Kum Yesu man wang’e ubino nenedi?
Lembe ma Biblia udwoko
Ng’atu moko acel de mbe ma copo koro tap tap nia kum Yesu man wang’e ubino nenedi, pilembe Biblia ukoro ngo lembe iwi kume. Eno ubenyutho nia ning’eyo kite ma kum Yesu ubino ko utie ngo gin ma pire tek. Enre lembe ma Biblia ukoro, romo konyowa ning’eyo nia kum Yesu man wang’e ubino nenedi.
Ayi pare: Calu ma min Yesu ubino Nyayahudi, copere nia elagu ayi mi Juyahudi. (Juebrania 7:14) M’umbe jiji, ayi pare ubino ngo tung’ ku Juyahudi mange. Nindo moko egam ewotho niai i Galilaya nitundo i Yeruzalem ma ng’atu moko mbe m’ung’eyo. (Yohana 7:10, 11) Bende, jubed jung’iyo ngo Yesu yot yot kadok kinde m’ebedo ku julub pare ma ceng’ini. Poi nia ugam ukwayu Yuda Iskariot unyuth Yesu anyutha ni udul askari m’ucidho nimake.—Matayo 26:47-49.
Kadhiri pa yuk wiye: Copere nia Yesu ubino ngo ku yukwic m’uwobo, pilembe Biblia uwacu nia “tek yukwi ng’atu ma co uwobo en e lewic ire.”—1 Jukorintho 11:14.
Yir tike: Yir tik Yesu ubino nuti. Ebed elubo cik mi Juyahudi m’ugam ukwero ‘ninyotho theng tikjo.’ (Lembe mi Julawi 19:27; Jugalatia 4:4) Bende, Biblia uweco pi yir tik Yesu, i lembila m’ukoro pi masendi m’ebisendere ko.—Isaya 50:6.
Kume: Lembe tie dupa m’unyutho nia Yesu ubino ng’atu ma tek. Kinde m’ebino timo tic mi rweyo lembanyong’a, ebed ewotho kilometre ma dupa. (Matayo 9:35) Wang’ ario, eyiko lembe m’unyothere i hekalu mi Juyahudi: eredho meza mi juwil sente, man eriemo lei kud ukedi. (Luka 19:45, 46; Yohana 2:14, 15) Buku moko (Cyclopedia) ma McClintock giku Strong gikiewo uyero kumae: “Lembe ceke ma jukoro i buku mir Injili unyutho nia [Yesu] ubino ng’atu ma tek man ma kume leng’.”—Volume IV, mbaya 884.
Kit wang’e: Yesu ubino ng’atu ma nza nza, ma jakisa man m’umbe jiji, kite maeno ubed unen i wang’e. (Matayo 11:28, 29) Dhanu mi kwonde ceke ubed usaye pi ninwang’u kony man jukocwiny. (Luka 5:12, 13; 7:37, 38) Kadok awiya ma thindho de kumgi ubed upoto apota i ng’et Yesu.—Matayo 19:13-15; Marko 9:35-37.
Paru ma cuu ngo iwi kite ma kum Yesu man wang’e ubino ko
Paru ma cuu ngo: Dhanu moko giwacu nia Yesu ucikere ninyolere i thekwaru mir Afrika pilembe buku mi Lembanyutha uporo yukwiye ku yuk urombo man tiende ku “mola ma jubetwagu i uka.”—Lembanyutha 1:14, 15.
Lemandha: Lembe ma jukiewo i buku mi Lembanyutha, junyuthe “nikadhu kud i giranyutha.” (Lembanyutha 1:1) Lembe ma bukune ukoro pi yukwi Yesu man pi tiende utie wec mi lapor m’ubenyutho kite ma tung’ tung’ m’etie ko i ng’ei m’ecer; ento ungo pi nikoro kite ma kume man wang’e ubino nen ko saa m’ebino iwi ng’om. Kinde ma Lembanyutha 1:14 uwacu nia ‘wi Yesu man yukwiye ubino tar calu yuk urombo ma tar man calu pei,’ etiyo ku rangi pi lapor, ento ungo pi ninyutho kite ma kum Yesu utie ko. Eno ubenyutho rieko m’etie ko nikum oro pare. (Lembanyutha 3:14) Pieno, giragora maeni ubewacu ngo nia yuk wi Yesu utie calu yuk urombo man nia yukwiyene tie calu pei.
Tiend Yesu ubino nen “calu mola ma jubetwagu i uka.” (Lembanyutha 1:15) Bende “wang’e ubino ve ceng’ m’uberieny ku tego pare zoo.” (Lembanyutha 1:16) Calu ma rangi mi dendkum moko mbe m’urombo ku gin ma giragora maeno ukoro, ecopere nia i ginmawokiwang’ maeni, jutiyo ku wec mi lapor pi ninyutho Yesu m’ucer, m’etie ng’atu ‘m’ubedo i lero ma jucopo tundo ngo i kume.’—1 Timoteo 6:16.
Paru ma cuu ngo: Yesu ubino ng’atu ma ng’ic man ma tego pare mbe.
Lemandha: Yesu ubed utimo lembe calu dhanu ma co. Ku lapor, ku tegocwinye, enyuthere ni udul askari m’ubino nimake. (Yohana 18:4-8) Ugam ukwayu bende nia Yesu ubed ku kero lee pi nitiyo ku jamtic ceke ma jutiyo ko ku cing, ma jubodho mi bau ubed utiyo ko.—Marko 6:3.
Dong’ pirang’o ke Yesu ubino ku yeny ma nia jukonye ku yeyo yen mi can ma jubecigure i wiye? Pirang’o elar etho i wang’e ma nwang’u fodi jumange ma jugure kugi githo ngo? (Luka 23:26; Yohana 19:31-33) Tap i wang’ nek pa Yesu, ekadhu kud i lembe dupa ma pek m’udaru tego pare. Egam enindo ngo diewor soro, pilembe can ubino nege lee akeca. (Luka 22:42-44) Juyahudi gisende diewor meca traka, urwone kugweno gikobe i cing’ Juroma, m’udog usende dong’ ku rac. (Matayo 26:67, 68; Yohana 19:1-3) Copere nia masendi maeno re m’uketho elar etho nyapio pio.
Paru ma cuu ngo: Saa ceke Yesu ubino nyacan can man wang’e ubino kwa atwiya.
Lemandha: Lembe ma Yesu utimo unyutho nia elubo tap tap kite pa Yehova ma tie Won mi polo, ma Biblia ukoro nia tie “Mungu ma jamutoro.” (1 Timoteo 1:11; Yohana 14:9) Ku lapor, Yesu uponjo dhanu ku gin ma romo konyogi kara gibed jumutoro. (Matayo 5:3-9; Luka 11:28) Eno ubenyutho nia saa ceke mutoro ubed unen kamaleng’ i wang’ Yesu.
Nen bende
ESSENTIAL BIBLE TEACHINGS
Ang’o ma copo nyutho cu iwa nia Biblia tie lembe mandha?
Ka Biblia uai andha i bang’ Mungu, umaku ekoc bor ku buku mange ceke ma dhanu kiewo.
WATIE JUKANI?
Kway jubin juliewi
Wuwec iwi ponji mi Biblia kunoke ponj lembe lee iwi Jumulembe pa Yehova.