አስፈላጊ የሆነው ለምንድን ነው? በአምላክ ቃል ላይ የምናደርገው የግል ጥናት የእውነት “ስፋቱ፣ ርዝመቱ፣ ከፍታውና ጥልቀቱ ምን ያህል እንደሆነ” በሚገባ ለመረዳት ያስችለናል። (ኤፌ 3:18) በተጨማሪም በዚህ ክፉ ዓለም ውስጥ እንከንና እድፍ የሌለብን ሆነን እንድንኖር እንዲሁም ‘የሕይወትን ቃል አጥብቀን መያዝ’ እንድንችል ይረዳናል። (ፊልጵ 2:15, 16) የግል ጥናት፣ በግለሰብ ደረጃ የሚያስፈልገንን ትምህርት መርጠን ለማጥናት አጋጣሚ ይሰጠናል። የአምላክን ቃል በማንበብና በማጥናት ከምናሳልፈው ጊዜ፣ የበለጠ ጥቅም ለማግኘት ምን ማድረግ እንችላለን?

ይህን ማድረግ የሚቻለው እንዴት ነው?

• ለማጥናት በምትጠቀምበት መጽሐፍ ቅዱስ (በታተመውም ሆነ በኤሌክትሮኒክ ፎርማት በተዘጋጀው) ጥቅሶች ላይ ማስመር እንዲሁም ማስታወሻ ማስፈር ጠቃሚ ነው

• የአምላክን ቃል ስታነብ ‘ማን? ምን? መቼ? የት? ለምን? እንዴት?’ እያልክ ራስህን ጠይቅ

• የተሟላ መረጃ ለማግኘት ሞክር። በተዘጋጁልን የምርምር መሣሪያዎች ተጠቅመህ በርዕሰ ጉዳይ ወይም በጥቅስ ምርምር አድርግ

• ትምህርቱን በግልህ እንዴት ተግባራዊ ማድረግ እንደምትችል ለማስተዋል፣ ባነበብከው ነገር ላይ አሰላስል

• የተማርከውን ነገር በሕይወትህ ተግባራዊ አድርግ።—ሉቃስ 6:47, 48

ውጤታማ የሆነ የግል ጥናት በማድረግ እውነትን ‘አጥብቆ መያዝ’ የሚለውን ቪዲዮ ተመልከት፤ ከዚያም የሚከተሉትን ጥያቄዎች ለመመለስ ሞክር፦

• አንዳንዶች የግል ጥናትን በተመለከተ ምን ብለዋል?

• የግል ጥናት ማድረግ ከመጀመራችን በፊት ምንጊዜም መጸለያችን አስፈላጊ የሆነው ለምንድን ነው?

• አንድን የመጽሐፍ ቅዱስ ዘገባ በደንብ መረዳት እንድንችል ምን ሊያግዘን ይችላል?

• ለጥናት በምንጠቀምበት መጽሐፍ ቅዱስ ላይ ምን ዓይነት ምልክቶች ማድረግ እንችላለን?

• የአምላክን ቃል ስናጠና ማሰላሰላችን በጣም አስፈላጊ የሆነው ለምንድን ነው?

• የተማርነውን ነገር ምን ልናደርግ ይገባል?