ጥር 20, 2022
ሩሲያ

በካርፒንስክ ከተማ ያሉ የይሖዋ ምሥክሮች በይሖዋ መታመናቸውንና እምነታቸውን ማጠናከራቸውን ቀጥለዋል

አጫውት

በስቬርድሎቭስክ ክልል የሚገኘው የካርፒንስኪ ከተማ ፍርድ ቤት የእህት ዳርያ ዱሎቫን፣ የእህት ቨነራ ዱሎቫን፣ የወንድም አሌክሳንደር ፕሪያኒኮቭን እና የእህት አናስታሲያ ፕሪያኒኮቫን እንዲሁም የእህት ስቬትላና ዛልያዬቫን ጉዳይ ተመልክቶ በቅርቡ ውሳኔውን ያሳልፋል። አቃቤ ሕጉ እንዲተላለፍባቸው የሚፈልገውን ብይን ገና አላሳወቀም

የክሱ ሂደት

ጥር 27, 2020

አሌክሳንደር፣ ዳርያ እና ቨነራ በተመሠረተባቸው ሌላ ክስ ፍርድ ተላለፈባቸው
የካቲት 2020

በአሌክሳንደር፣ በዳርያ እና በቨነራ ላይ ሁለተኛ የወንጀል ክስ ተመሠረተባቸው
መጋቢት 30, 2020

ባለሥልጣናት ክስ የተመሠረተባቸውን የይሖዋ ምሥክሮች ቤቶች በረበሩ፤ እንዲሁም የኤሌክትሮኒክ መሣሪያዎቻቸውን ወረሱ
ግንቦት 19, 2020

አናስታሲያ እና ስቬትላና በወንጀል ክሱ ውስጥ ተካተቱ። ሁለቱም አካባቢያቸውን ለቀው እንዳይሄዱ ታዘዙ
ሚያዝያ 29, 2021

ጉዳያቸው በፍርድ ቤት መታየት ጀመረ

አጭር መግለጫ

ዳርያ ዱሎቫ

የትውልድ ዘመን፦ 2000 (ካርፒንስኪ፣ ስቬርድሎቭስክ ክልል)

ግለ ታሪክ፦ ከሦስት ልጆች የመጨረሻዋ ነች። ሥነ ጥበብንና ስፖርትን ጨምሮ ብዙ ነገሮች ትወዳለች

በልጅነቷ ሰዎች የመጽሐፍ ቅዱስን መሠረታዊ ሥርዓቶች አክብረው ሲኖሩ ስታይ ተገረመች። በ2016 ተጠምቃ የይሖዋ ምሥክር ሆነች

የሰጠችው ሐሳብ

በዚህ ፈተና ወቅት ከይሖዋ ጋር ያለሽ ወዳጅነት የተጠናከረው እንዴት ነው?

በደረሱብኝ ፈተናዎች ምክንያት ይሖዋ ይበልጥ እውን ሆኖልኛል። . . . ይሖዋ በጥቃቅን ነገሮች ጭምር እንዴት እንደረዳኝ ስመለከት ይሖዋ ፈጽሞ እንደማይተወኝ እርግጠኛ ሆኛለሁ፤ ይህም ይበልጥ ደፋር እንድሆን ረድቶኛል። . . . ሮም 8:38, 39ም በጣም ያበረታታኛል።

ቨነራ ዱሎቫ

የትውልድ ዘመን፦ 1968 (ካርፒንስኪ፣ ስቬርድሎቭስክ ክልል)

ግለ ታሪክ፦ ያሳደጓት እናቷና አያቷ ናቸው። ሹራብ ሥራ፣ ማንበብ እና ማጥናት ትወዳለች። ገና 17 ዓመት ሳይሆናት በፊት እናቷንና አያቷን በሞት አጣች። በ1990 ትዳር መሠረተች። ሦስት ልጆች አሏት

‘የምንሞተው ለምንድን ነው?’ እንዲሁም ‘የልጆቼ የወደፊት ሕይወት ምን ይመስል ይሆን?’ የሚሉት ጥያቄዎች ያሳስቧት ነበር። በ28 ዓመቷ ከይሖዋ ምሥክሮች ጋር ማጥናት ጀመረች። በ1998 ተጠመቀች

የሰጠችው ሐሳብ

በዚህ ወቅት የይሖዋን ድጋፍ ያየሽው በየትኞቹ መንገዶች ነው?

መጀመሪያ ላይ ይቃወሙኝ የነበሩት ቤተሰቦቼ እና ባለቤቴ አሁን አሳቢነት ያሳዩናል። ባለቤቴ ያመሰግነኛል እንዲሁም ተስፋ እንዳልቆርጥ ያበረታታኛል። . . . ይሖዋ መንፈሳዊ ወንድሞቻችንና እህቶቻችን በሚናገሯቸው አበረታች ቃላት አማካኝነትም ይረዳናል።

ቤታችን ለመጀመሪያ ጊዜ ከተፈተሸ በኋላ ወዲያውኑ ወደ አእምሮዬ የመጣው ‘የወንጀል ክስ ተመሠረተብኝ? ይህማ ፈጽሞ ሊሆን አይችልም! ምን ዓይነት ጣጣ ነው!’ የሚል ሐሳብ ነበር። በኋላ ግን አንዲት ጓደኛዬ ‘እንደ ኢየሱስ ድል አድራጊ ነኝ’ ብዬ እንዳስብ አበረታታችኝ።

አሌክሳንደር ፕሪያኒኮቭ

የትውልድ ዘመን፦ 1987 (ኡዲንስክ፣ ካባረቭስክ ክልል)

ግለ ታሪክ፦ ሙዚቃ ይወዳል። አኮርዲዮን ይጫወታል። በአንድ ፋብሪካ ውስጥ የኤሌክትሪክ ባለሙያ ሆኖ ይሠራ ነበር። አሁን የሚሠራው የወለልና የግድግዳ ንጣፍ ነው

አምላክ መኖሩን ከበፊትም ጀምሮ ያምን ነበር። አምላክ ሞትን እንደሚያስቀር የገባው ቃል ልቡን ነካው። በ2004 ተጠመቀ። በ2011 ከአናስታሲያ ጋር ትዳር መሠረተ

የሰጠው ሐሳብ

በዚህ ፈተና ወቅት ወንድሞች ያበረታቱህ እንዴት ነው?

አንድ ወንድም በመዝሙር 139:1 ላይ እንድናሰላስል ረዳን። እንዲህ አለን፦ “ይሖዋ በጣም ስለሚወዳችሁ የምታስቡትን፣ የሚሰማችሁን፣ የምትናገሩትንና የምታደርጉትን እያንዳንዱን ነገር ይከታተላል። . . . ንጉሥ ዳዊት ይሖዋ ለእያንዳንዳችን ምን ያህል ትኩረት እንደሚሰጠን ተረድቶ ነበር። . . . ማንነታችንን የቀረጹትን ነገሮች በሙሉ በጥንቃቄ ያስተውላል። መቼም ቢሆን ብቻችንን እንዳለን ሊሰማን አይገባም።” ይህ ሐሳብ ልቤን በጥልቅ ነካው። ይሖዋ ሁልጊዜ ከጎኔ እንደሆነ ይሰማኛል።

አናስታሲያ ፕሪያኒኮቫ

የትውልድ ዘመን፦ 1987 (ካርፒንስኪ፣ ስቬርድሎቭስክ ክልል)

ግለ ታሪክ፦ እሷንና ታላቅ ወንድሟን ያሳደገቻቸው እናቷ ናት። ሙዚቃ እና ልብስ ስፌት ትወዳለች

መጽሐፍ ቅዱስ ወደፊት ሰላም እንደሚሰፍን የሚሰጠው ተስፋ አስደሰታት። መጽሐፍ ቅዱስ ጠቃሚና ጥበብ የሚንጸባረቅበት ምክር እንደያዘ ተረዳች። በ2002 ተጠመቀች። በ2011 ከአሌክሳንደር ጋር ትዳር መሠረተች

የሰጠችው ሐሳብ

በዚህ ፈተና ወቅት ከይሖዋ ጋር ያለሽ ወዳጅነት የተጠናከረው እንዴት ነው?

የፍርድ ሂደቱ ከተጀመረበት ጊዜ አንስቶ ባሉት ለሦስት የሚጠጉ ዓመታት እምነቴ በእጅጉ ተጠናክሯል። በይሖዋ ይበልጥ መተማመን ጀምሬያለሁ። ይሖዋ ሁሉንም ነገር እንደሚቆጣጠር ተገንዝቤያለሁ። አንዳንድ ጊዜ መውጫ ቀዳዳ የሌለ ቢመስልም እንኳ እሱ መውጫውን ያዘጋጃል። በተጨማሪም ስደቱ በበረታ መጠን ይሖዋን ይበልጥ ለማገልገል እንደምነሳሳ አስተውያለሁ።

ስቬትላና ዛልያዬቫ

የትውልድ ዘመን፦ 1975 (ቮልቻንስክ፣ ስቬርድሎቭስክ ክልል)

ግለ ታሪክ፦ ከሦስት ልጆች መካከል አንዷ ነች። በልጅነቷ እናቷን በሞት አጣች። በወጣትነቷ ሆኪ እና መረብ ኳስ መጫወት ያስደስታት ነበር። በድንጋይ ከሰል ማውጫ ውስጥ ሠርታለች። አሁን ጡረታ ወጥታለች። በ2003 ሩስላንን አገባች። አራት ልጆች አሏቸው

መጽሐፍ ቅዱስ ትክክል መሆኑን ካመነች በኋላ በመጽሐፍ ቅዱስ መሥፈርቶች ሕይወቷን ለመምራት ተነሳሳች። በ2016 ተጠመቀች

የሰጠችው ሐሳብ

ይሖዋ ደፋር እና ደስተኛ ሆነሽ እንድትጸኚ እየረዳሽ ያለው እንዴት ነው?

በይሖዋ እስከታመንን እና ለመረጋጋት ጥረት እስካደረግን ድረስ ምንም ዓይነት ነገር ቢመጣ እኔ፣ ባለቤቴና ልጆቼ ሁሉንም ፈተናዎች በጽናት መቋቋም እንደምንችል ቅንጣት ታክል አልጠራጠርም!

ሩሲያ ውስጥ በወንድሞቻችንና በእህቶቻችን ላይ የሚደርሰው ስደት ቢቀጥልም ይሖዋ እነዚህን ውድ ክርስቲያኖች በፍቅር መንከባከቡንና መደገፉን እንደቀጠለ ማየት ምንኛ እምነት የሚያጠናክር ነው! ተፈትኖ የተረጋገጠው እምነታቸው ለይሖዋ ስም “ምስጋናን፣ ግርማንና ክብርን” እያስገኘ ነው።—1 ጴጥሮስ 1:7

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች