ግንቦት 30, 2023 | የታደሰው፦ መጋቢት 6, 2024
ሩሲያ

ወቅታዊ መረጃ—መቀጮ ተጣለባቸው | በቴይኮቮ የሚገኙ ወንድሞች ትኩረት ያደረጉት በይሖዋ እርዳታ ላይ ነው

አጫውት

የካቲት 29, 2024በኢቫኖቮ ክልል የሚገኘው የቴይኮቭስኪ አውራጃ ፍርድ ቤት ወንድም ሰርጌ ጋልያሚን፣ ወንድም አናቶሊ ልያሞ፣ ወንድም ቭላዲሚር ስፒቫክ እና ወንድም አሌክሳንደር ቫሲችኪን ጥፋተኛ ናቸው የሚል ብይን አስተላልፏል። ሁሉም ወንድሞች የገንዘብ መቀጮ ተጥሎባቸዋል። ቭላዲሚር 600,000 ሩብል (6,564 የአሜሪካ ዶላር)፣ ሰርጌ 650,000 ሩብል (7,111 የአሜሪካ ዶላር) እንዲሁም አሌክሳንደር እና አናቶሊ 1,100,000 ሩብል (12,034 የአሜሪካ ዶላር) እንዲከፍሉ ተወስኖባቸዋል።

አጭር መግለጫ

ሰርጌ ጋልያሚን

የትውልድ ዘመን፦ 1967 (ቴይኮቮ፣ ኢቫኖቮ ክልል)

ግለ ታሪክ፦ የጫማ መጠገኛ ሱቅ አለው

በ1991 ከልዩድሚላ ጋር ትዳር መሠረተ። ሦስት ሴቶች ልጆች አሏቸው

አምላክ ስም እንዳለው ሲያውቅ በጣም ተገረመ። በይሖዋ ምሥክሮች ስብሰባ ላይ ያየው ደግነት፣ እውነትን እንዳገኘ አሳመነው። ሰርጌ በ2001 ልዩድሚላ ደግሞ በ2002 ተጠመቁ

የሰጠው ሐሳብ

ከዚህ አስቸጋሪ ሁኔታ ምን ጠቃሚ ትምህርት አግኝተሃል?

በወንድሞቻችንና በእህቶቻችን ላይ እየደረሰ ስላለው ስደት መጀመሪያ በሰማሁበት ወቅት በጣም ተናድጄ ነበር። ‘እኔስ ምን ይደርስብኝ ይሆን?’ የሚለው ነገርም አስጨነቀኝ። በኋላ ግን በመዝሙር 73:26 ላይ የሚገኘው ሐሳብ ትዝ አለኝ፦ “ሰውነቴም ሆነ ልቤ ሊዝል ይችላል፤ አምላክ ግን ለዘላለም የልቤ ዓለትና ድርሻዬ ነው።” ይህ ጥቅስ በወቅቱ የሚያስፈልገኝን ማበረታቻ ሰጥቶኛል። ሊያጋጥሙኝ የሚችሉ መጥፎ ነገሮችን እያሰብኩ መረበሽ ምንም ትርጉም እንደሌለው ተገነዘብኩ። ጥበብ የሚሆነው ከይሖዋ ጋር ያለኝን ዝምድና ማጠናከሬን መቀጠልና በእሱ ሙሉ በሙሉ መታመን እንደሆነ አስተዋልኩ።

አናቶሊ ልያሞ

የትውልድ ዘመን፦ 1963 (ፖጋር፣ ብርያንስክ ክልል)

ግለ ታሪክ፦ የባቡር መንገድ ግንባታ ላይ ሠርቷል

በ1993 ከጋሊና ጋር ትዳር መሠረተ። ሁለት ልጆችና ሁለት የልጅ ልጆች አሏቸው

እውነትን ሲፈልግ ነበር፤ መጽሐፍ ቅዱስ ምክንያታዊ መሆኑ ትኩረቱን ሳበው። አናቶሊ በ1995 ጋሊና ደግሞ በ1997 ተጠመቁ

የሰጠው ሐሳብ

መንፈሳዊ ቤተሰብህ የደገፈህ እንዴት ነው?

ለመንፈሳዊ ወንድሞቼና እህቶቼ ያለኝ አድናቆት በጣም ጨምሯል። ይሖዋ በእነሱ በኩል ያደረገልኝን እርዳታ በቃላት መግለጽ ይከብደኛል። በዚህ የወንጀል ምርመራ ሂደት ብዙ ፈተናዎች አጋጥመውኛል፤ ሆኖም ይሖዋ ደግ የሆኑ ወንድሞችና እህቶችን በመጠቀም ቤተሰቤን ተንከባክቦልኛል። ወንድሞችና እህቶች ፍርድ ቤት ድረስ በመምጣትም ድጋፋቸውን አሳይተውኛል፤ ይህን ማድረግ ከፍተኛ ድፍረት የሚጠይቅ ነገር ነው። ለእኔም ሆነ ለቤተሰቤ እየጸለዩልን እንደሆነ የሚገልጽ መልእክት በየቀኑ ይደርሰኛል። ይህ እኔም ፈተና እየደረሰባቸው ላሉት የበኩሌን ድጋፍ ለማድረግ የሚያስችሉኝን አጋጣሚዎች እንድጠቀም አነሳስቶኛል።

ቭላዲሚር ስፒቫክ

የትውልድ ዘመን፦ 1955 (ሊቲን፣ ዩክሬን)

ግለ ታሪክ፦ የይሖዋ ምሥክር ከመሆኑ በፊት በጦር ሠራዊት ውስጥ አገልግሏል

በ1979 ከኔሊ ጋር ትዳር መሠረተ። መጀመሪያ መጽሐፍ ቅዱስን ማጥናት የጀመረችው ኔሊ ናት። በ1992 በይሖዋ ምሥክሮች ትልቅ ስብሰባ ላይ አብረው ተገኙ። ቭላዲሚር በስብሰባው ላይ የሰማውና ያየው ነገር አስገረመው። ኔሊ በ1994 ቭላዲሚር ደግሞ በ1997 ተጠመቁ

የሰጠው ሐሳብ

ተስፋ እንዳትቆርጥ የረዳህ ምንድን ነው?

በጣም ከናፈቁኝ ነገሮች አንዱ በወረዳና በክልል ስብሰባዎች ላይ መገኘት ነው። ይሄን ጨምሮ የተጣሉብኝ ሌሎች እገዳዎች አንዳንድ ጊዜ ያዳክሙኛል፤ የተስፋ መቁረጥ ስሜት ይፈጥሩብኛል። ሆኖም ብቻዬን እንዳልሆንኩ አውቃለሁ። ይሖዋ እንዲሁም ውድ ወንድሞቼና እህቶቼ ሁሌም ከጎኔ ናቸው። ይሖዋ ሁልጊዜም እንደሚደግፈኝ፣ ጥበቃ እንደሚያደርግልኝና ፈተናዎችን ለመቋቋም እንደሚረዳኝ እርግጠኛ ነኝ።

አሌክሳንደር ቫሲችኪን

የትውልድ ዘመን፦ 1969 (ብርያንስክ፣ ብርያንስክ ክልል)

ግለ ታሪክ፦ የይሖዋ ምሥክር ከመሆኑ በፊት በጦር ሠራዊት ውስጥ አገልግሏል። በቅርቡ አትክልተኛ ሆኖ ይሠራ ነበር

በ1993 ከናታሊያ ጋር ትዳር መሠረተ። ሁለት ልጆች አሏቸው

በይሖዋ ምሥክሮች ስብሰባዎች ላይ ሲገኝ ባየው ደግነት በጣም ተገረመ። እሱና ናታሊያ ከይሖዋ ምሥክሮች ጋር መጽሐፍ ቅዱስን ማጥናት ጀመሩ። ናታሊያ በ1994 አሌክሳንደር ደግሞ በ1995 ተጠመቁ

የሰጠው ሐሳብ

እየደረሰብህ ባለው ፈተና ላይ ከልክ በላይ እንዳታተኩር የሚረዳህ ምንድን ነው?

አብዛኛውን ጊዜ የተስፋ መቁረጥ ስሜት የሚያድርብኝ፣ ለራሴ ማዘን ስጀምር እንደሆነ አስተውያለሁ። ‘በእኔ ላይ ይህ ለምን ደረሰ?’ ብዬ ከማሰብ ይልቅ ስለ ይሖዋ የመመሥከር መብት በማግኘቴ ላይ አተኩራለሁ። በተጨማሪም በአሁኑ ጊዜ እየተጋፈጥኳቸው ያሉት ፈተናዎች፣ የሕይወት ታሪኬን በያዘው መጽሐፍ ላይ ከአንድ ገጽ እንደማይበልጡ ለማስታወስ እሞክራለሁ። በቅርቡ ይህ ገጽ ይገለጣል። በታማኝነት ከጸናሁ ከይሖዋ እንዲሁም ከወንድሞቼና እህቶቼ ጋር ያለኝን የጠበቀ ወዳጅነት ለዘላለም ማጣጣም እችላለሁ።

ይሖዋ ለታማኝ አገልጋዮቹ ካዘጋጀው በረከት ጋር ሲነጻጸር በዚህ ሥርዓት የሚደርስብን ማንኛውም ፈተና ጊዜያዊ እንደሆነ እናውቃለን።—2 ቆሮንቶስ 4:17, 18

የክሱ ሂደት

ሚያዝያ 10, 2020

የክስ ፋይል ተከፈተ
ሚያዝያ 11, 2020

ቤታቸው ተፈተሸ
ሚያዝያ 16, 2020

የጉዞ እገዳ ተጣለባቸው
የካቲት 2, 2023

ክሱ በፍርድ ቤት መታየት ጀመረ

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች