ፈሪሃ አምላክ ያላቸው ወላጆች ልጆቻቸው ይሖዋን በታማኝነት ሲያገለግሉ ለማየት ይጓጓሉ። ወላጆች ይህን ምኞታቸውን ማሳካት የሚችሉት ልጆቻቸው ጨቅላ ከሆኑበት ጊዜ አንስቶ በልባቸው ውስጥ የመጽሐፍ ቅዱስን ትምህርቶች በመቅረጽ ነው። (ዘዳ 6:7፤ ምሳሌ 22:6) ይህ ከፍተኛ መሥዋዕትነት እንደሚጠይቅ ምንም ጥርጥር የለውም! ሆኖም እንዲህ በማድረጋቸው የሚያገኙት ወሮታ በጣም የሚክስ ነው።—3ዮሐ 4

ወላጆች ከዮሴፍና ከማርያም ብዙ ትምህርት ማግኘት ይችላሉ። ዮሴፍና ማርያም “በየዓመቱ ለፋሲካ በዓል ወደ ኢየሩሳሌም የመሄድ ልማድ ነበራቸው”፤ ይህ አድካሚና ብዙ ወጪ የሚጠይቅ ነገር ቢሆንም እንዲህ ከማድረግ ወደኋላ አላሉም። (ሉቃስ 2:41) ለቤተሰባቸው መንፈሳዊነት ቅድሚያ ይሰጡ እንደነበር በግልጽ መረዳት ይቻላል። በዛሬው ጊዜ ያሉ ወላጆችም ባገኙት አጋጣሚ ሁሉ ተጠቅመው በቃል በማስተማርም ሆነ ምሳሌ ሆነው በመገኘት ልጆቻቸውን በትክክለኛው አቅጣጫ እንዲጓዙ ሊመሯቸው ይችላሉ።—መዝ 127:3-5

ያገኙትን አጋጣሚ ተጠቅመውበታል የሚለውን ቪዲዮ ተመልከት፤ ከዚያም የሚከተሉትን ጥያቄዎች ለመመለስ ሞክር፦

• ጆን እና ሻረን ልጆቻቸውን በሚያሳድጉበት ጊዜ ከመንግሥቱ ጋር ለተያያዙ ጉዳዮች ቅድሚያ መስጠት የቻሉት እንዴት ነው?

• ወላጆች ለእያንዳንዱ ልጅ ተግሣጽ የሚሰጡበት መንገድ የተለያየ መሆን ያለበት ለምንድን ነው?

• ወላጆች ልጆቻቸው የእምነት ፈተናዎችን እንዲቋቋሙ መርዳት የሚችሉት እንዴት ነው?

• ልጆቻችሁ መንፈሳዊ እድገት እንዲያደርጉ ለመርዳት በይሖዋ ድርጅት የተዘጋጁትን የትኞቹን መሣሪያዎች ተጠቅማችኋል?