ሐምሌ 22, 2022 | የታደሰው፦ ጥር 30, 2024
ሩሲያ

ወቅታዊ መረጃ—መቀጮ ተጣለባቸው | በሹያ ያሉ የይሖዋ ምሥክሮች የደረሰባቸውን ግፍ ተቋቁመዋል

አጫውት

ጥር 29, 2024 በኢቫኖቮ ክልል የሚገኘው የሹያ ከተማ ፍርድ ቤት ወንድም አሌክሲ አርሂፖቭ፣ ወንድም ዲሚትሪ ሚኻይሎቭ እና ባለቤቱ የሌና እንዲሁም እህት ስቬትላና ርዥኮቭ እና እህት ስቬትላና ሺሺና ጥፋተኛ ናቸው የሚል ብይን አስተላልፏል። አሌክሲ የ350,000 ሩብል (3,920 የአሜሪካ ዶላር)፣ ዲሚትሪ የ950,000 ሩብል (10,640 ዶላር)፣ የሌና የ560,000 ሩብልስ (6,270 ዶላር) ስቬትላና ርዥኮቭ የ480,000 ሩብል (5,380 ዶላር) እና ስቬትላና ሺሺና የ400,000 ሩብል (4,480 ዶላር) መቀጮ ተፈርዶባቸዋል።

የክሱ ሂደት

መስከረም 21, 2017

ዳኛው የወንድም ዲሚትሪ ሚኻይሎቭ እና የባለቤቱ ስልክ እንዲጠለፍ ፈቃድ ሰጠ
ጥር 15, 2018

ዳኛው የእህት ስቬትላና ርዥኮቭ ስልክ እንዲጠለፍ እንዲሁም ቤቷ በቪዲዮ ካሜራ እየታየ ክትትል እንዲደረግበት ፈቃድ ሰጠ
ሚያዝያ 20, 2018

ባለሥልጣናቱ የአምስቱንም የይሖዋ ምሥክሮች ቤቶች ፈተሹ
ግንቦት 29, 2018

ፖሊሶች ዲሚትሪን ከያዙት በኋላ የጽንፈኛ ድርጅትን እንቅስቃሴ በገንዘብ በመደገፍ ወንጀል ከሰሱት። ከዚያም ማረፊያ ቤት እንዲቆይ ተደረገ
ሰኔ 22, 2018

አሌክሲም በክሱ ውስጥ እንዲካተት ተደረገ፤ አካባቢውን ለቅቆ እንዳይሄድ ታገደ
ሰኔ 27, 2018

እህት የሌና ሚኻይሎቭ፣ እህት ስቬትላና ርዥኮቭ እና እህት ስቬትላና ሺሺና በክሱ ውስጥ ተካተቱ
ኅዳር 15, 2018

ይግባኝ ሰሚ ፍርድ ቤቱ ዲሚትሪ ከማረፊያ ቤት እንዲለቀቅ ወሰነ፤ በዚያ ለስድስት ወራት ገደማ ቆይቷል
ነሐሴ 10, 2021

ክሱ በፍርድ ቤት መታየት ጀመረ
መስከረም 16, 2021

ጉዳዩን አቃቤ ሕጉ እንዲመለከተው ወደ እሱ ተመለሰ
ግንቦት 25, 2022

የክሱ ሂደት ቀጠለ

አጭር መግለጫ

አሌክሲ አርሂፖቭ

የትውልድ ዘመን፦ 1960 (አርሃንግዬልስክ፣ አርሃንግዬልስክ ክልል)

ግለ ታሪክ፦ ጦር ሠራዊት ውስጥ አገልግሏል። የአውቶቡስ ሹፌር ነበር

በ1984 ከናታሊያ ጋር ትዳር መሠረተ። ሁለት ልጆቻቸውን አሳድገዋል። ጡረታ ከወጣ በኋላ በዕድሜ የገፉትን የናታሊያ ወላጆች ለመንከባከብ ወደ ሹያ ሄዱ

እውነትን የሰማው ከሥራ ባልደረባው ነው። በ2017 ተጠምቆ የይሖዋ ምሥክር ሆነ

የሰጠው ሐሳብ

በዚህ ጊዜ አዎንታዊ አመለካከት ይዘህ እንድትቀጥል የረዱህ የትኞቹ የመጽሐፍ ቅዱስ ጥቅሶች ናቸው?

በ1 ቆሮንቶስ 10:24 ላይ የሚገኘው ምክር ረድቶኛል። ጥቅሱ “እያንዳንዱ ሰው ምንጊዜም የራሱን ጥቅም ሳይሆን የሌላውን ሰው ጥቅም ይፈልግ” ይላል። ይህ ጥቅስ ስለ ራሴ ችግር ብቻ ከማሰብ ይልቅ ስለ ሌሎች ይበልጥ እንዳስብ ያስታውሰኛል።

ኢየሱስ በማቴዎስ 5:10-12 ላይ የተናገረው ነገርም በጣም አበረታቶኛል፦ “ለጽድቅ ሲሉ ስደት የሚደርስባቸው ደስተኞች ናቸው፤ . . . በእኔ ምክንያት ሰዎች . . . ክፉውን ሁሉ በውሸት ሲያስወሩባችሁ ደስተኞች ናችሁ። በሰማያት የሚጠብቃችሁ ሽልማት ታላቅ ስለሆነ ሐሴት አድርጉ፤ በደስታም ፈንጥዙ፤ ከእናንተ በፊት የነበሩትን ነቢያት እንደዚሁ ስደት አድርሰውባቸው ነበርና።” ይህ ጥቅስ ድፍረት፣ ጽናትና ተስፋ ይሰጠኛል።

ዲሚትሪ ሚኻይሎቭ

የትውልድ ዘመን፦ 1977 (ኩፕቻኖቭካ፣ ካዛክስታን)

ግለ ታሪክ፦ ኤሌክትሮኒክስ ተምሯል። የሲስተም ተቆጣጣሪ ሆኖ ሠርቷል። ፎቶግራፍ ማንሳትና ቪዲዮ ኤዲት ማድረግ ይወዳል

እውነትን የሰማው በአሥራዎቹ ዕድሜ ውስጥ እያለ ነው። በ1993 ተጠመቀ። በ2003 ከየሌና ጋር ትዳር መሠረተ

የሰጠው ሐሳብ

ማረፊያ ቤት በቆየህበት ጊዜ አንተና ባለቤትህ እርስ በርስ መበረታታት የቻላችሁት እንዴት ነው?

ማረፊያ ቤት በቆየሁበት ጊዜ ውዷ ባለቤቴ የምትጽፍልኝ ደብዳቤዎች በጣም ያበረታቱኝ ነበር። ይህ የሆነው ከማንም በላይ ከምቀርባት ባለቤቴ ስለተላኩልኝ ብቻ አይደለም፤ ደብዳቤዎቿ ለይሖዋ ያለኝን ፍቅርና ታማኝነት ከማጠናከርም ባለፈ እምነቴንና ተስፋዬን ስለገነቡልኝ ልዩ ቦታ እሰጣቸዋለሁ። ይሖዋ እኔን ለማጽናናትና ጭንቀቴን ለማርገብ የሚረዱ ትክክለኛ ቃላት እንድታገኝ የሌናን እየረዳት እንዳለ ሆኖ ተሰምቶኝ ነበር። የሌና ደብዳቤዎቿ ይህን ያህል ኃይል እንዲኖራቸው ያደረገው ምን እንደሆነ በኋላ ላይ ነግራኛለች። ደብዳቤውን ከመጻፏ በፊት ወደ ይሖዋ አጥብቃ ትጸልያለች፣ ምርምር ታደርጋለች እንዲሁም የመጽሐፍ ቅዱስ ጥቅሶችን በጥንቃቄ ትመርጣለች።

እኔም ከመጽሐፍ ቅዱስ ንባቤ ያገኘኋቸውን መንፈሳዊ ዕንቁዎች ለየሌና በመጻፍ አበረታታት ነበር። ይሖዋ እንዴት ኃይል እየሰጠኝ እንዳለ እነግራታለሁ። ይሖዋ የሰጠንን በረከቶች ጠቅሼ እጽፍላታለሁ፤ ለምታሳየኝ ፍቅርና የራስን ጥቅም የመሠዋት መንፈስ እንዲሁም ምንም ዓይነት ሁኔታ ቢያጋጥማት ለይሖዋ ታማኝ በመሆኗ አመሰግናታለሁ።

የሌና ሚኻይሎቭ

የትውልድ ዘመን፦ 1983 (ሹያ)

ግለ ታሪክ፦ የሁለተኛ ደረጃ ትምህርቷን ካጠናቀቀች በኋላ ተማሪዎችን የሒሳብና የፊዚክስ ትምህርቶችን ታስጠና ነበር

አባቷ የሞተው የዘጠኝ ዓመት ልጅ እያለች ነው። ስለ አምላክ መኖር እንዲሁም ሰው ሲሞት ምን እንደሚሆን ለሚነሱባት ጥያቄዎች መልስ ለማግኘት ጥረት ታደርግ ነበር። ከመጽሐፍ ቅዱስ አርኪ መልስ ካገኘች በኋላ በ1999 ተጠመቀች። በ2003 ዲሚትሪን አገባች

የሰጠችው ሐሳብ

ባለቤትሽ ማረፊያ ቤት በቆየበት ጊዜ ምን ፈተናዎች ገጥመውሻል?

የ80 ዓመት አረጋዊት የሆኑትን አማቴን ለመንከባከብ የባለቤቴንም ድርሻ ደርቤ መሥራት ነበረብኝ። ዲሚትሪ ከተያዘ በኋላ ጤንነታቸው በድንገት አሽቆለቆለ። በዚያ ላይ ደግሞ ማረፊያ ቤቱ ከቤታችን 35 ኪሎ ሜትር ይርቃል። ወደዚያ መሄድ ብዙ ጊዜ የሚወስድ ከመሆኑም ሌላ አድካሚ ነው። ይህም እንዳይበቃ መርማሪዎቹ በየጊዜው ቢሯቸው ይጠሩኝና ጫና ያደርጉብኝ እንዲሁም ያስፈራሩኝ ነበር። በኋላ ላይ በእኔም ላይ ክስ መሠረቱ።

እነዚህን አስቸጋሪ ሁኔታዎች እንድትቋቋሚ የረዳሽ ምንድን ነው?

ይሖዋ አባቴ የሚያጋጥሙኝን ነገሮች ሁሉ ለመቋቋም የሚያስችል ከፍተኛ ብርታት እንዲሰጠኝ በጸሎት ጠየቅሁት። ከውጥረቱ የተነሳ ጥሩ እንቅልፍ አልነበረኝም። በየቀኑ ከእንቅልፌ ስነሳ ግን ብዙ የሚሠራ ነገር እንደሚጠብቀኝ አውቃለሁ። ይሖዋ ስለረዳኝ፣ በራሴ ብቻ ላከናውን የማልችላቸውን ብዙ ነገሮች ማድረግ ችያለሁ።

ስቬትላና ርዥኮቭ

የትውልድ ዘመን፦ 1953 (አሪስቶቮ፣ ኢቫኖቮ ክልል)

ግለ ታሪክ፦ ነርስ ሆና ሠርታለች። የተጠመቀችው በ2014 ነው

የሰጠችው ሐሳብ

በተስፋ መቁረጥ እንዳትዋጪ የረዳሽ ምንድን ነው?

ምሳሌ 24:10⁠ን ማንበብ ደስ ይለኛል። ጥቅሱ “በመከራ ቀን ተስፋ የምትቆርጥ ከሆነ ጉልበትህ እጅግ ይዳከማል” ይላል። ይህ ጥቅስ ባጋጠሙኝ ችግሮች ላይ ከልክ በላይ ማተኮር እንደሌለብኝ ያስታውሰኛል፤ በተለይ ማለዳ ላይ። ከዚህ ይልቅ የአምላክን ቃል ማንበቤ ትክክለኛ አመለካከት እንድይዝ ይረዳኛል። ይህን ሳደርግ ወዲያውኑ በፊልጵስዩስ 4:7 ላይ የተጠቀሰው “የአምላክ ሰላም” ሲያረጋጋኝ ይሰማኛል።

ስቬትላና ሺሺና

የትውልድ ዘመን፦ 1975 (ኦረንበርግ፣ ኦረንበርግ ክልል)

ግለ ታሪክ፦ የውበት ባለሙያ ናት

በ1995 ትዳር መሠረተች። እሷና ባለቤቷ አንድ ወንድና አንዲት ሴት ልጅ አላቸው

የስድስት ዓመት ልጅ እያለች የልጆች መጽሐፍ ቅዱስ አገኘች። ከዓመታት በኋላ አምላክ ስም እንዳለው አወቀች፤ ከዚያም ከይሖዋ ምሥክሮች ጋር መጽሐፍ ቅዱስን ለማጥናት ወሰነች። በ2002 ተጠመቀች

የሰጠችው ሐሳብ

የይሖዋ ምሥክር ያልሆነው ባለቤትሽ የደረሰብሽን ችግር ሲያይ ምን ተሰማው?

ባለቤቴ፣ ቤታችን ሲፈተሽ በጣም ይበሳጫል ብዬ ሰግቼ ነበር። እሱ ግን እቅፍ አድርጎኝ “አይዞሽ፣ ሁሉም ነገር ሰላም ይሆናል። አብረን እንወጣዋለን” ሲለኝ ምን ያህል እንደተገረምኩ ማሰብ ትችላላችሁ። ባለሥልጣናቱ ስደት የሚያደርሱብኝ ለምን እንደሆነ ግራ ገብቶት ነበር። በዚያ ወቅት ሲደግፈኝ ግን እፎይታ ተሰማኝ። ከላዬ ላይ ከባድ ሸክም የወረደልኝ ያህል ነበር።

ባለቤትሽ የእምነት አጋሮችሽ ያደረጉልሽን ድጋፍ ሲያይ ምን ተሰማው?

በተደጋጋሚ ጊዜያት ቁሳዊ እገዛ አድርገውልናል፤ ይህን እንዲያደርጉ ያነሳሳቸው ይሖዋ ነው። አስቤዛም ያመጡልን ነበር። የራሳቸውን ጥቅም መሥዋዕት አድርገው ያለምንም ክፍያ ይህን ያህል የረዱን ለምን እንደሆነ ባለቤቴ ሊገባው አልቻለም። ልቤ በኩራት ተሞልቶ ይህን እንዲያደርጉ ያነሳሳቸው ይሖዋ እንደሆነ ነገርኩት። ይሖዋ የሚያስፈልገንን ነገር ይመለከታል፤ ታማኝ አገልጋዮቹን ይንከባከባል።

በሩሲያ ያሉ ውድ ወንድሞቻችን እና እህቶቻችን የሚያሳዩት ድፍረትና ጽናት የደስታ ምንጭ ሆኖልናል።—1 ተሰሎንቄ 2:20