Yesu ubodho dhanu ma gigwoko bedoleng’ migi kinde m’ethiero kwo pare ni lam mi jamgony. (Matayo 20:28) Pieno, Biblia ulwong’o Yesu nia “Jalar mi ng’om.” (1 Yohana 4:14) Emedo bende kumae: ‘Ni kum ng’atu mange both umbe; kum nying’ mange mbe i the polo, ma jumio i kind dhanu, ma wakoboth ko be ni kume.’​—Tic mi Jukwenda 4:12.

 Yesu ‘ubilo tho pi dhanu ceke’ ma giketho yioyic migi i ie. (Juebrania 2:9; Yohana 3:16) I ng’eye, “Mungu ketho ecer ku kind ju m’utho,” man Yesu udok i polo calu giracwia mi tipo. (Tic mi Jukwenda 3:15) Kud i polo, ecopo ‘bodho magwei ju ma gibecoro ceng’ini i vut Mungu nikadhu kud i bang’e, kum ebedo mi nja kara ekwai pigi.’​—Juebrania 7:25.

Pirang’o watie ku yeny ma nia Yesu ukwai piwa?

 Wan ceke wajudubo. (Jurumi 3:23) Dubo upoko kindwa ku Mungu man ekelo tho. (Jurumi 6:23) Ento Yesu utie “Jakwac” pi ju ma gitie ku yioyic i lam mi jamgony. (1 Yohana 2:1) Ekwayu pigi i bang’ Mungu m’ebepenje ko nia ewinj rwo migi man ewek dubo migi iwi ukungu mi lam m’ethiero. (Matayo 1:21; Jurumi 8:34) Mungu dwoko wang’ kwac maeno ma Yesu ubekwaye ko, ni kum etie lembe m’urombo ku yeny pare. Mungu uoro Yesu i ng’om “kara ng’om uboth ni kume.”​—Yohana 3:17

Nyo niyio Yesu kende ci uromo pi ninwang’u both?

 Ungo. Kadok nwang’u wacikara nibedo ku yioyic i Yesu pi ninwang’u both de, re lembe mange ubekwayere. (Tic mi Jukwenda 16:30, 31) Biblia uwacu kumae: ‘Calu kum [m’umbe] ku tipo en e avu, kumeno cil yioyic de [m’umbe’] ku tic en e avu.’ (Yakobo 2:26) Kara wabothi, wacikara:

•   Niponjo lembe iwi Yesu man iwi Won ma Yehova.​—Yohana 17:3.

•   Nibedo ku yioyic i igi.​—Yohana 12:44; 14:1.

•   Ninyutho yoyicne nikadhu i woro ma waworo ko cik migi. (Luka 6:46; 1 Yohana 2:17) Yesu uponjo nia tie ngo dhanu ceke ma gilwong’o nia “Rwoth” re ma biboth ento kende kende ju “m’utimo yeny ma [Won] ma i polo.”​—Matayo 7:21.

•   Wamedara ninyutho yioyic mwa kadok wanwang’ara i wang’ lembe ma tek. Yesu unyutho lembuno terere kinde m’ewacu kumae: “Ng’atu ma biciro cil i kajikne, ng’atuno biboth.”​—Matayo 24:13.