2:7; Ezekiel 18:4) Ka ng’atini ucer, tie ngo nia ng’eyong’ec pare udikere kendo ku kume, ento judok jucwiye kendo ni ng’eyeng’ec ma kwo.

 Vupo: Jumoko gicer man ndhundhu judok junyothogi.

 Lemandha: Biblia uyero nia “ju m’utimo lembe ma reco” gibicer “cer mi pokolembe.” (Yohana 5:29) Ento pokolembe maeno bibedo iwi lembe ma gibitimo i ng’ei cer migi, ento ungo ma gilar gitimo i wang’ tho migi. Yesu uyero kumae: “ju m’utho gibiwinjo . . . dwand Wod Mungu, man ju ma giwinjo man giworo gibikwo.” (Yohana 5:25) ‘Ju ma gibiwinjo man ma gibiworo’ lembe ma giponjo i ng’ei cer migi, jubikiewo nying’gi i “kithabu m’adola mi kwo.”​—Lembanyutha 20:12, 13.

 Vupo: Kinde ma ng’atini ucer, enwang’u de tap kum m’elar ebino ko i wang’ tho pare.

 Lemandha: M’umbe jiji i ng’ei tho, kum ng’atini rungere man eruth.​—Eklizia 3:19, 20.