ሐምሌ 10, 2023
ሩሲያ

በኮምሶሞልስክ ና አሙሪ ሦስት እህቶች ተፈረደባቸው

አጫውት

መጋቢት 23, 2023 በኮምሶሞልስክ ና አሙሪ የሚገኘው የሴንትራልኒ አውራጃ ፍርድ ቤት እህት ታትያና ቦንዳሬንኮ፣ እህት ዬሌና ኔስቴሮቫ እና እህት ታትያና ስቮቦዳ ጥፋተኛ ናቸው የሚል ውሳኔ አስተላለፈ። እያንዳንዳቸው የአምስት ዓመት የገደብ እስራት ተፈርዶባቸዋል። በአሁኑ ወቅት ወህኒ አይወርዱም።

አጭር መግለጫ

ታትያና ቦንዳሬንኮ

ትውልድ፦ 1960 (ኮምሶሞልስክ ና አሙሪ ኻባረቭስክ ክልል)

ግለ ታሪክ፦ የወፍጮ ኦፐሬተር በኋላም የጽዳት ሠራተኛ ነበረች

በ1992 ቭላዲሚርን አገባች። ሦስት ወንዶች ልጆች አሏቸው

አምላክ ለሰው ልጆች ያለውን ዓላማና ምድር ገነት እንደምትሆን የሚናገረውን ተስፋ ስታውቅ መጽሐፍ ቅዱስን ለማጥናት ተነሳሳች። በ2005 ተጠመቀች

የሰጠችው ሐሳብ

በዚህ አስቸጋሪ ጊዜ ውስጥ ይሖዋ የረዳሽ እንዴት ነው?

ባለቤቴ የይሖዋ ምሥክር አይደለም፤ ቤታችን ሲፈተሽ እሱ ሐኪም ቤት ነበር። ሕክምናውን ጨርሶ ወደ ቤት ሊመለስ እንደሆነ ሊነግረኝ ፈልጎ ደውሎልኝ ነበር። ሆኖም ባለሥልጣናቱ ስልኬን ወስደውብኝ ስለነበር ልንገናኝ አልቻልንም። አዲስ ስልክ አግኝቼ ልደውልለትና ምን እንደተፈጠረ ላስረዳው የቻልኩት ምሽት ላይ ምርመራው ካበቃ በኋላ ነበር። በጣም ተረብሸን ነበር። ስለዚህ ይሖዋን እንዲያረጋጋኝ ለመንኩት፤ እሱም ጸሎቴን መለሰልኝ። በዚያ ምሽት እኔና ባለቤቴ ወደ ቤት ስንመለስ ባለቤቴ በደግነት ነው የያዘኝ፤ በፍተሻው የተመሰቃቀለውን ቤታችንን በማስተካከልም ረዳኝ። ይህ ሁኔታ በይሖዋ ላይ ይበልጥ እንድተማመን አድርጎኛል።

ዬሌና ኔስቴሮቫ

ትውልድ: 1967 (ኮምሶሞልስክ ና አሙሪ)

ግለ ታሪክ፦ የሒሳብ ባለሙያ ሆና ሠርታለች

ሁለት ሴቶች ልጆች ወልዳለች፤ አንደኛዋ በ1998 ሕይወቷ አልፏል

ከይሖዋ ምሥክሮች ጋር የተዋወቀችው አንድ የይሖዋ ምሥክር ጠበቃ በቀጠረችበት ወቅት ነው። የይሖዋ ምሥክሮች ሐቀኞች እንደሆኑና ለምታነሳቸው ጥያቄዎች ሁሉ መጽሐፍ ቅዱስን ተጠቅመው እንደሚመልሱላት ስትመለከት ተደነቀች። በ1997 ተጠመቀች።

የሰጠችው ሐሳብ

ይህ አስቸጋሪ ሁኔታ ምን አስተማረሽ?

ታዛዦች እንድንሆን የተሰጠንን ምክር ተግባራዊ ማድረግ ያለውን ጥቅም ከበፊቱ ይበልጥ አሁን ተረድቻለሁ። ክስ ከተመሠረተብኝ ብዙም ሳይቆይ፣ አንድ ወንድም ለፍርድ ቤቱ የማቀርበውን የመጨረሻ ሐሳብ ማዘጋጀት እንድጀምር ሐሳብ ሰጠኝ። ለፍርድ ቤቱ የመጨረሻ ሐሳቤን የማቀርበው የፍርድ ሂደቱ ከተጠናቀቀ በኋላ ነው፤ ስለዚህ ‘ገና ምኑ ተጀመረ’ ብዬ አሰብኩ። ነገር ግን ስለ ጉዳዩ ጸለይኩና ምን ሐሳብ እንደማቀርብ መጻፍ ጀመርኩ። የፍርድ ሂደቱ የተከናወነው በጥድፊያ ነበር፤ አስቀድሜ ተዘጋጅቼ ባይሆን ኖሮ በዳኞቹ ፊት ጥሩ ምሥክርነት መስጠት አልችልም ነበር። ምክንያቱ ግልጽ ባልሆነልኝ ጊዜ እንኳ የወንድሞችን ምክር መስማቴ እውነትም ጠቅሞኛል።

ታትያና ስቮቦዳ

ትውልድ፦ 1959 (ኮምሶሞልስክ ና አሙሪ)

ግለ ታሪክ፦ የግዢ ባለሙያና የመጋዘን ተቆጣጣሪ ሆና ሠርታለች። አሁን ጡረታ ወጥታለች

የአምላክን የግል ስም ስታውቅና ከእሱ ጋር የቅርብ ወዳጅነት መመሥረት እንደምትችል ስታውቅ ልቧ ተነካ። በ2001 ተጠመቀች

የሰጠችው ሐሳብ

በይሖዋ ላይ መተማመንሽን እንድትቀጥዪ የረዳሽ ምንድን ነው?

ከዚህ በፊት ታማኝነታቸውን የጠበቁ ክርስቲያኖች ምሳሌ፣ እኔም ለይሖዋ ከሉዓላዊነቱ ጎን እንደቆምኩ ለማሳየት አነሳስቶኛል። ጽድቅንና ታማኝነትን የመሰሉ ጥሩ ባሕርያትን ማዳበሬን መቀጠልም እፈልጋለሁ። ሕይወቴን እየመራሁ ያለሁት ይሖዋ በሚፈልገው መንገድ መሆን አውቃለሁ፤ ይህም በእሱ ዘንድ ተቀባይነት እንዳገኘሁ እርግጠኛ እንድሆን አስችሎኛል።

ይሖዋ፣ መከራን ተቋቁመው ታማኝነታቸውን የጠበቁትን እህቶቻችንን እንዲባርካቸውና እንዲያበረታቸው እንጸልያለን።—ሩት 2:12

የክሱ ሂደት

መስከረም 21, 2021

ታትያና ስቮቦዳ የክስ ፋይል ተከፈተባት
ጥቅምት 18, 2021

ታትያና ቦንዳሬንኮ እና ዬሌና ኔስቴሮቫ በክስ ፋይሉ ውስጥ ተካተቱ
ጥቅምት 20, 2021

ቤታቸው ተፈተሸ
ነሐሴ 28, 2022

ክስ ተመሠረተባቸው
ታኅሣሥ 28, 2022

የወንጀል ክሶቹ በፍርድ ቤት መታየት ጀመሩ
መጋቢት 23, 2023

ጥፋተኞች ናቸው የሚል ብያኔ ተሰጠ፤ እንዲሁም እያንዳንዳቸው የአምስት ዓመት የገደብ እስራት ተፈረደባቸው

በተጨማሪም ይህን ተመልከት

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች