1. ይሖዋ ከሕዝቡ ጋር በተያያዘ ምን ያስተውላል?

ይሖዋ አምላክ “በሕዝቡ ደስ ይሰኛል።” (መዝ. 149:4) ይህ ምንኛ የሚያስደስት ነው! ይሖዋ ያሉንን መልካም ባሕርያት ያስተውላል፤ ምን ዓይነት ሰዎች መሆን እንደምንችል ያውቃል፤ እንዲሁም ወደ ራሱ ይስበናል። ምንጊዜም ለእሱ ታማኝ ከሆንን ለዘላለም ወዳጃችን ይሆናል!—ዮሐ. 6:44

2. አንዳንዶች ይሖዋ እንደሚወዳቸው ማመን የሚከብዳቸው ለምንድን ነው?

² አንዳንዶች ‘ይሖዋ ሕዝቡን በቡድን ደረጃ እንደሚወድ አውቃለሁ፤ ሆኖም እኔን በግለሰብ ደረጃ ከፍ አድርጎ እንደሚመለከተኝ እንዴት እርግጠኛ መሆን እችላለሁ?’ ብለው ያስቡ ይሆናል። እነዚህ ሰዎች እንዲህ እንዲሰማቸው የሚያደርገው ምን ሊሆን ይችላል? በልጅነቷ ብዙ መከራ ያሳለፈችው ኦክሳና * እንዲህ ብላለች፦ “በተጠመቅኩበትና አቅኚነት በጀመርኩበት ወቅት ደስተኛ ነበርኩ። ከ15 ዓመት በኋላ ግን በልጅነቴ ያጋጠመኝ መጥፎ ነገር ወደ አእምሮዬ እየመጣ ያሠቃየኝ ጀመር። በመሆኑም የይሖዋን ሞገስ እንዳጣሁና እሱ ሊወደኝ እንደማይችል ተሰማኝ።” ዩዋ የተባለችው አቅኚም በልጅነቷ ብዙ ችግሮች አጋጥመዋታል፤ እንዲህ ብላለች፦ “ይሖዋን ማስደሰት ስለፈለግኩ ሕይወቴን ለእሱ ወሰንኩ። ይሁንና ይሖዋ መቼም ቢሆን ሊወደኝ እንደማይችል ይሰማኝ ነበር።”

3. በዚህ ርዕስ ውስጥ ምን እንመለከታለን?

³ ቀደም ሲል እንደተጠቀሱት ታማኝ ክርስቲያኖች ሁሉ አንተም ይሖዋን ከልብህ ብትወደውም እሱ የሚወድህ መሆኑን ትጠራጠር ይሆናል። ይሁንና ይሖዋ ከልቡ እንደሚያስብልህ እርግጠኛ መሆን ያለብህ ለምንድን ነው? እንዲሁም ‘ይሖዋ አይወደኝም’ የሚል ስሜት ሲሰማህ ምን ሊረዳህ ይችላል? የእነዚህን ጥያቄዎች መልስ እስቲ እንመልከት።

4. ይሖዋ የሚወደን መሆኑን መጠራጠር አደገኛ የሆነው ለምንድን ነው?

⁴ ፍቅር ለሥራ የማነሳሳት ከፍተኛ ኃይል አለው። ይሖዋ እንደሚወደንና  እንደሚደግፈን እርግጠኞች ከሆንን በሕይወታችን ውስጥ ችግሮች ቢያጋጥሙንም እንኳ እሱን በሙሉ ልባችን ለማገልገል እንገፋፋለን። በሌላ በኩል ግን፣ አምላክ የሚያስብልን መሆኑን ከተጠራጠርን ‘ጉልበታችን እጅግ ይዳከማል።’ (ምሳሌ 24:10) ከዚህም ሌላ ተስፋ ከቆረጥንና ይሖዋ እንደማይወደን ከተሰማን ለሰይጣን ጥቃቶች ተጋላጭ እንሆናለን።—ኤፌ. 6:16

5. አንዳንዶች ይሖዋ የሚወዳቸው መሆኑን በመጠራጠራቸው ምን ደርሶባቸዋል?

⁵ በዘመናችን ያሉ አንዳንድ ታማኝ ክርስቲያኖች ይሖዋ የሚወዳቸው መሆኑን በመጠራጠራቸው ምክንያት በመንፈሳዊ ተዳክመዋል። ጄምስ የተባለ የጉባኤ ሽማግሌ እንዲህ ብሏል፦ “በቤቴል እንዲሁም በውጭ አገር ቋንቋ በሚመራ ጉባኤ ውስጥ አገለግላለሁ፤ ያም ቢሆን ይሖዋ የማቀርበውን መሥዋዕት የሚቀበል መሆኑን እጠራጠር ነበር። እንዲያውም በአንድ ወቅት ይሖዋ ጸሎቴን የሚሰማ መሆኑን እንኳ እስከ መጠራጠር ደርሼ ነበር።” የሙሉ ጊዜ አገልጋይ የሆነችው ኤቫም እንዲህ ብላለች፦ “ይሖዋ እንደሚወደን መጠራጠር በጣም አደገኛ መሆኑን ተገንዝቤያለሁ፤ ምክንያቱም ይህ ስሜት ከአገልግሎታችን ጋር በተያያዘ ሁሉን ነገር ይነካብናል። ለመንፈሳዊ ነገሮች ያለንን ፍላጎትና ይሖዋን በማገልገል የምናገኘውን ደስታ ይቀንሰዋል።” የዘወትር አቅኚና የጉባኤ ሽማግሌ ሆኖ የሚያገለግለው ማይክል ደግሞ እንዲህ ብሏል፦ “ይሖዋ እንደሚያስብላችሁ ካላመናችሁ ቀስ በቀስ ከእሱ እየራቃችሁ ትሄዳላችሁ።”

6. አምላክ የሚወደን መሆኑን መጠራጠር ብንጀምር ምን ማድረግ ይኖርብናል?

⁶ እነዚህ ተሞክሮዎች ይሖዋ የሚወደን መሆኑን መጠራጠር መንፈሳዊነታችንን ምን ያህል ሊጎዳው እንደሚችል ያሳያሉ። ይሁንና አምላክ የሚወደን መሆኑን መጠራጠር ብንጀምር ምን ማድረግ ይኖርብናል? እንዲህ ያለውን ሐሳብ ወዲያውኑ ከአእምሯችን ልናወጣው ይገባል። ይሖዋ እንዲህ ያለውን ‘እረፍት የሚነሳ ሐሳብ’ እንዲያስወግድልህ እንዲሁም ‘ልብህንና አእምሮህን የሚጠብቅልህን የአምላክ ሰላም’ እንዲሰጥህ ልትጠይቀው ትችላለህ። (መዝ. 139:23 ግርጌ፤ ፊልጵ. 4:6, 7) በተጨማሪም እንዲህ የሚሰማህ አንተ ብቻ እንዳልሆንክ አስታውስ። ሌሎች ታማኝ ወንድሞችና እህቶችም ከአሉታዊ ስሜቶች ጋር ይታገላሉ። በጥንት ዘመን የኖሩ የይሖዋ አገልጋዮችም እንኳ እንዲህ ካሉ ስሜቶች ጋር መታገል አስፈልጓቸው ነበር። ከሐዋርያው ጳውሎስ ምሳሌ ምን ትምህርት እንደምናገኝ እስቲ እንመልከት።

7. ጳውሎስ የትኞቹ ችግሮች አጋጥመውታል?

⁷ ብዙ ኃላፊነቶች እንደተደራረቡብህና ሁሉንም በተገቢው መልኩ ማከናወን እንደተሳነህ ተሰምቶህ ያውቃል?  ከሆነ የጳውሎስ ስሜት ይገባሃል። ጳውሎስን ያስጨንቀው የነበረው የአንድ ጉባኤ ብቻ ሳይሆን “የጉባኤዎች ሁሉ ሐሳብ” ነበር። (2 ቆሮ. 11:23-28) ያጋጠመህ ከባድ የጤና እክል ደስታህን አሳጥቶሃል? ጳውሎስ ‘ሥጋውን የሚወጋ እሾህ’ ለረጅም ጊዜ አሠቃይቶት ነበር፤ ጳውሎስ ‘እሾህ’ ያለው ያጋጠመውን የጤና እክል ሊሆን ይችላል፤ ከዚህ መከራ ለመገላገል ይጓጓ ነበር። (2 ቆሮ. 12:7-10) ከአለፍጽምናህ ጋር የምታደርገው ትግል ተስፋ አስቆርጦሃል? ጳውሎስም እንዲህ የተሰማው ጊዜ ነበር። ከአለፍጽምናው ጋር በሚያደርገው የማያባራ ትግል የተነሳ “ምንኛ ጎስቋላ ሰው ነኝ” ብሏል።—ሮም 7:21-24

8. ጳውሎስ ያጋጠሙትን ችግሮች እንዲቋቋም የረዳው ምንድን ነው?

⁸ ጳውሎስ የተለያዩ ፈተናዎችና ተስፋ አስቆራጭ ሁኔታዎች ቢያጋጥሙትም ይሖዋን ማገልገሉን ቀጥሏል። ይህን ለማድረግ የሚያስችል ብርታት ያገኘው እንዴት ነው? ከአለፍጽምናው ጋር መታገል ቢኖርበትም በቤዛው ላይ የማይናወጥ እምነት ነበረው። በተጨማሪም ኢየሱስ ‘በእሱ የሚያምን ሁሉ የዘላለም ሕይወት እንደሚኖረው’ የገባውን ቃል ያውቅ ነበር። (ዮሐ. 3:16፤ ሮም 6:23) በቤዛው “የሚያምን ሁሉ” ከተባሉት መካከል ጳውሎስም እንደሚገኝበት ምንም ጥያቄ የለውም። ይሖዋ፣ ንስሐ እስከገቡ ድረስ ከባድ ኃጢአት የፈጸሙ ሰዎችንም ጭምር ይቅር ለማለት ፈቃደኛ እንደሆነ ጳውሎስ እርግጠኛ ነበር።—መዝ. 86:5

9. ጳውሎስ በገላትያ 2:20 ላይ ከተናገረው ሐሳብ ምን ትምህርት እናገኛለን?

⁹ ጳውሎስ፣ አምላክ ክርስቶስን ቤዛ አድርጎ መስጠቱ ለእሱ ታላቅ ፍቅር ያለው መሆኑን እንደሚያሳይ ያምን ነበር። (ገላትያ 2:20⁠ን አንብብ።) በገላትያ 2:20 መጨረሻ ላይ የሚገኘውን የሚያጽናና ሐሳብ ልብ በል። ጳውሎስ “በወደደኝና ለእኔ ሲል ራሱን አሳልፎ በሰጠው በአምላክ ልጅ ላይ እምነት አለኝ” ብሏል። ጳውሎስ፣ አምላክ ሊወደው እንደማይችል አልተሰማውም። ‘አምላክ ወንድሞቼን ሊወዳቸው እንደሚችል ይገባኛል፤ እኔን ግን ጨርሶ ሊወደኝ አይችልም’ የሚል አመለካከት አልነበረውም። ጳውሎስ ለሮም ክርስቲያኖች “አምላክ ገና ኃጢአተኞች ሳለን ክርስቶስ እንዲሞትልን በማድረግ ለእኛ ያለውን የራሱን ፍቅር አሳይቷል” ብሏቸዋል። (ሮም 5:8) በእርግጥም የአምላክን ፍቅር ሊገድበው የሚችል ምንም ነገር የለም!

10. ከሮም 8:38, 39 ምን እንማራለን?

¹⁰ ሮም 8:38, 39⁠ን አንብብ። ጳውሎስ፣ አምላክ ለእሱ ጥልቅ ፍቅር እንዳለው ሙሉ በሙሉ እርግጠኛ ነበር። ‘ምንም ነገር ከአምላክ ፍቅር ሊለየን አይችልም’ በማለት ጽፏል። ጳውሎስ፣ ይሖዋ እስራኤላውያንን ምን ያህል በትዕግሥት እንደያዛቸው ያውቅ ነበር። ይሖዋ ለእሱ  ምሕረት ያሳየው እንዴት እንደሆነም ያውቃል። ጳውሎስ እንዲህ ብሎ የተናገረ ያህል ነው፦ ‘ይሖዋ የገዛ ልጁ እንኳ ለእኔ ሲል እንዲሞት ካደረገ እንደሚወደኝ የምጠራጠርበት ምን ምክንያት ይኖራል?’—ሮም 8:32

11. ጳውሎስ በ1 ጢሞቴዎስ 1:12-15 ላይ እንደተጠቀሱት ያሉ ኃጢአቶችን ፈጽሞ የነበረ ቢሆንም አምላክ እንደሚወደው እርግጠኛ ሊሆን የቻለው እንዴት ነው?

¹¹ አንደኛ ጢሞቴዎስ 1:12-15⁠ን አንብብ። ጳውሎስ ክርስቲያን ከመሆኑ በፊት ባደረጋቸው ነገሮች የተነሳ አንዳንድ ጊዜ በጥፋተኝነት ስሜት ተውጦ መሆን አለበት። “ከኃጢአተኞች . . . ዋነኛ ነኝ” በማለት ተናግሯል፤ ደግሞም እንዲህ የተሰማው መሆኑ አያስገርምም። ጳውሎስ እውነትን ከማወቁ በፊት ከአንድ ከተማ ወደ ሌላ ከተማ እየሄደ ክርስቲያኖችን ያሳድድ ነበር። ብዙዎችን ወህኒ ቤት አስገብቷል፤ አንዳንዶች ደግሞ እንዲገደሉ የድጋፍ ድምፅ ሰጥቷል። (ሥራ 26:10, 11) ጳውሎስ፣ በእሱ ምክንያት ወላጆቹ ከተገደሉበት አንድ ወጣት ክርስቲያን ጋር ቢገናኝ ምን ሊሰማው እንደሚችል እስቲ አስበው። ጳውሎስ በሠራቸው ስህተቶች ተጸጽቷል፤ ሆኖም ያለፈውን ነገር መቀየር እንደማይችል ያውቅ ነበር። ክርስቶስ ለእሱ ሲል እንደሞተ የተቀበለ ሲሆን “አሁን የሆንኩትን ለመሆን የበቃሁት በአምላክ ጸጋ ነው” በማለት በልበ ሙሉነት ጽፏል። (1 ቆሮ. 15:3, 10) እኛስ ከዚህ ምን ትምህርት እናገኛለን? ክርስቶስ ለአንተ ሲል እንደሞተና ከይሖዋ ጋር የቀረበ ዝምድና የመመሥረት አጋጣሚ እንደከፈተልህ አምነህ ተቀበል። (ሥራ 3:19) የይሖዋ ምሥክሮች ከመሆናችን በፊትም ሆነ በኋላ አንዳንድ ስህተቶችን እንደሠራን የታወቀ ነው፤ ያም ቢሆን አምላክ ትኩረት የሚያደርገው አሁን እና ወደፊት በምናከናውናቸው ነገሮች ላይ እንጂ ቀደም ሲል በሠራናቸው ስህተቶች ላይ አይደለም።—ኢሳ. 1:18

12. እንደማንረባ ወይም ማንም ሊወደን እንደማይችል ሲሰማን በ1 ዮሐንስ 3:19, 20 ላይ ያለው ሐሳብ የሚረዳን እንዴት ነው?

¹² ኢየሱስ ኃጢአትህን ለማስተሰረይ ሲል እንደሞተ ስታስብ ‘እኔ እንዲህ ያለ ክብር የሚገባኝ ሰው አይደለሁም’ የሚል ስሜት ይፈጠርብህ ይሆናል። እንዲህ  የሚሰማህ ለምን ሊሆን ይችላል? ፍጹም ያልሆነው ልባችን እንደማንረባና ማንም ሊወደን እንደማይችል እንድናስብ በማድረግ ሊያታልለን ይችላል። (1 ዮሐንስ 3:19, 20⁠ን አንብብ።) እንዲህ ያለ ስሜት ሲፈጠርብን “አምላክ ከልባችን ይልቅ ታላቅ” እንደሆነ ማስታወስ ይኖርብናል። የሰማዩ አባታችን ፍቅርና ምሕረት፣ በልባችን ውስጥ ሊያድር ከሚችለው ከየትኛውም አሉታዊ ስሜት የበለጠ ኃይል አለው። ይሖዋ ለእኛ ያለውን አመለካከት ለመቀበል ጥረት ማድረግ ይኖርብናል። ለዚህ እንዲረዳን አዘውትረን ቃሉን ማንበብ፣ ወደ እሱ መጸለይ እንዲሁም ከታማኝ ሕዝቦቹ ጋር መቀራረብ ያስፈልገናል። እነዚህን ነገሮች ማድረጋችን በጣም አስፈላጊ የሆነው ለምንድን ነው?

13. የአምላክን ቃል ማጥናታችን የሚረዳን እንዴት ነው? (“ የአምላክ ቃል የረዳቸው እንዴት ነው?” የሚለውን ሣጥንም ተመልከት።)

¹³ የአምላክን ቃል በየዕለቱ አጥና፤ እንዲህ ማድረግህ የይሖዋ ግሩም ባሕርያት ይበልጥ ግልጽ ሆነው እንዲታዩህ ያደርጋል። እሱ ምን ያህል እንደሚወድህ ትገነዘባለህ። በየቀኑ በአምላክ ቃል ላይ ማሰላሰልህ አስተሳሰብህንና ምኞቶችህን “ለማቅናት” ስለሚረዳህ ትክክለኛ አመለካከት እንዲኖርህ ያደርጋል። (2 ጢሞ. 3:16) ‘አልረባም’ ከሚል ስሜት ጋር የሚታገል ኬቨን የተባለ የጉባኤ ሽማግሌ እንዲህ ብሏል፦ “መዝሙር 103⁠ን ማንበቤና ማሰላሰሌ አመለካከቴን ለማስተካከልና ይሖዋ ለእኔ ያለውን እውነተኛ ስሜት ለመረዳት አስችሎኛል።” ቀደም ሲል የተጠቀሰችው ኤቫም እንዲህ ብላለች፦ “ሁልጊዜ ምሽት ላይ ጸጥ ያለ ቦታ ላይ ሆኜ ይሖዋ ከፍ አድርጎ ስለሚመለከታቸው ነገሮች አሰላስላለሁ። እንዲህ ማድረጌ ውስጣዊ ሰላም እንዳገኝና እምነቴ እንዲጠናከር ይረዳኛል።”

14. ጸሎት የሚረዳን እንዴት ነው?

¹⁴ አዘውትረህ ጸልይ። (1 ተሰ. 5:17) ከአንድ ሰው ጋር ጠንካራ ወዳጅነት እንዲኖረን ከፈለግን አዘውትረን ልባዊ የሐሳብ ልውውጥ ማድረግ ይኖርብናል። ከይሖዋ ጋር ካለን ወዳጅነት ጋር በተያያዘም ሁኔታው ተመሳሳይ ነው። ለይሖዋ ስሜታችንን፣ ሐሳባችንንና ጭንቀታችንን አውጥተን በጸሎት ስንነግረው በእሱ እንደምንተማመን እንዲሁም እንደሚወደን እርግጠኞች እንደሆንን እናሳያለን። (መዝ. 94:17-19፤ 1 ዮሐ. 5:14, 15) ቀደም ሲል የተጠቀሰችው ዩዋ እንዲህ ብላለች፦ “ወደ ይሖዋ ስጸልይ በቀኑ ውስጥ ያጋጠሙኝን ነገሮች በመጥቀስ ብቻ ላለመወሰን ጥረት አደርጋለሁ። ለይሖዋ የልቤን አውጥቼ በማፍሰስ እውነተኛ ስሜቴን እነግረዋለሁ። ይሖዋን እንደ አንድ መሥሪያ ቤት ሥራ አስኪያጅ ሳይሆን ልጆቹን ከልቡ እንደሚወድ አባት መመልከት ጀምሬያለሁ።”—“ አንብባችሁታል?” የሚለውን ሣጥን ተመልከት።

15. ይሖዋ በግለሰብ ደረጃ አሳቢነት የሚያሳየን እንዴት ነው?

¹⁵ ከታማኝ ወዳጆችህ ጋር ተቀራረብ፤ እነሱ ከይሖዋ ያገኘሃቸው ውድ ስጦታዎች ናቸው። (ያዕ. 1:17) የሰማዩ አባታችን “ምንጊዜም አፍቃሪ” የሆኑ ወንድሞችና እህቶች በመስጠት በግለሰብ ደረጃ አሳቢነት ያሳየናል። (ምሳሌ 17:17) ጳውሎስ ለቆላስይስ ክርስቲያኖች በጻፈው ደብዳቤ ላይ፣ ድጋፍ ስላደረጉለት ክርስቲያኖች  ሲናገር “በእጅጉ አጽናንተውኛል” ብሏል። (ቆላ. 4:10, 11 ግርጌ) ክርስቶስ ኢየሱስም እንኳ የወዳጆቹ እርዳታ አስፈልጎታል፤ በመሆኑም መላእክትና ሰዎች ላደረጉለት እርዳታ አመስጋኝ ነበር።—ሉቃስ 22:28, 43

16. ታማኝ ወዳጆች ወደ ይሖዋ ይበልጥ ለመቅረብ የሚረዱን እንዴት ነው?

¹⁶ ከይሖዋ ያገኘሃቸው ታማኝ ወዳጆች ከሚሰጡህ እርዳታ የተሟላ ጥቅም እያገኘህ ነው? ለአንድ የጎለመሰ ወዳጃችን ጭንቀታችንን አውጥተን ማካፈላችን የድክመት ምልክት አይደለም፤ ከዚህ ይልቅ ጥበቃ ይሆንልናል። ቀደም ሲል የተጠቀሰው ጄምስ ምን እንዳለ ልብ በል፦ “በመንፈሳዊ ከጎለመሱ ክርስቲያኖች ጋር ጥሩ ወዳጅነት መመሥረቴ በጣም ጠቅሞኛል። በአሉታዊ ስሜቶች ስዋጥ እነዚህ ውድ ወዳጆቼ በትዕግሥት ያዳምጡኛል፤ እንዲሁም እንደሚወዱኝ ይገልጹልኛል። ከእነሱ ያገኘሁት እርዳታ ይሖዋ በግለሰብ ደረጃ እንደሚወደኝና እንደሚያስብልኝ አስገንዝቦኛል።” ከወንድሞቻችንና ከእህቶቻችን ጋር የጠበቀ ወዳጅነት መመሥረታችንና ወዳጅነታችንን ይዘን መቀጠላችን ምንኛ አስፈላጊ ነው!

17-18. መስማት ያለብን ማንን ነው? ለምንስ?

¹⁷ ሰይጣን ትክክል የሆነውን ነገር ለማድረግ መታገላችንን እንድናቆም ይፈልጋል። ሰይጣን ይሖዋ እንደማይወደንና መዳን እንደማይገባን እንዲሰማን ይፈልጋል። ሆኖም እስካሁን እንደተመለከትነው ይህ ጨርሶ ከእውነታው የራቀ ሐሳብ ነው።

¹⁸ ይሖዋ ይወድሃል። በእሱ ፊት ትልቅ ዋጋ አለህ። እሱን ከታዘዝከው፣ ልክ እንደ ኢየሱስ ለዘላለም ‘በፍቅሩ መኖር’ ትችላለህ። (ዮሐ. 15:10) እንግዲያው ሰይጣንንም ሆነ የሚኮንንህን ልብህን አትስማ። ከዚህ ይልቅ፣ በእያንዳንዳችን ውስጥ ያለውን መልካም ነገር የሚያየው ይሖዋ የሚልህን ስማ። ይሖዋ አንተን ጨምሮ ‘በሕዝቡ ደስ እንደሚሰኝ’ እርግጠኛ ሁን!