በአንታናናሪቮ፣ ማዳጋስካር የተገነባው አዲስ የመጽሐፍ ቅዱስ ትምህርት ቤት ሕንፃ ግንቦት 27, 2023 ለይሖዋ አገልግሎት ተወሰነ፤ ውሰናው የተካሄደው በትምህርት ቤቱ አቅራቢያ በሚገኝ የስብሰባ አዳራሽ ውስጥ ነው። የበላይ አካል አባል የሆነው ወንድም ኬነዝ ኩክ “ለይሖዋ ውዳሴ የሚያመጣ ሕንፃ” በሚል ርዕስ የውሰና ንግግሩን አቀረበ። በቀጣዩ ቀን በአገሪቱ ባለ የትላልቅ ስብሰባዎች አዳራሽ ልዩ ፕሮግራም የተካሄደ ሲሆን ፕሮግራሙ ከ45,000 ለሚበልጡ ሰዎች ተላልፏል።

ከታኅሣሥ 1999 አንስቶ ቲኦክራሲያዊ ትምህርት ቤቶች ይካሄዱ የነበሩት በማዳጋስካር ቅርንጫፍ ቢሮ ውስጥ ነበር። በጊዜ ሂደት ግን ቦታው፣ ተጨማሪ ሥልጠና ለማግኘት ራሳቸውን በፈቃደኝነት የሚያቀርቡትን በርካታ ወንድሞችና እህቶች ለማስተናገድ በቂ አልሆነም። ሐምሌ 2020 ከቅርንጫፍ ቢሮው በቅርብ ርቀት ላይ ያለ 1,348 ካሬ ሜትር ስፋት ያለው ቦታ ተገዛ። ከዚያ ብዙም ሳይቆይ የትምህርት ቤት ሕንፃው ግንባታ ተጀመረ። በኮቪድ-19 ወረርሽኝ ምክንያት አንዳንድ ገደቦች ተጥለው የነበረ ቢሆንም ፕሮጀክቱ ሁለት ዓመት ባልሞላ ጊዜ ውስጥ ተጠናቀቀ። በቅጥር ግቢው ውስጥ ቲኦክራሲያዊ ትምህርት ቤቶች የሚካሄዱበት አንድ ሕንፃ እንዲሁም ተማሪዎችና አስተማሪዎች የሚኖሩበት ሌላ ሕንፃ ተገንብቷል። በዚህ ቦታ የመንግሥቱ ወንጌላውያን ትምህርት ቤት እና ለወረዳ የበላይ ተመልካቾችና ለሚስቶቻቸው የተዘጋጀው ትምህርት ቤት ይካሄዳል።

ቲኦክራሲያዊ ሥልጠናዎች እየጨመሩ ሲሄዱ ወንድሞቻችንና እህቶቻችን ከሥልጠናዎቹ በሚያገኙት ትምህርት እየታገዙ “መንፈሳዊ ጉዳዮችን በመንፈሳዊ ቃል” ለማብራራት በሚገባ የታጠቁ ይሆናሉ።—1 ቆሮንቶስ 2:13