አምላክ ሐሳቡን ለሰው ልጆች ገልጿል። ሐሳቡን በመጽሐፍ ቅዱስ ጸሐፊዎች አእምሮ ውስጥ ለማስቀመጥ መንፈስ ቅዱስን ወይም በሥራ ላይ ያለው ኃይሉን ተጠቅሟል። (2 ጴጥሮስ 1:20, 21) መጽሐፍ ቅዱስን በማንበብ ስለ አምላክ እውነቱን ማወቅ እንችላለን።—ዮሐንስ 17:17ን እና 2 ጢሞቴዎስ 3:16ን አንብብ።

በመጽሐፍ ቅዱስ ውስጥ አምላክ ስለ ራሱ ብዙ ነገር ገልጾልናል። ሰዎችን የፈጠረው ለምን እንደሆነ፣ ወደፊት ለሰው ልጆች ምን እንደሚያደርግላቸው እንዲሁም ምን ዓይነት ሕይወት እንድንመራ እንደሚፈልግ አሳውቆናል። (የሐዋርያት ሥራ 17:24-27) ይሖዋ አምላክ ስለ እሱ እውነቱን እንድናውቅ ይፈልጋል።—1 ጢሞቴዎስ 2:3, 4ን አንብብ።

ይሖዋ የእውነት አምላክ ነው፤ ደግሞም ለሰው ልጆች እውነትን እንዲያስተምር ልጁን ኢየሱስን ወደ ምድር ልኮታል። በመሆኑም እውነትን የሚወዱ ሰዎች የኢየሱስን ትምህርት ይቀበላሉ። (ዮሐንስ 18:37) አምላክ እንዲህ ያሉ ሰዎች እሱን እንዲያመልኩት ይፈልጋል።—ዮሐንስ 4:23, 24ን አንብብ።

ሰይጣን ዲያብሎስ አምላክን በተመለከተ የሐሰት ትምህርቶች በማስፋፋት ብዙ ሰዎች አምላክን እንዳያውቁ አድርጓል። (2 ቆሮንቶስ 4:3, 4) መልካም የሆነውን ነገር የማይወዱ ሰዎች እንዲህ ላሉ የሐሰት ትምህርቶች ጆሮ ይሰጣሉ። (ሮም 1:25) ሆኖም በሚሊዮን የሚቆጠሩ ቅን ልብ ያላቸው ሰዎች መጽሐፍ ቅዱስን በማጥናት ስለ አምላክ እውነቱን እየተማሩ ነው።—የሐዋርያት ሥራ 17:11ን አንብብ።