ኅዳር 29, 2023
ሩሲያ

በሩሲያ ያለው የሳራቶቭ ክልል ፍርድ ቤት አምስት ወንድሞች ጥፋተኛ ናቸው የሚል ብይን አስተላለፈ

አጫውት

ኅዳር 23, 2023 በሳራቶቭ ክልል የሚገኘው የባላኮቭስኪ አውራጃ ፍርድ ቤት በወንድም አሌክሲ ቦጋቶቭ፣ በወንድም ዬቭጌኒ ፎማሺን፣ በወንድም ቭላዲሚር ማቭሪን፣ በወንድም አንድሬ ሙሪክ እና በወንድም ሰርጌ ትዩሪን ላይ ከተመሠረተው ክስ ጋር በተያያዘ ውሳኔውን አሳውቋል። አምስቱም ወንድሞች ጥፋተኛ ናቸው የሚል ብይን ተላልፎባቸዋል። አሌክሲ እና ቭላዲሚር የስድስት ዓመት የገደብ እስራት ተበይኖባቸዋል። አንድሬ፣ ሰርጌ እና ዬቭጌኒ ደግሞ እያንዳንዳቸው 300,000 ሩብል (3,362 የአሜሪካ ዶላር) መቀጮ እንዲከፍሉ ተወስኗል። ሁሉም ወንድሞች በአሁኑ ወቅት ወህኒ አይወርዱም።

አጭር መግለጫ

አሌክሲ ቦጋቶቭ

ትውልድ፦ 1960 (ባክሉሺ፣ ኡልያኖቭስክ ክልል)

ግለ ታሪክ፦ የአምቡላንስ ሹፌር ሆኖ ሠርቷል

በ1982 ከልዩቦቭ ጋር ትዳር መሠረተ። ለአካለ መጠን የደረሱ ሦስት ወንዶች ልጆች አሏቸው

ከይሖዋ ምሥክሮች ጋር መጽሐፍ ቅዱስን ማጥናቱ የአምላክ መንግሥት ለሁሉም የሰው ልጆች ፍትሕ እንደሚያሰፍን ለማወቅ ረዳው። በ1994 ተጠመቀ

የሰጠው ሐሳብ

ማረፊያ ቤት ሳለህ የይሖዋን ድጋፍ ያየኸው እንዴት ነው?

የመጀመሪያውን ወር መጽሐፍ ቅዱስ አልነበረኝም፤ እስክሪብቶና ማስታወሻ ደብተር ግን ነበረኝ። በየዕለቱ ወደ ይሖዋ በመጸለይ ጥቅሶችን እንዳስታውስ እንዲረዳኝ እለምነው ነበር። የወሩ መጨረሻ ላይ 112 ጥቅሶችን አስታውሼ መጻፍ ቻልኩ። ይህ ሁኔታ መጽሐፍ ቅዱስን አዘውትሬ ካነበብኩና ካሰላሰልኩበት ይሖዋ በመንፈስ ቅዱሱ ተጠቅሞ ጥቅሶችን እንዳስታውስ እንደሚረዳኝ አረጋግጦልኛል። ላደረገልኝ እርዳታ ይሖዋን አመሰገንኩት።

ዬቭጌኒ ፎማሺን

ትውልድ፦ 1977 (ባላኮቮ)

ግለ ታሪክ፦ የኤሌክትሪክ ባለሙያ ሆኖ ሠርቷል

በምድር ላይ ሰላምና አንድነት እንደሚሰፍን የሚናገረው የመጽሐፍ ቅዱስ ተስፋ ትኩረቱን ሳበው። በ2013 ተጠመቀ። በአካባቢው ያሉትን መስማት የተሳናቸው ሰዎች ለመርዳት ምልክት ቋንቋ ተምሯል

የሰጠው ሐሳብ

ከዚህ በፊት የታሰሩ ወንድሞች የተዉት ምሳሌ የረዳህ እንዴት ነው?

ማረፊያ ቤት ሳለሁ ስለ ወንድም ኮንስታንቲን ባዠኖቭ፣ ስለ ወንድም አሌክሲ ቡደንቹክ፣ ስለ ወንድም ጀናዲ ጀርመን፣ ስለ ወንድም ሮማን ግሪዳሶቭ፣ ስለ ወንድም ፊሊክስ ማክሃማዲየቭ እና ስለ ወንድም አሌክሲ ሚረትስኪ አሰብኩ፤ እነዚህ ወንድሞች ከ2018-2019 ባለው ጊዜ ውስጥ በዚያው ሕንፃ ታስረው ነበር። እነሱ የተዉት የእምነት ምሳሌ ብርታት ሰጥቶኛል። በተጨማሪም የተለያዩ ችግሮች ቢያጋጥሟቸውም ንጹሕ አቋማቸውን ጠብቀው እየተመላለሱ ስላሉ በዓለም ዙሪያ ያሉ በርካታ ወንድሞችና እህቶች አስባለሁ። ሁላችንም በእነዚህ ፈተናዎች ውስጥ አብረን እያለፍን እንዳለን ይሰማኛል።

ቭላዲሚር ማቭሪን

ትውልድ፦ 1962 (ካሚሾቭካ፣ ሳራቶቭ ክልል)

ግለ ታሪክ፦ በሕንፃ ግንባታና ቤተ ውበት ዘርፍ ይሠራል

በ1994 ተጠመቀ

በ2004 ባለቤቱን በሞት ካጣ በኋላ በአሥራዎቹ ዕድሜ ላይ የሚገኝ ልጁን ብቻውን ማሳደግ ጀመረ። በ2013 ከኢሪና ጋር ትዳር መሠረተ

የሰጠው ሐሳብ

በዚህ ከባድ ሁኔታ ውስጥ ስታልፍ ስለ ይሖዋ ምን ተምረሃል?

በዕብራውያን 13:5 ላይ ይሖዋ “ፈጽሞ አልተውህም፤ በምንም ዓይነት አልጥልህም” በማለት የገባውን ቃል ድሮም አውቀው ነበር። ከታሰርኩና ማረፊያ ቤት ከገባሁ በኋላ ግን የይሖዋን እንክብካቤ ልዩ በሆነ መንገድ አይቻለሁ። ውስጣዊ መረጋጋትን፣ ሰላምንና ጥንካሬን አብዝቶ ሰጥቶኛል። በተጨማሪም ይሖዋ ሁሌም ቢሆን ለጸሎቴ መልስ የሚሰጠው ከሁሉ በተሻለ መንገድ እንደሆነ አስተውያለሁ። በዚህ ፈታኝ ጊዜ ብቻዬን እንደሆንኩ ፈጽሞ ተሰምቶኝ አያውቅም።

አንድሬ ሙሪክ

ትውልድ፦ 1991 (ባላኮቮ)

ግለ ታሪክ፦ የብረት ሥራ ይሠራል

መጀመሪያ ስለ መጽሐፍ ቅዱስ ያስተማረችው አያቱ ናት። የመጽሐፍ ቅዱስ ትንቢቶች ፍጻሜ አስደነቀው። በ2007 ተጠመቀ

በ2009 ከአናስታሲያ ጋር ትዳር መሠረተ። አንዲት ሴት ልጅ አለቻቸው

የሰጠው ሐሳብ

ማረፊያ ቤት መግባት ያሉትን ተፈታታኝ ሁኔታዎች ለመቋቋም የረዳህ ምንድን ነው?

ማረፊያ ቤት ከገባሁ በኋላ፣ በተለይ በመጀመሪያዎቹ ሁለት ወራት በጣም የከበደኝ ደስታዬን ጠብቄ መቀጠል ነው። በወቅቱ የረዳኝ አንዱ ነገር በዚያ ከባድ ሁኔታ ውስጥም እንኳ የሚኖረኝ አመለካከት ይሖዋ ላደረገልኝ ነገር አመስጋኝ መሆን አለመሆኔን ሊያሳይ እንደሚችል ማሰቤ ነው። ለይሖዋ አመስጋኝነቴን ማሳየት የምችልበት ከሁሉ የተሻለው መንገድ በደስታ ንጹሕ አቋሜን ጠብቄ መቀጠሌ ነው። ይህ ሁኔታ በይሖዋ እርዳታ ማንኛውንም ነገር መወጣት እንደምችል ያለኝን ቁርጠኝነትም አጠናክሮልኛል። ይሖዋ በማንኛውም ሁኔታ ውስጥ ሰላም ሊሰጠኝ ይችላል።

ሰርጌ ትዩሪን

ትውልድ፦ 1994 (ባላኮቮ)

ግለ ታሪክ፦ የኤሌክትሪክ ባለሙያ ሆኖ ሠርቷል

መጀመሪያ ስለ መጽሐፍ ቅዱስ ያስተማረችው አያቱ ናት። ስኬታማ ለመሆን ቁልፉ የመጽሐፍ ቅዱስን ምክሮች ሥራ ላይ ማዋል እንደሆነ ተገነዘበ። በ2012 ተጠመቀ

በ2018 ከዬሊዛቬታ ጋር ትዳር መሠረተ

የሰጠው ሐሳብ

በእምነትህ ምክንያት ለስደት በመዳረግህ ምን ትምህርት አግኝተሃል?

ሦስት ነገሮችን ተምሬአለሁ። አንደኛ፣ ይሖዋ ሁሌም ከጎኔ ሆኖ ይረዳኛል። የሚያስፈልገኝ ነገር ምን እንደሆነና ያ ነገር መቼ እንደሚያስፈልገኝ ያውቃል። ሁለተኛ፣ ውስጣዊ ሰላሜን ይዤ መቀጠል ከፈለግኩ ይሖዋ በሰጣቸው ተስፋዎች ላይ እምነት ማሳደሬ በጣም አስፈላጊ ነው። ስደት ቀላል ባይሆንም ወደፊት ከሚጠብቀን ዘላለማዊ በረከት ጋር ሲነጻጸር የሚቆየው ለአጭር ጊዜ ብቻ ነው። በቅርቡ እነዚህ ችግሮች ትዝ እንኳ የማይሉኝ ጊዜ ይመጣል። ሦስተኛ፣ በወንድማማች ማኅበራችን ውስጥ ያለው አንድነት በጣም ውድ ነው። ይህ አንድነት ፈተናዎችን መወጣት ቀላል እንዲሆንልን ያደርጋል፤ ስለዚህ ሁሌም ልንጠብቀው ይገባል።

የእነዚህ አምስት ታማኝ ወንድሞች ምሳሌ ይሖዋ በሚሰጠው ኃይል እስከታመንን ድረስ በምሥራቹ ምክንያት የሚደርስብንን መከራ መቋቋም እንደምንችል ያሳያል።—2 ጢሞቴዎስ 1:8

የክሱ ሂደት

የካቲት 11, 2022

የወንጀል ክስ ተመሠረተባቸው
መጋቢት 23, 2022

የፌዴራል ደህንነት አባላት የአምስቱንም ወንድሞች ቤቶች ፈተሹ። እያንዳንዳቸው ምርመራ ከተደረገባቸው በኋላ ወደ ጊዜያዊ ማቆያ ጣቢያ ተወሰዱ
መጋቢት 25, 2022

ወንድሞች ማረፊያ ቤት ገቡ
ጥር 23, 2023

ወንድሞች ከእስር ተለቀው የጉዞ ገደብ ተጣለባቸው
ሐምሌ 21, 2023

ክሳቸው በፍርድ ቤት መታየት ጀመረ
ኅዳር 23, 2023

ጥፋተኛ ናቸው ተብሎ ተፈረደባቸው

በተጨማሪም ይህን ተመልከት

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች