ጥር 20, 2022
ሩሲያ

በሩሲያ የሚኖሩ ሰባት ወንድሞች ከፈጣሪያቸው ብርታት አግኝተዋል

አጫውት

በኮሚ ሪፑብሊክ የሚገኘው የፔቾራ ከተማ ፍርድ ቤት በወንድም ኒኮላይ አኑፍሪዬቭ፣ በወንድም ኤዱዋርድ ሜሪንኮቭ፣ በወንድም ጀናዲ ፖልያኬቪች፣ በወንድም አሌክሳንደር ፕሪሌፕስኪ፣ በወንድም ቪክቶር ሽቻኒኮቭ፣ በወንድም ጀናዲ ስኩቴሌትስ እና በወንድም አሌክሳንደር ቮሮንትሶቭ ላይ የተመሠረተውን ክስ ተመልክቶ በቅርቡ ውሳኔውን ያሳልፋል። አቃቤ ሕጉ እንዲተላለፍባቸው የሚፈልገውን ብይን ገና አላሳወቀም።

የክሱ ሂደት

ጥር 28, 2020

ባለሥልጣናቱ በኮሚ ሪፑብሊክ የሚኖሩ 12 ቤተሰቦችን ቤቶች በረበሩ። በወንድም ፖልያኬቪች እና በወንድም ስኩቴሌትስ ላይ የወንጀል ክስ ተመሠረተ
ጥር 30, 2020

ጀናዲ ፖልያኬቪች ማረፊያ ቤት ገባ፤ ጀናዲ ስኩቴሌትስ ደግሞ በቁም እስር እንዲቆይ ተደረገ
ግንቦት 20-25, 2020

በፔቾራ የሚኖሩ የይሖዋ ምሥክሮች ለክሱ ምሥክሮች እንደሚሆኑ በማሰብ ፖሊስ ምርመራ አደረገባቸው። አንድ ወንድም፣ መርማሪው ካስፈራራው በኋላ ስትሮክ መታው። እርግጥ አሁን ጤንነቱ ተሻሽሏል
ሰኔ 26, 2020

የጀናዲ ፖልያኬቪች የማረፊያ ቤት ቆይታ እንዲራዘም ተደረገ። ዳኛው ጀናዲ ፖልያኬቪች የተከሰሰው “ሆን ብሎ ከባድ ወንጀል” በመሥራት እንደሆነ ገለጹ፤ ይህም “ባለሥልጣናት ስደት ቢያደርሱም ይሖዋን ማገልገልን ስለመቀጠል” መናገርን ይጨምራል
ነሐሴ 24, 2020

ባለሥልጣናት የሌሎች 12 የይሖዋ ምሥክር ቤተሰቦችን መኖሪያዎች በረበሩ
ኅዳር 10, 2020

በአሌክሳንደር ፕሪሌፕስኪ፣ በአሌክሳንደር ቮሮንትሶቭ፣ በኤዱዋርድ፣ በኒኮላይ እና በቪክቶር ላይ የወንጀል ክስ ተከፈተ። ጉዳያቸው ከጀናዲ ፖልያኬቪች እና ከጀናዲ ስኩቴሌትስ ጉዳይ ጋር አብሮ መታየት ጀመረ
ኅዳር 25, 2020

ጀናዲ ፖልያኬቪች ለ300 ቀናት በማረፊያ ቤት ከቆየ በኋላ ተለቆ በቁም እስር እንዲቆይ ተደረገ
ጥር 27, 2021

ጀናዲ ስኩቴሌትስ ለ363 ቀናት በቁም እስር ከቆየ በኋላ ተለቀቀ

አጭር መግለጫ

ኤዱዋርድ ሜሪንኮቭ

የትውልድ ዘመን፦ 1975 (ፔቾራ)

ግለ ታሪክ፦ ከልጅነቱ አንስቶ ከቤት ውጭ መዝናናት ያስደስተዋል፤ ለምሳሌ በፔቾራ ወንዝ ላይ በጀልባ መንሸራሸር ይወዳል። የሚሠራው ባቡር ጣቢያ ውስጥ ነው። በ1993 ተጠመቀ። በ1997 ከቫለንቲና ጋር ትዳር መሠረተ። ኢዮላንታ የተባለች ልጅ አለቻቸው

የሰጠው ሐሳብ

በአሁኑ ወቅት መንፈሳዊ ልማድህ ምን ይመስላል? ያጋጠመህን ፈተና ለመቋቋም የረዳህስ እንዴት ነው?

በጣም ከሚያስደስቱኝ ነገሮች አንዱ . . . [JW ብሮድካስቲንግ] ላይ የሚወጡ መዝሙሮችን በቃሌ መያዝና መዘመር ነው። መዝሙሮቹ የይሖዋን ድጋፍ እንዳስተውል ረድተውኛል። ሁሉም ቦታ መዝሙሮቹን እዘምራለሁ፤ ቤት ውስጥ፣ መኪና ውስጥ፣ ሥራ ቦታዬም ጭምር! መዝሙር 27⁠ንም እወደዋለሁ፤ በተደጋጋሚ አነበዋለሁ።

ተስፋ እንዳትቆርጥ የሚያበረታታህ ምንድን ነው?

የጽንፈ ዓለሙ ፈጣሪ እኔን እንደ ወዳጁ አድርጎ እንደቆጠረኝ ማወቄ በራሱ በጣም ያስደስተኛል። ምንም ዓይነት ፈተና ቢያጋጥመኝ ይሖዋን ለዘላለም ማገልገል እፈልጋለሁ። እስከ መጨረሻው ከይሖዋ ጎን ለመቆም ቆርጫለሁ!

አሌክሳንደር ፕሪሌፕስኪ

የትውልድ ዘመን፦ 1964 (ፔቾራ)

ግለ ታሪክ፦ በልጅነቱ ቴኒስ መጫወት ይወድ ነበር። ጊታር ይጫወታል። በ1994 ተጠመቀ። በ1990 ከቬራ ጋር ትዳር መሠረተ። አንዲት ሴት ልጅና ሁለት የልጅ ልጆች አሏቸው

የሰጠው ሐሳብ

ለመጽናት የሚያበረታታህ ምንድን ነው?

የይሖዋ ፍቅር እንዲሁም ያለኝ ግሩም የወደፊት ተስፋ እንድጸና እና በክርስቲያናዊ ጉዞ መመላለሴን እንድቀጥል ያነሳሳኛል። የሰማዩ አባታችንን የፍጥረት ሥራዎች ማየትም ያበረታታኛል።

ወደፊት ለሚያጋጥማቸው ስደት እየተዘጋጁ ላሉ ሰዎች ምን ምክር ትሰጣለህ?

ወንድሞችና እህቶች ያሉንን መንፈሳዊ ዝግጅቶች በተሟላ ሁኔታ እንዲጠቀሙባቸው አበረታታለሁ። እንዲህ ማድረጋቸው ንቁ እንዲሆኑ እንዲሁም አምላካችንን እና ግሩም ባሕርያቱን እንዲያደንቁ ይረዳቸዋል። በተጨማሪም እርስ በርስ እንዲዋደዱ፣ የሌሎችን ስሜት እንዲረዱ እንዲሁም ይቅር ባይ እንዲሆኑ ይረዳቸዋል።

ቪክቶር ሽቻኒኮቭ

የትውልድ ዘመን፦ 1961 (ቤርዮዞቭካ)

ግለ ታሪክ፦ በልጅነቱ ሥዕል መሣልና ቅርጻ ቅርጽ መሥራት ያስደስተው ነበር። የመጽሐፍ ቅዱስን መሠረታዊ ሥርዓቶች መማሩ የመጠጥ ሱሱን ለማሸነፍ ረድቶታል። በ1990 ተጠመቀ። በ2003 ከቪክቶሪያ ጋር ትዳር መሠረተ። የ15 ዓመት ልጅ አድርሰዋል

የሰጠው ሐሳብ

ቤተሰብህ እርስ በርሱም ሆነ ከይሖዋ ጋር እንዲቀራረብ መርዳት የቻልከው እንዴት ነው?

በይሖዋ ይበልጥ መተማመን ችለናል፤ በጸሎታችንም ላይ የሚያስፈልጉንን ነገሮች ለይተን እንጠቅሳለን። ሰፋ ያለ ጊዜ አብረን እናሳልፋለን፤ ይህ ደግሞ እርስ በርስ ይበልጥ እንድንቀራረብ ረድቶናል። ስለ ይሖዋ ባሕርያት ለመማር ይበልጥ ጥረት ማድረግ ጀምሬያለሁ፤ የተማርኩትን ነገር ደግሞ በቤተሰቤ ውስጥ ተግባራዊ ለማድረግ ጥረት አደርጋለሁ። ባለቤቴ የምታደርግልኝ ድጋፍም ለእሷ ያለኝን አድናቆት በእጅጉ ጨምሮታል።

ጀናዲ ስኩቴሌትስ

የትውልድ ዘመን፦ 1976 (ፔቾራ)

ግለ ታሪክ፦ በልጅነቱ በስፖርታዊ ጨዋታዎች መካፈል ይወድ ነበር። የጽዳት ሠራተኛ ነው። የመጽሐፍ ቅዱስ ትንቢቶች መፈጸማቸው አስደነቀው። በ2003 ተጠመቀ

የሰጠው ሐሳብ

የይሖዋን እርዳታ ልዩ በሆነ መንገድ ያስተዋልክበት ጊዜ ትዝ ይልሃል?

ወደ ማረፊያ ቤት በገባሁበት ወቅት አንዱ ፖሊስ በመረጋጋቴ በጣም ተገርሞ “እዚህ ስትመጣ የመጀመሪያህ አይደለም አይደል?” ብሎ ጠየቀኝ። እኔ ግን ከጭንቀቴ ብዛት እጄ ሲንቀጠቀጥ ተሰምቶኝ ነበር። ወደታሰርኩበት ክፍል ስገባ በመንፈሳዊ እንደተጠናከርኩ ተሰማኝ። ይሖዋ [ጭንቀቴን ተቋቁሜ እንድረጋጋ የሚያስፈልገኝን] ብርታት ሰጥቶኛል።

አሌክሳንደር ቮሮንትሶቭ

የትውልድ ዘመን፦ 1984 (ፔቾራ)

ግለ ታሪክ፦ በልጅነቱ ስለ ይሖዋ የተማረው ከቤተሰቡና ከጓደኞቹ ነው። አናጺ ለመሆን ሥልጠና ወስዷል። በ2012 ተጠመቀ። በ2016 ከየሌና ጋር ትዳር መሠረተ

የሰጠው ሐሳብ

የደረሰብህን ፈተና ለመቋቋም የሚረዳ ሐሳብ በመናገር ያበረታታህ ወንድም ወይም እህት አለ?

ፍርድ ቤት ከቀረብኩ በኋላ አንድ ወንድም ፍርድ ቤት ከመቅረቤ በፊት ብቻ ሳይሆን ችሎቱ እየተካሄደ ሳለም ይጸልይልኝ እንደነበር ነገረኝ። የእሱ ምሳሌ ነህምያን አስታወሰኝ። በቀጣዩ ጊዜ ፍርድ ቤት ስቀርብ የእሱን ምሳሌ በመከተል ፍርድ ቤት ውስጥ በነበርኩበት ሰዓት በሙሉ በልቤ ስጸልይ ነበር።—ነህምያ 2:4

ለመጽናት የረዳህ የመጽሐፍ ቅዱስ ዘገባ አለ?

አስቴር ግሩም ምሳሌ ሆናልኛለች። በእሷ ዘመን ሕዝቦቿ ከፍተኛ ስደት ይደርስባቸው ነበር። ለሕዝቦቿ ጥብቅና ለመቆም ድፍረት አስፈልጓታል። እኔም ራሴን በአስቴር ቦታ ለማስቀመጥ እሞክራለሁ፤ ይህም ፍርድ ቤት ለእምነት ባልንጀሮቼ ጥብቅና በምቆምበት ጊዜ ይረዳኛል።

ወንድሞቻችን በይሖዋ ጥሩነት ላይ እምነት በማሳደራቸው አሁንም ሆነ ወደፊት እንደሚባረኩ እርግጠኞች ነን።—መዝሙር 27:13

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች