Ungo. Kinde ma juporo lembe mi Biblia ma kawoni ku mi gor ma con, junwang’u nia juwilo ngo lembe mi Biblia kadok nwang’u oro ukadhu lee ma judok jubed jukiewe kendo kendo iwi jamtic ma nyothere.

 Judaru nwang’u gor ma con mi Biblia ma kadhu elufu. Gorne moko lembe mi igi ukoc, eno ubenyutho nia kosa ugam utimere kinde ma jubeloke. Lembe ma pol m’ubed ukocne gitie lembe ma thindho thindho, pieno giwilo ngo thelembe mi gin ma jukiewo. Ento jugam junwang’u lembene moko ma nok m’ukoc, m’ubenen nia juroyogi mi tek tek oro dupa udaru kadhu pi niwilo lembe ma jugoro i Biblia. Wakenen lapor ario:

1.   I 1 Yohana 5:7, lok moko ma con mi Biblia uyero kumae: “i polo,Wego, Lembe, man Ulelu Maleng’: man gin adek eno gitie acel.” Ento gor ma jugeno unyutho nia wec maeno ubino mbe i gor ma con mi Biblia. Judok jumedogi yor i ng’eye. a Pieno, lok ma jugeno mi Biblia ma kawoni uwodhogi cen.

2.   I gor ma con mi Biblia, nying’ Mungu ma dhe nwang’ere ma kadhu wang’ elufu. Ento lok ma pol mi Biblia uwilo nying’ne ku nying’ mi dito ma calu ve “Rwoth” kunoke “Mungu.”

 Tin eni dong’ junwang’u gor ma con dupa dit uketho etie yot ninwang’u kosa nikadhu mi wang’e. b Dong’ kinde ma juporo lembe mi gor ma tung’ tung’ maeno, enyutho ang’o iwi lembe ma nwang’ere i Biblia ma watie ko tin eni?

•   Kinde ma jararieko moko ma nyinge William Henry Green, ubino weco iwi lembe ma nwang’ere i Lembagora mi Juebrania (ma jubed julwong’o nia “Lembariba ma con”), eyero kumae: “Jucopo yero m’umbe jiji nia giragora mange ma con m’ugwokere tap tap nitundo i nindo mwa umbe.”

•   Pi Lembagora mi Jugiriki mi Jukristu kunoke “Lembariba ma nyen,” Frederick Fyvie Bruce ma tie jararieko mi lembe mi Biblia, uyero kumae: “Lembe m’unyutho nia Lembariba ma nyen uyero lemandha utie dupa nisagu mi gor ma pol mi rundi ma con. Gor maeno ng’atu moko acel de mbe ma dieng’ i kumgi ka nyo giyero lemandha.”

•   Frederic Kenyon ma jararieko moko ma pire ung’eyere lee pi lembe mi gor mi Biblia uyero nia ng’atini “copo ting’o Biblia no zoo i cinge man eyero m’umbe lworo kadi jiji moko nyanok de nia eni tie andhandha Lembe pa Mungu, m’ukokere kud i kind dhanu ma tung’ tung’ man kud i kind oro ma swa nitundo i bang’wa, m’umbe ma lembene moko ukabere cen.”

•   Dhanu ceke ma gibed giloko Biblia, dok ebed Juyahudi kadi Jukristu, gibed gikanu ngo kosa ma lee ma dhanu pa Mungu utimo. c (Wel 20:12; 2 Samwil 11:2-4; Jugalatia 2:11-14) Bende, gikabu ngo giragora m’unyutho pi pokolembe m’ubino iwi thek mi Juyahudi pi koso woro migi man bende giragora m’ugolo tok ponji mi dhanu. (Hoseya 4:2; Malaki 2:8, 9; Matayo 23:8, 9; 1 Yohana 5:21) Kite ma giloko ko lembe maeno tap tap unyutho nia gitie dhanu ma jugeno man nia gitie ku woro ma lee i kum Lembe pa Mungu.

•   Nyo etie ngo lembe ma kakare nia Mungu ma ku kwong’a uyuyo iwi Biblia, udog ugwoke bende kara kud juwil lembe m’i iye? d (Isaya 40:8; 1 Pethro 1:24, 25) Lembe mange utie nia eketho jukiewe pi nimiyo bero ni dhanu ma con kende ngo, ento iwa bende tin. (1 Jukorintho 10:11) I andha, “gin ceke m’ukiewere yang’ con i Lembagora ukiewere pi ponji mwa, kara ni kum cirocir mwa man jukojuk ma wanwang’u i Lembagora, wabed ku genogen.”​—Jurumi 15:4.

•   Yesu ku julub pare gibed gitiyo ku Lembagora mi Juebrania ma judog jukiewo kendo, m’umbe nidieng’ ka nyo lembe m’i iye urombo tap tap ku ma con.​—Luka 4:16-21; Tic mi Jukwenda 17:1-3.