የይሖዋ ምሥክሮች ቅርንጫፍ ቢሮ በማላዊ በምትገኘው ብላንታየር ከተማ የተቋቋመው በ1948 ማለትም የዛሬ 75 ዓመት ነበር።

ከዚያ በፊት በማላዊ ያሉትን የይሖዋ ምሥክሮች እንቅስቃሴ የሚከታተለው የደቡብ አፍሪካ ቅርንጫፍ ቢሮ ነበር። ከ1930ዎቹ አንስቶ በማላዊ ያሉ ወንድሞችና እህቶች ቁጥር እየጨመረ ሄዶ 1934 ላይ 28 ብቻ የነበሩት አስፋፊዎች በ1948 ከ5,600 በላይ ሆኑ። የይሖዋ ምሥክሮች ቁጥር እየጨመረ ሲሄድ ወንድሞች በብላንታየር ከተማ አንድ አነስተኛ አፓርታማ ተከራይተው መስከረም 1, 1948 በዚያ የመጀመሪያው ቅርንጫፍ ቢሮ ተከፈተ። በ1958 በብላንታየር አቅራቢያ አዲስ የቤቴል ሕንፃ እስከተገነባበት ጊዜ ድረስ ይህ ቢሮ አገልግሎት መስጠቱን ቀጥሏል።

አሥር ዓመት ባልሞላ ጊዜ ውስጥ ማለትም ጥቅምት 1967 የማላዊ ባለሥልጣናት የይሖዋ ምሥክሮችን እንቅስቃሴ አገዱ። በዚህም የተነሳ ቅርንጫፍ ቢሮው ታሸገ። ያም ሆኖ በማላዊ ያሉ ኃላፊነት ያላቸው ወንድሞች በመላው አገሪቱ የስብከቱን ሥራ ማደራጀታቸውንና የእምነት ባልንጀሮቻቸውን መርዳታቸውን ቀጠሉ። ከዚያ በኋላ ባለው ወደ 26 ዓመት የሚጠጋ ጊዜ ውስጥ የይሖዋ ምሥክሮች ክርስቲያናዊ የገለልተኝነት አቋም በመያዛቸው ከባድ ስደትና አሰቃቂ ጥቃት ተፈጽሞባቸዋል። በእነዚህ ዓመታት ውስጥ ወንድሞቻችንና እህቶቻችን ታስረዋል፤ ሥቃይ ደርሶባቸዋል፤ አልፎ ተርፎም ተገድለዋል። አንዳንድ ወንድሞችና እህቶች እንደ ሞዛምቢክ፣ ዚምባብዌ እና ዛምቢያ ወዳሉ አጎራባች አገራት ለመሸሽ መርጠዋል።

በመጨረሻም ነሐሴ 12, 1993 እገዳው ተነሳ። በእገዳው ወቅት በማላዊ የሚካሄደውን ሥራ ለተወሰኑ ዓመታት ሲከታተሉ የነበሩት በዛምቢያ የነበሩ ወንድሞች፣ ለቀጣዮቹ ሁለት ዓመታት ሥራውን በማደራጀቱ ሥራ እገዛ አበርክተዋል። ከዚያም ወንድሞቻችን በሊሎንግዌ ከተማ ሁለት ቤቶችን የገዙ ሲሆን እነዚህ ቤቶች በማላዊ አዲስ ቅርንጫፍ ቢሮ ሆነው ማገልገል ጀመሩ። በ1994 የበላይ አካሉ፣ ወንድሞች በአገሪቱ አዲስ የቤቴል ሕንፃዎች ለመገንባት ምቹ ቦታ እንዲፈልጉ ፈቃድ ሰጠ። ግንቦት 19, 2001 በተካሄደው በእነዚህ የቅርንጫፍ ቢሮ ሕንፃዎች ውሰና ላይ ከ2,000 የሚበልጡ ወንድሞችና እህቶች የተገኙ ሲሆን ከእነዚህ መካከል አብዛኞቹ ለአሥርተ ዓመታት የደረሰባቸውን ስደት በጽናት የተቋቋሙ ናቸው። በውሰና ፕሮግራሙ ላይ ከተገኙት ወንድሞች መካከል በእገዳው ወቅት የወረዳ የበላይ ተመልካች ሆኖ ያገለገለው ወንድም ትሮፊም ንሶምባ ይገኝበታል። ወንድም ንሶምባ አዲሶቹን የቅርንጫፍ ቢሮ ሕንፃዎችና በማላዊ የታየውን መንፈሳዊ እድገት አስመልክቶ እንዲህ ብሏል፦ “ከይሖዋ ያገኘናቸው እነዚህ በረከቶች በጣም አስደናቂ ከመሆናቸው የተነሳ እኔና [ባለቤቴ] ሕልም እንጂ በእውን የተፈጸሙ አይመስለንም!”

በዛሬው ጊዜ በማላዊ ባሉ 1,924 ጉባኤዎች ውስጥ የሚያገለግሉ ከ109,000 የሚበልጡ ወንድሞችና እህቶች አሉ። ከእነዚህ መካከል በሊሎንግዌ በሚገኘው የማላዊ ቅርንጫፍ ቢሮ ውስጥ የሚያገለግሉት 225 ቤቴላውያን ይገኙበታል፤ በቅርንጫፍ ቢሮው ውስጥ መጽሐፍ ቅዱሳዊ ጽሑፎች ወደ ሰባት ቋንቋዎች ይተረጎማሉ።

ይሖዋ ለብዙ አሥርተ ዓመታት በመጽናት ራሳቸውን ብቁ የአምላክ አገልጋዮች አድርገው ያቀረቡትን በማላዊ ያሉ ውድ ወንድሞቻችንን እና እህቶቻችንን መባረኩን እንዲቀጥል እንጸልያለን።​—2 ቆሮንቶስ 6:4