ነሐሴ 10, 2023
ሩሲያ

ስደት እየደረሰባቸውም ደስተኞች ሆነው ቀጥለዋል

አጫውት

በኮሚ ሪፑብሊክ የሚገኘው የሲክቲቭካርስኪ ከተማ ፍርድ ቤት፣ በወንድም አሌክሳንደር ኬቶቭ፣ በወንድም አንድሬ ኻርላሞቭ፣ በወንድም አሌክሳንደር ክሩግሊያኮቭ፣ በእህት ሊዲያ ኒክራሶቫ እና በወንድም ሰርጌ ኡሻኺን ክስ ላይ በቅርቡ ውሳኔ ያስተላልፋል ተብሎ ይጠበቃል። አቃቤ ሕጉ እንዲተላለፍባቸው የሚፈልገውን ብይን ገና አላሳወቀም።

አጭር መግለጫ

አሌክሳንደር ኬቶቭ

ትውልድ፦ 1968 (ማላያ ቤቤርካ፣ ኮሚ ሪፑብሊክ)

ግለ ታሪክ፦ የእሳት አደጋ ሠራተኛ ነበር

በ1994 ናታሊያን አገባ

ሕመምና ሞት እንደሚወገዱ ከመጽሐፍ ቅዱስ ላይ ሲማር ተደሰተ። በ1999 ተጠምቆ የይሖዋ ምሥክር ሆነ

የሰጠው ሐሳብ

ይህ ከባድ ሁኔታ የሚያስከትለውን ውጥረት ለመቋቋም የረዳህ ምንድን ነው?

እንዲህ ዓይነት ሁኔታ ቢያጋጥምህ ምን ልታደርግ እንደምትችል ታስብ ይሆናል። ነገሩ ምን ያህል ከባድ እንደሆነ የሚገባህ ግን ደርሶብህ ስታየው ነው። ቤቴ ቢፈተሽ ምን እንደማደርግ አስቀድሜ መለማመዴ ጠቅሞኛል። ፍተሻው ሲካሄድ ተጨንቄ ነበር፤ ሆኖም ጸሎት እንድረጋጋ ረድቶኛል።

አንድሬ ኻርላሞቭ

ትውልድ፦ 1971 (ሲክቲቭካር)

ግለ ታሪክ፦ የማሞቂያና የማቀዝቀዣ መሣሪያዎች መሐንዲስ ነው

በ1990 ላሪሳን አገባ

አንድ የሥራ ባልደረባው ስለ መጽሐፍ ቅዱስ አወያየው። የመጽሐፍ ቅዱስን ምክር በተግባር ማዋል የሚያስገኘውን ጥቅምም ተመለከተ። አንድሬ እና ላሪሳ በ1994 ተጠመቁ

የሰጠው ሐሳብ

በጽናት እንድትቀጥል የረዳህ ምንድን ነው?

እያንዳንዱ ፈተና ወደ ይሖዋ እንድቀርብ ልዩ አጋጣሚ ይሰጠኛል። የወንጀል ክስ ከተመሠረተብኝ በኋላ ያጋጠሙኝን ፈተናዎች መወጣት እንደማልችል የተሰማኝ ጊዜ ነበር። ሂደቱ እየቀጠለ ሲሄድ ግን ይሖዋ ልዩ የሆነ ድጋፍ ሲያደርግልኝ ተመለከትኩ። ይሖዋ አንዳንድ ሰዎችን በመጠቀም ማበረታቻ ይሰጠኝ ነበር። ይሖዋ ከእኔ ጋር እንደሆነና በእቅፉ እንደያዘኝ በጣም እርግጠኛ ነኝ። ይህም በያዕቆብ 5:11 ላይ ያሉትን ቃላት ያስታውሰኛል። ጥቅሱ “የጸኑትን ደስተኞች እንደሆኑ አድርገን እንቆጥራቸዋለን። ስለ ኢዮብ ጽናት ሰምታችኋል፤ በውጤቱም ይሖዋ ያደረገለትን አይታችኋል፤ በዚህም ይሖዋ እጅግ አፍቃሪና መሐሪ እንደሆነ ተመልክታችኋል” ይላል። የይሖዋን ፍቅራዊ እንክብካቤ በገዛ ሕይወቴ ስላየሁ ለእሱ ያለኝን ፍቅር ለመግለጽና ታማኝ ሆኜ ለመቀጠል የበለጠ ተነሳስቻለሁ።

አሌክሳንደር ክሩግሊያኮቭ

ትውልድ፦ 1979 (ኡኽታ፣ ኮሚ ሪፑብሊክ)

ግለ ታሪክ፦ የሪል እስቴት የሽያጭ ወኪል ሆኖ ይሠራል

መጽሐፍ ቅዱስን ማንበብ የጀመረው በጉርምስና ዕድሜው ነው። ከይሖዋ ምሥክሮች ጋር መጽሐፍ ቅዱስን ማጥናቱ ከአልኮልና ከዕፅ ሱስ እንዲላቀቅ ረዳው። በ2000 ተጠመቀ

በ2005 ታቲያናን አገባ

የሰጠው ሐሳብ

ስደት እየደረሰብህ ቢሆንም መመሥከርህን እንድትቀጥል የሚያነሳሳህ ምንድን ነው?

ኢየሱስ በሉቃስ 21:12, 13 ላይ ተከታዮቹ ስደት እንደሚደርስባቸው፣ እንደሚታሰሩና ባለሥልጣናት ፊት እንደሚቀርቡ ትንቢት ተናግሯል። ነገር ግን “ይህም ለመመሥከር የሚያስችል አጋጣሚ ይከፍትላችኋል” ብሏል። ምናልባት እስር ቤት ብገባ ብዬ ሳስብ አሁን ላይ ለሌሎች ለመመሥከር ያሉኝን አጋጣሚዎች ሳልጠቀምባቸው ብቀር በኋላ ላይ እንደሚቆጨኝ አውቃለሁ። ስለዚህ ለማገኛቸው ባለሥልጣናት ሁሉ ለመመሥከር ግብ አውጥቻለሁ። እነሱ በሚሠሩት ሥራና እኛ በምናከናውነው ሥራ መካከል ያለውን ተመሳሳይነት እነግራቸዋለሁ። ሁለታችንም እየጣርን ያለነው የማኅበረሰቡን ሕይወት ለማሻሻል ነው። እነሱ ይህን የሚያደርጉት ወንጀለኞችን ከሕብረተሰቡ መካከል በማስወገድ ነው። ችግሩ፣ ሰዎች ከእስር ቤት ከወጡ በኋላ ወደ ቀድሞ መጥፎ ድርጊታቸው የሚመለሱ መሆኑ ነው። እኛ ግን መጽሐፍ ቅዱስን በመጠቀም ሰዎች በሕይወታቸው ላይ ዘላቂ ለውጥ እንዲያደርጉ እንረዳቸዋለን። ይህም ሰላማዊ እንዲሆኑና ለማኅበረሰቡ አዎንታዊ አስተዋጽኦ እንዲያበረክቱ ያስችላቸዋል።

ሊዲያ ኒክራሶቫ

ትውልድ፦ 1953 (ኩራቶቮ፣ ኮሚ ሪፑብሊክ)

ግለ ታሪክ፦ መምህርና ረዳት ነርስ ሆና ሠርታለች። ሶስት ወንዶች ልጆች አሏት

በ1993 መጽሐፍ ቅዱስን ማጥናት ጀመረች። አምላክ ፍትሐዊ እንደሆነና ሌሎችም ግሩም ባሕርያት እንዳሉት ስታውቅ ተጽናናች። በ1997 ተጠመቀች።

የሰጠችው ሐሳብ

ይህን መከራ እንድትቋቋሚና ደስተኛ እንድትሆኚ የረዳሽ ምንድን ነው?

አፍቃሪ የሆኑት ወንድሞቼና እህቶቼ አምላክ የሰጠኝ ስጦታዎች ናቸው። አንዳችን ለሌላው ምን ያህል አስፈላጊ እንደሆንን በግልጽ ተመልክቻለሁ። የሰጡኝ ማበረታቻና ያደረጉልኝ ድጋፍ ተስፋ እንዳልቆርጥ ረድቶኛል። ለይሖዋ ያለኝ ፍቅርና በእስር ላይ ያሉትን ለመርዳት ያለኝ ፍላጎት የምችለውን ሁሉ ማድረጌን እንድቀጥል ያነሳሳኛል። የይሖዋ መንፈስ እየረዳኝ ነው። ስለዚህ ይሖዋን በደስታ አገለግለዋለሁ።

ሰርጌ ኡሻኺን

ትውልድ፦ 1961 (ፒንዩግ፣ ኪሮቭ ክልል)

ግለ ታሪክ፦ በወረቀት ፋብሪካ ውስጥ ይሠራል

በ1987 ናታሊያን አገባ። አንድ ወንድና አንዲት ሴት ልጅ አሏቸው

ከይሖዋ ምሥክሮች ጋር የተዋወቀው እናቱ መጽሐፍ ቅዱስ ማጥናት ስትጀምር ነው። ለነበሩት ጥያቄዎች በቀጥታ ከመጽሐፍ ቅዱስ መልስ ሲሰጠው እውነትን እንዳገኘ እርግጠኛ ሆነ። በ1999 ተጠመቀ። ናታሊያ ደግሞ በ2005 ተጠመቀች

የሰጠው ሐሳብ

አዎንታዊ አመለካከት ይዘህ እንድትቀጥል የረዳህ ምንድን ነው?

አንዳንዴ ተስፋ ብንቆርጥ የሚያስገርም አይደለም፤ በዚህም የተነሳ አቅመ ቢስ እንደሆንን የሚሰማን ወይም አሉታዊ አመለካከት የሚያድርብን ጊዜ ይኖራል። እንዲህ ዓይነቱን ስሜት ለመቋቋም የረዱኝ ጸሎት፣ የመጽሐፍ ቅዱስ ንባብና ከመንፈሳዊ ቤተሰቤ ጋር ጊዜ ማሳለፍ ናቸው። ስጸልይ፣ ሌሎችን በተለይም በዕድሜ የገፉ ወንድሞችንና እህቶችን ማበረታታት እንድችል እንዲረዳኝ ይሖዋን እለምነዋለሁ። በዚህ ሥርዓት ውስጥ ስንኖር ለሚያጋጥሙን ነገሮች አዎንታዊ አመለካከት እንዲኖራቸው ስረዳቸውና የሚያበረታታ ሐሳብ ሳካፍላቸው ጥልቅ ደስታ ይሰማኛል። ይሖዋ እንደ እኔ ባለ ሰው ተጠቅሞ እንዲህ ማድረጉ ክብር እንደሆነ ይሰማኛል።

ከእነዚህ ተሞክሮዎች እንደምንረዳው ይሖዋ መከራን በጽናት እየተቋቋሙ ላሉት ወንድሞቻችንና እህቶቻችን “የተሟላ ብርታት” በመስጠት ታማኝ ሆነው እንዲቀጥሉ እየረዳቸው ነው።—ኢሳይያስ 40:29

የክሱ ሂደት

መጋቢት 2, 2021

በሲክቲቭካር ቢያንስ 14 የይሖዋ ምሥክሮች ቤቶች ተፈተሹ። አሌክሳንደር ኬቶቭ፣ አንድሬ ኻርላሞቭ እና አሌክሳንደር ክሩግሊያኮቭ በጊዜያዊ ማረፊያ ቤት እንዲቆዩ ተደረገ። ሊዲያ ኒክራሶቫ እና ሰርጌ ኡሻኺን ደግሞ የጉዞ ገደብ ተጣለባቸው
መጋቢት 3, 2021

አሌክሳንደር ኬቶቭ እና አንድሬ ኻርላሞቭ ከማረፊያ ቤት ወጥተው በቁም እስር እንዲቆዩ ተደረገ። አሌክሳንደር ክሩግሊያኮቭ ወደ ማረፊያ ቤት ተላከ
ሚያዝያ 27, 2021

አንድሬ ኻርላሞቭ ከቁም እስር ተለቀቀ
ሚያዝያ 28, 2021

አሌክሳንደር ኬቶቭ ከቁም እስር፣ አሌክሳንደር ክሩግሊያኮቭ ደግሞ ከማረፊያ ቤት ተለቀቁ
ሚያዝያ 19, 2022

ክሳቸው በፍርድ ቤት መታየት ጀመረ
ሰኔ 9, 2022

ዳኛው ጽንፈኝነትን የሚያሳይ በቂ ማስረጃ አለማግኘታቸውን በመግለጽ ክሱን ወደ አቃቤ ሕጉ መለሱት
የካቲት 14, 2023

አዲስ ዳኛ ተመድቦ ክሳቸው በድጋሚ በፍርድ ቤት መታየት ጀመረ

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች