ሰኔ 28, 2024
ሩሲያ

በሩሲያ፣ ካልሚኪያ ሪፑብሊክ የሚኖሩ ሦስት እህቶች ተፈረደባቸው

አጫውት

ሰኔ 24, 2024 በካልሚኪያ ሪፑብሊክ የሚገኘው የኤሊስታ ከተማ ፍርድ ቤት፣ በእህት ሳጋን ሃልጋዬቫ፣ በእህት ዬካተሪና ሜንኮቫ እና በእህት ኪሽታ ቱቲኖቫ ላይ የጥፋተኝነት ብይን አስተላልፏል። ሳጋን እና ዬካተሪና እያንዳንዳቸው የሁለት ዓመት የገደብ እስራት ተፈርዶባቸዋል። ኪሽታ ደግሞ የሦስት ዓመት የገደብ እስራት ተበይኖባታል። በአሁኑ ወቅት ወህኒ አይወርዱም።

አጭር መግለጫ

ሳጋን ሃልጋዬቫ

ትውልድ፦ 1978 (ላጋን፣ ካልሚኪያ ሪፑብሊክ)

ግለ ታሪክ፦ ልብስ ሰፊ ነበረች

ለጥያቄዎቿ መልስ ለማግኘት የተለያዩ ሃይማኖቶችን መርምራለች። ከይሖዋ ምሥክሮች ጋር ማጥናት ስትጀምር ከመጽሐፍ ቅዱስ ላይ የሚያረካ መልስ አገኘች

በ2004 ተጠመቀች

የሰጠችው ሐሳብ

በዚህ ከባድ ጊዜ በተለይ ስለ ምን ነገር አመስጋኝ ነሽ?

ወንድሞቼና እህቶቼ ስለ እኔ ለሚያቀርቡት ጸሎት በጣም አመስጋኝ ነኝ። አንዳንድ ጊዜ አሉታዊ ስሜት ሲመጣብኝ ከመቃተት ባለፈ ለይሖዋ ስሜቴን መናገር እንደምችል አይሰማኝም። ስሜቴን በቃላት ማስቀመጥ ይከብደኛል። ሆኖም ስለ እኔ የሚጸልዩ ሌሎች እንዳሉ አውቃለሁ፤ ይሖዋ ጸሎታቸውን ሲመልስም ተመልክቻለሁ። ይህን ሳይ እኔም ለሌሎች የሚያስፈልጋቸውን ነገር ጠቅሼ ለመጸለይ እነሳሳለሁ። አንዳችን የሌላውን ችግር እንደምንጋራ ስለሚያሳየኝ ስንደጋገፍ ሳይ በጣም እጽናናለሁ።

ዬካተሪና ሜንኮቫ

ትውልድ፦ 1982 (ታቭን ጋሹን፣ ካልሚኪያ ሪፑብሊክ)

ግለ ታሪክ፦ ላብራቶሪ ውስጥ ረዳት ሆና ትሠራ ነበር

በ2009 አገባች። አንድ ወንድ ልጅ አላት

የይሖዋ ምሥክሮች በአኗኗራቸው የመጽሐፍ ቅዱስን መመሪያዎች እንደሚያከብሩና እሷም እንዲህ ማድረጓ ሕይወቷን ምን ያህል እንዳሻሻለላት ስትመለከት ተገረመች። በ2017 ተጠመቀች

የሰጠችው ሐሳብ

በይሖዋ ላይ ያለሽን እምነት እንድታጠናክሪ የረዱሽ የትኞቹ የመጽሐፍ ቅዱስ ጥቅሶች ናቸው?

መዝሙር 8:3, 4 ላይ የሚገኘው ሐሳብ ብርታት ይሰጠኛል። “የጣቶችህን ሥራ ሰማያትን፣ አንተ የሠራሃቸውን ጨረቃንና ከዋክብትን ስመለከት፣ ታስበው ዘንድ ሟች ሰው ምንድን ነው? ትንከባከበውስ ዘንድ የሰው ልጅ ምንድን ነው?” ይላል። ይሖዋ ግዙፉን ጽንፈ ዓለምና በውስጡ ያሉትን ነገሮች ሁሉ ለመፍጠር ያስፈለገው በምሳሌያዊ አነጋገር ጣቶቹን ብቻ ነው። ይህን ሳስብ ኃያል የሆነው የይሖዋ መንፈስ ድጋፍ እስካለኝ ድረስ ምንም ነገር ሊያስፈራኝ እንደማይገባ እተማመናለሁ።

ኪሽታ ቱቲኖቫ

ትውልድ፦ 1961 (ኖቮሌስኖይ፣ አስትራካን ክልል)

ግለ ታሪክ፦ ልብስ ሰፊ ነበረች። ሁለት ወንዶች ልጆች ብቻዋን አሳድጋለች

ያደገችው የቡዲዝም እምነት ተከታይ በሆነ ቤተሰብ ውስጥ ነው። የይሖዋ ምሥክር የሆነች አንድ ደንበኛዋ ስለ መጽሐፍ ቅዱስ ነገረቻት። ኪሽታ ከወግና ከአጉል እምነቶች በጸዳ መንገድ አምላክን ማምለክ የሚቻለው እንዴት እንደሆነ ስትማር ተደሰተች። በ2003 ተጠመቀች

የሰጠችው ሐሳብ

አዎንታዊ ሆነሽ እንድትቀጥዪ የረዳሽ ምንድን ነው?

የቁም እስር ላይ በነበርኩበት ወቅት ለአራት ወር ያህል ከቤት መውጣት አይፈቀድልኝም ነበር። በወቅቱ የምኖረው ከልጄና ከቤተሰቡ ጋር በአንድ ክፍል አፓርታማ ላይ ስለነበር ይህ በጣም ከብዶኝ ነበር። በዚያች ክፍል ውስጥ ሰባት ሆነን እንኖር ነበር። እንቅስቃሴዬ ይህን ያህል መገደቡ በስሜቴ ላይ አሉታዊ ተጽዕኖ ማሳደር ጀመረ። ሆኖም በምሳሌ 24:10 ላይ ማሰላሰሌ በጣም ጠቅሞኛል። ጥቅሱ “በመከራ ቀን ተስፋ የምትቆርጥ ከሆነ ጉልበትህ እጅግ ይዳከማል” ይላል። መጥፎ መጥፎውን ካሰብኩ አሉታዊ እንደምሆን፣ ጥሩ ጥሩውን ማሰብ ደግሞ አዎንታዊ እንደሚያደርገኝ አስተዋልኩ። የዮሴፍን ታሪክ አስታወስኩ። እስር ቤት ሳለ ሁኔታው እንዲያስመርረው አልፈቀደም። ስለዚህ በረከቶቼን ለመቁጠር ወሰንኩ፤ ይህም ደስታዬን እንዳላጣ ረድቶኛል።

እንዲህ ያሉ ዘመናዊ የእምነት ምሳሌዎችን እናደንቃለን። ይሖዋ የምናልፍበትን መከራ ሁሉ እንደሚመለከትና ለታማኝነታችን ወሮታ እንደሚከፍለን ስለምናውቅ አመስጋኞች ነን።—መዝሙር 37:18

የክሱ ሂደት

የካቲት 16, 2023

ኪሽታ የክስ ፋይል ተከፈተባት
የካቲት 28, 2023

ቤታቸው ተፈተሸ። ኪሽታ ጣቢያ ተወሰደች
መጋቢት 1, 2023

ሳጋን በከባድ ወንጀል በመጠርጠሯ ከሥራዋ ተባረረች። ኪሽታ ከጣቢያ ተለቅቃ የቁም እስረኛ ሆነች
ሐምሌ 21, 2023

ኪሽታ ከቁም እስር ተፈታች
ታኅሣሥ 19, 2023

ዬካተሪና እና ሳጋን የክስ ፋይል ተከፈተባቸው። ሁለቱም የጉዞ ገደቦች ተጣሉባቸው
የካቲት 9, 2024

ኪሽታ የጉዞ ገደቦች ተጣሉባት
ሚያዝያ 1, 2024

ክሳቸው በፍርድ ቤት መታየት ጀመረ
ሰኔ 24, 2024

ጥፋተኛ ተብለው የገደብ እስራት ተፈረደባቸው

በተጨማሪም ይህን ተመልከት

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች