ኅዳር 21, 2023
ሩሲያ

በቱላ፣ ሩሲያ ያሉ አራት የይሖዋ ምሥክሮች የገደብ እስራት ተፈረደባቸው

አጫውት

ኅዳር 20, 2023 በቱላ የሚገኘው የፕሮሌታርስኪ አውራጃ ፍርድ ቤት ወንድም ዬቭጌኒ ጎዱኖቭ፣ ወንድም ጉራሚ ላባድዜ፣ እህት ዩልያ ፖፕኮቫ እና እህት አንጂላ ፑቲቭስካያ ጥፋተኛ ናቸው የሚል ብይን አስተላልፏል። ወንድም ዬቭጌኒ እና ወንድም ጉራሚ የስድስት ዓመት ተኩል የገደብ እስራት ተፈርዶባቸዋል። እህት ዩልያ እና እህት አንጂላ ደግሞ የሁለት ዓመት ተኩል የገደብ እስራት ተፈርዶባቸዋል። በአሁኑ ወቅት ወህኒ አይወርዱም።

አጭር መግለጫ

ዬቭጌኒ ጎዱኖቭ

ትውልድ፦ 1986 (ኔቪኖምይስክ፣ ስታቭሮፖል ክልል)

ግለ ታሪክ፦ የኮምፒውተርና ቴሌቪዥን ጥገና ሥራ ይሠራል

እናቱና አያቱ የይሖዋ ምሥክሮች ስለሆኑ ያደገው በይሖዋ ምሥክሮች ቤተሰብ ውስጥ ነው። በ2001 ተጠመቀ

በ2012 ከዬሌና ጋር ትዳር መሠረተ

የሰጠው ሐሳብ

በማረፊያ ቤት ቆይታህ ምን ትምህርት አግኝተሃል?

ዮሴፍ እስር ቤት ስለነበረበት ጊዜ አሰብኩ። ዘፍጥረት 39:23 ‘ይሖዋ ከዮሴፍ ጋር እንደነበርና የሚያደርገውን ነገር ሁሉ ያሳካለት’ እንደነበር ይናገራል። እዚያ በታሰርኩበት ጊዜ፣ ከይሖዋ ጋር የጠበቀ ዝምድና እስካለኝ ድረስ ማንኛውንም ሁኔታ በደስታ መቋቋም እንደምችል ተገነዘብኩ። መክብብ 8:12 እንደሚለው “እውነተኛውን አምላክ የሚፈሩ ሰዎች አምላክን በመፍራታቸው የኋላ ኋላ መልካም [ይሆንላቸዋል]።”

ጉራሚ ላባድዜ

ትውልድ፦ 1963 (ኒግቭዛራ፣ ጆርጂያ)

ግለ ታሪክ፦ መካኒክ እና የታክሲ ሹፌር ሆኖ ሠርቷል

በእናቱና በታላቅ እህቱ አማካኝነት ከይሖዋ ምሥክሮች ጋር ተዋወቀ። የመጽሐፍ ቅዱስን ምክሮች በሕይወቱ ውስጥ ሥራ ላይ ማዋሉ ምን ያህል እንደጠቀመው አስተዋለ። በይሖዋ ምሥክሮች መካከል ያየው ፍቅር በጣም አስደነቀው። በ1996 ተጠመቀ

በ1995 ከጋሊና ጋር ትዳር መሠረተ። አንድ ወንድ ልጅ አላቸው

የሰጠው ሐሳብ

የሌሎችን እርዳታ መቀበል የከበደህ ለምንድን ነው?

ድጋፍ ከሚያደርጉልኝ ወንድሞችና እህቶች መካከል አብዛኞቹ በቁሳዊ ብዙ እንደሌላቸው ስለማውቅ መጀመሪያ ላይ እርዳታቸውን መቀበል ከብዶኝ ነበር። በኋላ ግን ኢየሱስ የተናገረውን “ከመቀበል ይልቅ መስጠት የበለጠ ደስታ ያስገኛል” የሚለውን ሐሳብ አሰብኩበት። (የሐዋርያት ሥራ 20:35) ወንድሞቼና እህቶቼ ደስተኛ እንዲሆኑ ስለምፈልግ የሚሰጡበት አጋጣሚ ልሰጣቸው እንደሚገባ ተገነዘብኩ። ‘ያቺ ድሃ መበለት ኢየሱስ በአዘኔታ ተነሳስቶ ሁለቱን ሳንቲሞች ለራሷ እንድትይዛቸው ቢነግራት ኖሮ ምን ይሰማት ነበር?’ ብዬ አሰብኩ። (ማርቆስ 12:41-44) ወንድሞች ላደረጉልኝ እንክብካቤ አመስጋኝነቴን ለመግለጽ ቃላት ያጥረኛል። ያለሁበት ያልተለመደ ሁኔታ ወደ ይሖዋ ይበልጥ እንድቀርብ አድርጎኛል። የሌላ ሰው ታሪክ እያነበብኩ አይደለም ያለሁት። የይሖዋን ድጋፍ በገዛ ሕይወቴ እያየሁ ነው።

ዩልያ ፖፕኮቫ

ትውልድ፦ 1978 (ቦጎሮዲትስክ፣ ቱላ ክልል)

ግለ ታሪክ፦ መዋዕለ ሕፃናት ውስጥ ትሠራ ነበር

አብራት የተማረች ልጅ በይሖዋ ምሥክሮች ስብሰባ ላይ እንድትገኝ ጋበዘቻት። ከዚያም መጽሐፍ ቅዱስን ማጥናት የጀመረች ሲሆን ይሖዋን እንደ አፍቃሪ አባት አድርጋ መመልከት ጀመረች። በ1999 ተጠመቀች

የሰጠችው ሐሳብ

ከይሖዋ ጋር የጠበቀ ዝምድና መመሥረትሽ ማረፊያ ቤት ሳለሽ የጠቀመሽ እንዴት ነው?

በሕይወቴ ውስጥ አለኝ የምለው ውዱ ነገር ከይሖዋ ጋር ያለኝ ዝምድና እንደሆነ ግልጽ የሆነልኝ ገና ማረፊያ ቤት እንደደረስኩ ነው። በመንፈሳዊ እንቅስቃሴዎች ስለተጠመድን ብቻ ከይሖዋ ጋር የጠበቀ ዝምድና ይኖረናል ማለት አይደለም። እነዚህ ፈተናዎች ከመምጣታቸው በፊት ከይሖዋ ጋር ያለኝን ወዳጅነት ለማጠናከር ከፍተኛ ጥረት አደርግ ስለነበር ይህን ሁኔታ ያየሁት ለይሖዋ ታማኝ ወዳጁ መሆን እንደምፈልግ ለማሳየት እንደሚያስችለኝ አጋጣሚ አድርጌ ነው። ታማኝነቴን ምን ያህል ከፍ አድርጎ እንደሚመለከት ማወቄ እስከ መጨረሻው በዚህ ጎዳና ለመቀጠል ያለኝን ቁርጠኝነት አጠናክሮልኛል። እውነት ለመናገር፣ የምፈራው አንድ ነገር ቢኖር ይሖዋን ማሳዘን ብቻ ነው።

የእነዚህ ወንድሞችና እህቶች ምሳሌ እኛም በይሖዋ ከታመንን እንዲሁም በመጽሐፍ ቅዱስ ውስጥ የሚገኙትን የእምነት ምሳሌዎች ለመከተል ጥረት ካደረግን ማጽናኛና ተስፋ ማግኘት እንደምንችል ያረጋግጡልናል።—ሮም 15:4

የክሱ ሂደት

መጋቢት 25, 2021

የወንጀል ክስ ተመሠረተባቸው
ሚያዝያ 13, 2021

ቤታቸው ተፈተሸ። አንጂላ እና ዩልያ ታሰሩ
ሚያዝያ 14, 2021

አንጂላ እና ዩልያ ወደ ማረፊያ ቤት ተወሰዱ። ዬቭጌኒ የታሰረ ሲሆን ጥፋተኛ ነው የሚል ብይን ተላለፈበት። ጉራሚ በቁም እስር እንዲቆይ ተደረገ
ሚያዝያ 16, 2021

ዬቭጌኒ ወደ ማረፊያ ቤት ተወሰደ
ግንቦት 20, 2021

አንጂላ፣ ዬቭጌኒ እና ዩልያ ከማረፊያ ቤት ወጥተው በቁም እስር እንዲቆዩ ተደረጉ
ሐምሌ 22, 2021

አንጂላ፣ ዬቭጌኒ እና ዩልያ ከቁም እስር ተለቀው የጉዞ ገደብ ተጣለባቸው
ሐምሌ 23, 2021

ጉራሚ ከቁም እስር ተለቆ የጉዞ ገደብ ተጣለበት
ግንቦት 11, 2023

ክሳቸው በፍርድ ቤት መታየት ጀመረ
ኅዳር 20, 2023

ጥፋተኛ ናቸው የሚል ብይን ተላልፎባቸው የገደብ እስራት ተፈረደባቸው