በመዝሙር 12:7 ላይ “ትጋርዳቸዋለህ” የተባሉት በቁጥር 5 ላይ የተጠቀሱት ‘የተጎሳቆሉ ሰዎች’ ናቸው ወይስ በቁጥር 6 ላይ የተጠቀሱት የይሖዋ “ቃላት” (የ1954 ትርጉም)?

አውዱ እንደሚጠቁመው ጥቅሱ የሚናገረው ስለ ሰዎች ነው።

መዝሙር 12:1-4 “ከሰው ልጆች መካከል ታማኞች ጠፍተዋል” የሚል ሐሳብ ይዟል። ቀጥሎም መዝሙር 12:5-7 እንዲህ ይላል፦

ቁጥር 5 አምላክ ለተጨቆኑ ሰዎች ምን እንደሚያደርግላቸው ይናገራል፤ ያድናቸዋል።

ቁጥር 6 ደግሞ ‘የይሖዋ ቃል እንደተጣራ ብር የጠራ እንደሆነ’ ይናገራል። ቀናተኛ የሆኑ ክርስቲያኖች የዳዊትን ስሜት ሙሉ በሙሉ ይጋራሉ።—መዝ. 18:30፤ 119:140

አሁን ደግሞ ቀጣዩን ቁጥር ማለትም መዝሙር 12:7⁠ን እንመልከት፤ “ይሖዋ ሆይ፣ አንተ ትጋርዳቸዋለህ፤ እያንዳንዳቸውን ከዚህ ትውልድ ለዘላለም ትጠብቃቸዋለህ” ይላል። ይህ ጥቅስ የሚናገረው ስለ እነማን ነው?

ከዚህ በፊት ያለው ጥቅስ የሚናገረው ስለ ይሖዋ ቃል ስለሆነ አንዳንድ ሰዎች ይሖዋ ‘የሚጋርደው’ ቃሉን ነው የሚል መደምደሚያ ላይ ሊደርሱ ይችላሉ። እውነት ነው፣ ተቃዋሚዎች መጽሐፍ ቅዱስን ለማገድም ሆነ ለማጥፋት ጥረት ቢያደርጉም ይሖዋ ጥበቃ አድርጎለታል።—ኢሳ. 40:8፤ 1 ጴጥ. 1:25

ሆኖም በቁጥር 5 ላይ የተጠቀሰው ሐሳብም እውነት እንደሆነ እናውቃለን። ከዚህ ቀደም ይሖዋ ለተጎሳቆሉና ለተጨቆኑ ሰዎች እርዳታ አድርጓል እንዲሁም ታድጓቸዋል፤ ወደፊትም እንዲሁ ያደርጋል።—ኢዮብ 36:15፤ መዝ. 6:4፤ 31:1, 2፤ 54:7፤ 145:20

ታዲያ ቁጥር 7 የሚናገረው ስለ እነማን ነው?

የመዝሙሩ አጠቃላይ ይዘት እንደሚጠቁመው ቁጥር 7 የሚናገረው ስለ ሰዎች ነው።

መዝሙር 12:1 ክፉዎች ስለሚዋሿቸው “ታማኞች” ሁኔታ ይናገራል። ቀጥሎም ይሖዋ አምላክ አንደበታቸውን አላግባብ በሚጠቀሙ ሰዎች ላይ እርምጃ እንደሚወስድ የሚጠቁም ሐሳብ እናገኛለን። ይህ መዝሙር የይሖዋ ቃል የጠራ ስለሆነ እሱ ለሕዝቦቹ ሲል እርምጃ እንደሚወስድ መተማመን እንደምንችል ዋስትና ይሰጠናል።

ስለዚህ ቁጥር 7 የሚናገረው ክፉዎች ያጎሳቆሏቸውን ሰዎች ይሖዋ እንደሚጋርዳቸውና እንደሚጠብቃቸው ነው።

ይህ ጥቅስ “ትጋርዳቸዋለህ” እንዲሁም “ትጠብቃቸዋለህ” ተብሎ የተተረጎመው ጥንታዊውን የማሶሬቶች የዕብራይስጥ ጽሑፍ መሠረት በማድረግ ነው። የግሪክኛው ሰብዓ ሊቃናት ቁጥር 7 ላይ “ትጋርደናለህ” እንዲሁም “ትጠብቀናለህ” የሚሉ ቃላትን ይጠቀማል፤ ይህም ጥቅሱ የሚናገረው ስለተጨቆኑና ስለተጎሳቆሉ ታማኝ ሰዎች መሆኑን ይጠቁማል። በመጨረሻም፣ ቁጥር 7 “እያንዳንዳቸውን ከዚህ ትውልድ ለዘላለም ትጠብቃቸዋለህ” ይላል፤ ይህም ታማኞች ብልሹ ምግባርን ከሚያስፋፉ ሰዎች ጥበቃ እንደሚያገኙ ያመለክታል። (መዝ. 12:7, 8) በአረማይኩ ታርገም ላይ ቁጥር 7 የተተረጎመው እንዲህ ተብሎ ነው፦ “ጌታ ሆይ፣ አንተ ጻድቃንን ትጠብቃለህ፤ ከዚህ ክፉ ትውልድ ለዘላለም ትጋርዳቸዋለህ።” ይህም መዝሙር 12:7 የሚናገረው ስለ አምላክ ቃላት እንዳልሆነ የሚያሳይ ተጨማሪ ማስረጃ ነው።

ስለዚህ ይህ ጥቅስ፣ አምላክ ለታማኝ ሰዎች ሲል እርምጃ እንደሚወስድ ተስፋ የሚሰጥ ነው።