ጥር 27, 2022
ሩሲያ

ሁለት ወንድሞች የይሖዋን እጅ በማየታቸው በድፍረት ጸንተዋል

አጫውት

በታምቦቭ ክልል የሚገኘው የኪርሳኖቭስኪ አውራጃ ፍርድ ቤት የወንድም አንቶን ኩዤልኮቭን እና የወንድም ኒኮላይ ፕሮኮሮቭን ጉዳይ ተመልክቶ በቅርቡ ውሳኔውን ያሳውቃል። አቃቤ ሕጉ እንዲተላለፍባቸው የሚፈልገውን ብይን ገና አላሳወቀም።

የክሱ ሂደት

ታኅሣሥ 21, 2020

አንቶን እና ኒኮላይ የጽንፈኛ ድርጅትን እንቅስቃሴ አደራጅተዋል በሚል የወንጀል ክስ ተመሠረተባቸው
ታኅሣሥ 24, 2020

መርማሪዎች የአንቶንን ቤት ጨምሮ 19 ቦታዎችን ፈተሹ። አንቶን ከቤቱ 350 ኪሎ ሜትር ርቆ ወደሚገኝ ቦታ ለምርመራ ተወሰደ። ኒኮላይም ምርመራ ተደረገበት፤ ከዚያም አካባቢውን ለቆ እንዳይሄድ ታዘዘ
ታኅሣሥ 25, 2020

አንቶን ወደ ቤቱ እንዲመለስ አልተፈቀደለትም፤ ወደ ማረፊያ ቤት ተላከ
ነሐሴ 30, 2021

አንቶን ወደ ሌላ ማረፊያ ቤት ተዛወረ

አጭር መግለጫ

አንቶን ኩዤልኮቭ

የትውልድ ዘመን፦ 1993 (ሶርታቫላ፣ የካሬልያ ሪፑብሊክ)

ግለ ታሪክ፦ ከሦስት ወንዶች ልጆች የመጀመሪያው ነው። በልጅነቱ ዓሣ ማጥመድና የበረዶ ላይ ሸርተቴ መጫወት ይወድ ነበር። ከአባቱ የግንባታ ሙያ ተምሯል

በ2007 ተጠመቀ። በ2015 ከአልዮና ጋር ትዳር መሠረተ

የአንቶን ሚስት አልዮና የሰጠችው ሐሳብ a

አንቶንን ሄደሽ ለመጠየቅ ስትሞክሪ ምን ተፈታታኝ ሁኔታ አጋጥሞሻል?

ማረፊያ ቤት ሄጄ እሱን ለአጭር ጊዜ ማነጋገር ተፈቅዶልኝ በነበረበት ወቅት በወር ሁለት ጊዜ ወደ መርማሪው ሄጄ ከእሱ ፈቃድ መቀበል ነበረብኝ። ይህን ማድረግ ሁልጊዜ በጣም ያስፈራኝ ነበር። በተጨማሪም ወደ ማረፊያ ቤቱ ለመግባት ኮቪድ-19 እንደሌለብኝ የሚያረጋግጥ ማስረጃ ማቅረብ ይጠበቅብኝ ነበር። ምርመራው ደግሞ ውድ ነው።

አሁን ሄዶ መጠየቅ ተከልክሏል፤ ይህም በጣም ያሳዝናል። ሆኖም ጉዳዩ በፍርድ ቤት መታየት ጀምሯል፤ በአሁኑ ወቅት ጉዳዩ ሲታይ ፍርድ ቤት መግባት ይፈቀድልኛል። ግን ፍርድ ቤቱ የሚገኘው ከቤቴ 100 ኪሎ ሜትር ርቆ በሚገኝ ከተማ ውስጥ ነው።

ባለቤትሽ በማረፊያ ቤት ባለበት ወቅት እንዲጸና የረዳው ምንድን ነው?

የሚፈልገውን ነገር ለይቶ በመጥቀስ ከልቡ መጸለዩ፣ አንዳንዴም በእንባ ጭምር ምልጃ ማቅረቡ ለመጽናት ረድቶታል። በሚያጋጥመው ሁኔታ ሁሉ የይሖዋን እጅ አይቷል። . . . ተፈጥሮን ማየትም ያስደስተዋል። ለምሳሌ ግቢ ውስጥ በእግሩ በሚንቀሳቀስበት ወቅት ወፎችን አስተውሎ ይመለክታል። . . . ስለ ፈጣሪ ጥበብ እንዲሁም ኢየሱስ ድንቢጦችን በተመለከተ ስለተናገረው ምሳሌ ያሰላስላል። . . . እነዚህን ነገሮች ማድረጉ ደስታውን ለመጠበቅ ረድቶታል።

ኒኮላይ ፕሮኮሮቭ

የትውልድ ዘመን፦ 1964 (ሞርሻን፣ ታምቦቭ ክልል)

ግለ ታሪክ፦ በጦር ሠራዊት ውስጥ አገልግሏል። መዋኘት እና ጉዞ ይወዳል

በ2008 ከየሌና ጋር ትዳር መሠረተ። አንድ ወንድና አንዲት ሴት ልጅ አላቸው። የይሖዋ ምሥክሮች የሚያሳዩትን መልካም ምግባር ከተመለከተ በኋላ በ2008 ተጠመቀ

የሰጠው ሐሳብ

የይሖዋን እርዳታ ያየህበትን ጊዜ መጥቀስ ትችላለህ?

በጣም በከበደኝ ወቅትም ጭምር ይሖዋ ምንጊዜም ብርታት ሰጥቶኛል። . . . አንዳንድ ፖሊሶች እንድተባበራቸው ለማድረግ ወይም ቢያንስ “ወንጀል መፈጸሜን” እንዳምን ለማድረግ ሞክረው ነበር። . . . በጣም ስለፈራሁ ታማኝነቴን መጠበቅ መቻሌን ተጠራጥሬ ነበር። በዚህ ጊዜ ወደ ይሖዋ በመጸለይ ብርታትና ውስጣዊ ሰላም እንዲሰጠኝ ለመንኩት። አንደኛው ፖሊስ ለጸሎት ማጎንበሴን ሲያይ “ስለ ምንድን ነው የምትጸልየው?” ብሎ ጠየቀኝ። እኔም “ለራሴ ማዘን እንዳልጀምር ነው የጸለይኩት” አልኩት። ከዚያም ኢሳይያስ 54:17⁠ን አስታወስኩ። ምንም ሊያደርጉኝ እንደማይችሉ ተገነዘብኩ። ይህም ልበ ሙሉ እንድሆን ረድቶኛል፤ ፖሊሶቹም ይህን ማስተዋል ችለዋል። በኋላም እኔን ለማስፈራራት መሞከራቸውን አቆሙ። እንዲያውም ቂም እንዳልይዝባቸው ጠየቁኝ።

ወንድሞችና እህቶች አንተንና ባለቤትህን የረዷችሁ እንዴት ነው?

ጉባኤው የሚያስፈልገንን እርዳታ ሰጥቶናል። በርካታ ወንድሞችና እህቶች የመንግሥት ባለሥልጣናት ዓይን ውስጥ ሊገቡ እንደሚችሉ እያወቁም እርዳታ አበርክተውልናል። በተጨማሪም ከመላው ሩሲያ እና ከሌሎች ቦታዎችም ስልክ ተደውሎልናል።

በዚያ አስቸጋሪ ጊዜ ሁሉም ሰው ተረባርቦ ረድቶናል። ፍርድ ቤት በምቀርብበት ወቅት ሊደግፉን መጥተዋል። . . . ክርስቲያን የወንድማማች ማኅበራችን በዚህ መልኩ እውነተኛ ፍቅር ያሳየን መሆኑ በፍርድ ቤቱ ለነበሩት ሁሉ ጥሩ ምሥክርነት ሰጥቷል። እነሱ ያደረጉልን ድጋፍ እኔና ባለቤቴ [በዚህ አስቸጋሪ ጊዜ] እንድንጸና ረድቶናል።

ይሖዋ ስደት ለሚደርስባቸው ውድ ወንድሞቻችን እና እህቶቻችን ድፍረት መስጠቱንና እነሱን መደገፉን እንደሚቀጥል እርግጠኞች ነን።—ምሳሌ 1:33

a ወንድም ኩዤልኮቭ በአሁኑ ወቅት ማረፊያ ቤት ይገኛል። በመሆኑም የእሱን ሐሳብ መጠየቅ አልቻልንም።

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች