ኅዳር 28, 2022 | የታደሰው፦ ሚያዝያ 27, 2023
ሩሲያ

ወቅታዊ መረጃ—መቀጮ ተጣለባቸው | በይሖዋ በመታመን ጭንቀትን ማሸነፍ

አጫውት

ሚያዝያ 26, 2023 በኒዥኒ ኖቭጎሮድ የሚገኘው የሌኒንስኪ አውራጃ ፍርድ ቤት፣ ወንድም ኦሌግ ኮንሺን፣ ወንድም ሰርጌ ማልያኖቭ እና ወንድም ሮማን ዢቮሉፖቭ a እንዲሁም እህት ስቬትላና ማልያኖቫ ጥፋተኛ ናቸው የሚል ብይን አስተላልፏል፤ ስቬትላና ማልያኖቫ የወንድም ሰርጌ ማልያኖቭ ልጅ ነች። ፍርድ ቤቱ ከ450,000 ሩብል (5,494 የአሜሪካ ዶላር) እስከ 700,000 ሩብል (8,546 የአሜሪካ ዶላር) የሚደርስ የገንዘብ መቀጮ እንዲከፍሉ በይኗል።

አጭር መግለጫ

ኦሌግ ኮንሺን

የትውልድ ዘመን፦ 1971 (ሉጋ፣ ሌኒንግራድ ክልል)

ግለ ታሪክ፦ ሜካኒክ ነው። በ1991 ከኢሪና ጋር ተጋቡ። ሁለት ወንዶች ልጆች አሏቸው

ስለ ይሖዋ ምሥክሮች ያወቀው በእናቱ ነው፤ እሷ ቀደም ብላ መጽሐፍ ቅዱስ ማጥናት ጀምራ ነበር። ያደረገችውን ለውጥ ሲመለከት በጣም ስለተገረመ ማጥናት ፈለገ። በ2003 ተጠመቀ

የሰጠው ሐሳብ

የደረሰብህ ስደት እስካሁን ምን አስተምሮሃል?

ስደት በጣም የሚያስፈራው በሌላ ሰው ላይ ሲደርስ እንደሆነ ተምሬያለሁ። አንተ ላይ ሲደርስ ይሖዋ እንደሚያረጋጋህ ትረዳለህ፤ የሚያስፈልግህን ጥንካሬና ማስተዋልም ይሰጥሃል። እሱ እንደሚረዳኝ ስለማውቅ ‘ምን ላድርግ’ ወይም ‘ምን ልበል’ ብዬ አልጨነቅም። አንዳንድ ነገሮች ደግሞ ጨርሶ ሊያሳስቡን እንደማይገባም ተምሬያለሁ።

ሰርጌ ማልያኖቭ

የትውልድ ዘመን፦ 1969 (ኒዥኒ ኖቭጎሮድ፣ ኒዥኒ ኖቭጎሮድ ክልል)

ግለ ታሪክ፦ ከልጅነቱ ጀምሮ በበረዶ ሰርከስ ትዕይንት ሲሰለጥን ቆይቷል። የሞስኮ የበረዶ ሰርከስ ቡድን አባል ሆኖ ሩሲያንና ሌሎች አገሮችን ጎብኝቷል። ስቬትላና የተባለች ልጅ አለችው፤ እሷም በክስ መዝገቡ ውስጥ ተካትታለች

አብሮት ሰርከስ በሚሠራ አንድ ሰው አማካኝነት ከይሖዋ ምሥክሮች ጋር ተዋወቀ፤ ከዚያም መጽሐፍ ቅዱስን ማጥናት ጀመረ። ከሰርከስ ቡድኑ ጋር ወደተለያዩ ቦታዎች ሲሄድ በክርስቲያናዊ ስብሰባዎች ላይ ይገኝ ነበር። በዚያ ያየው ፍቅርና አንድነት ልቡን ነካው። በ1998 ተጠመቀ

የሰጠው ሐሳብ

በዚህ አስቸጋሪ ጊዜ አንተና ልጅህ እርስ በርስ የምትደጋገፉት እንዴት ነው?

ለመጀመሪያ ጊዜ ለምርመራ በተጠራሁበት ወቅት መርማሪዎቹ ከእነሱ ጋር በመተባበር ጥፋተኛ ነኝ ብዬ እንድፈርም ጫና አደረጉብኝ፤ እንዲህ ካላደረግኩ በእኔና በልጄ ላይ የሚደርሰውን ነገር በመናገር ሊያስፈራሩኝ ሞከሩ። እንዲያውም እኔን ለመረበሽ በማሰብ ያደረጉት ሙከራ ነበር፤ በምርመራ ማዕከሉ ውስጥ በአጋጣሚ በሚመስል መልኩ ኮሪደር ላይ ከልጄ ጋር እንድንተላለፍ አደረጉ። እሷን ሳይ አቋሜን እንደማላላ አስበው የነበረ ይመስለኛል፤ አንድ ነገር ብትሆንስ ብዬ በመጨነቅ ሐሳቤን እንደምቀይር ጠብቀው ሊሆን ይችላል። የሆነው ግን ተቃራኒው ነው። በዚያች ቅጽበት ስንተያይ እኔም እሷም ተበረታታን፤ ይሖዋ እንደሚረዳን ያለን ቁርጠኝነት ተጠናከረ። እሷን ማየቴ ጭንቀት አልፈጠረብኝም፤ ይልቁንም ልበ ሙሉነቷና ቁርጠኝነቷ ለእኔም ኃይል ሆነኝ። የፈለገ ነገር ቢያደርጉ ጥፋተኛ ነኝ ብዬ ፈጽሞ እንደማልፈርም ግልጽ አደረግኩላቸው።

ስቬትላና ማልያኖቫ

የትውልድ ዘመን፦ 1996 (ኒዥኒ ኖቭጎሮድ)

ግለ ታሪክ፦ ግጥም፣ መጽሐፍ ማንበብና መዘመር ትወዳለች። እንግሊዝኛና ፈረንሳይኛ ታስተምራለች

በልጅነቷ ስለ ይሖዋ ያስተማራት አባቷ ሰርጌ ነው። በ2016 በ20 ዓመቷ ተጠመቀች

የሰጠችው ሐሳብ

ያጋጠመሽ ነገር ሌሎችን ያበረታታው እንዴት ነው?

በባሕሪዬ በጣም እጨነቃለሁ፤ ስለዚህ ወንድሞችና እህቶች እየታሰሩ እንዳለ ስሰማ ‘እኔ እንደነሱ ብሆን እጸናለሁ?’ ብዬ አስብ ነበር። ደግሞም አልቀረልኝም፤ ፖሊሶቹ ቤቴን ሰብረው ገቡ። ወዲያውኑ መጸለይ ጀመርኩ። በዚያ ቅጽበት ከጎኔ ሊሆን የሚችለው ይሖዋ ብቻ እንደሆነ አውቅ ነበር። የወንጀል ምርመራው ደግሞ ከፍተኛ የሥነ ልቦና ጫና ያሳድራል፤ በዚህ ጊዜም በይሖዋ እርዳታ መጽናት ችያለሁ። ይህ ለእኔም በጣም ነው ያስገረመኝ። እንዲያውም አንዳንድ የሚያውቁኝ ወንድሞችና እህቶች “ስቬትላና መጽናት ከቻለች እኔም እችላለሁ!” ብለዋል።

ሮማን ዢቮሉፖቭ b

የትውልድ ዘመን፦ 1997 (ኖሪልስክ፣ ክራስናያርስክ ግዛት)

ግለ ታሪክ፦ የኤሌክትሪክ ምሕንድስና አጥንቷል፤ አሁን የሽያጭ ኃላፊ ሆኖ ይሠራል

እውነትን ያስተማረችው እናቱ ናት። በ2015 ተጠመቀ። ሆስፒታል ውስጥ አማራጭ የሲቪል አገልግሎት ሰጥቷል

የሰጠው ሐሳብ

በዚህ አስቸጋሪ ጊዜ ልዩ ትርጉም የሰጠህ የመጽሐፍ ቅዱስ ጥቅስ አለ?

ይሖዋ እንደሚወደኝ የሚያረጋግጡልኝ ጥቅሶች በአሁኑ ወቅት ለእኔ የተለየ ትርጉም አላቸው። ለምሳሌ፣ መዝሙር 27:10 “የገዛ አባቴና እናቴ ቢተዉኝ እንኳ ይሖዋ ራሱ [እንደሚቀበለኝ]” ያስታውሰኛል። ይህም ስለ አንድ ነገር እርግጠኛ እንድሆን ያደርገኛል፤ ትክክል የሆነውን ነገር ማድረጌን እስከቀጠልኩ ድረስ ይሖዋ በሚያስፈልገኝ ነገር ሁሉ እኔን ለመርዳት ፈጽሞ አይዘገይም።

‘ይሖዋን ተስፋ የሚያደርጉ’ ሁሉ ‘ደፋርና ልበ ጽኑ’ ናቸው፤ ስደትን በታማኝነት እየተጋፈጡ ያሉት ወንድሞቻችንና እህቶቻችን ለዚህ ሕያው ማስረጃዎች ናቸው።—መዝሙር 27:14

የክሱ ሂደት

የካቲት 7, 2019

አንድ ዳኛ፣ በሰርጌ የስልክ ጥሪዎችና ሌሎች የኤሌክትሮኒክ መገናኛ መንገዶች ላይ የክትትል ትእዛዝ አወጡ
ሐምሌ 16-17, 2019

ፖሊሶች በኒዥኒ ኖቭጎሮድ እና በክልሉ የሚኖሩ 31 የይሖዋ ምሥክሮች ቤቶችን ፈተሹ። ኦሌግ፣ ሰርጌ እና ስቬትላና በቁጥጥር ሥር ውለው ወደ ጣቢያ ተወሰዱ። ከዚያም የወንጀል ክስ ተመሠረተባቸው
ሐምሌ 18, 2019

ኦሌግ፣ ሰርጌ እና ስቬትላና ከጣቢያ ተለቀቁ። ሁለቱ ወንድሞች በተወሰኑ ሰዓታት ላይ ከቤት እንዳይወጡ፣ በማንኛውም የመገናኛ ዘዴ ከሌሎች ጋር እንዳያወሩና ኢንተርኔት እንዳይጠቀሙ የፍርድ ቤት እግድ ወጣባቸው
ነሐሴ 24, 2021

ሮማን በጽንፈኛ ድርጅት እንቅስቃሴ ተካፍለሃል ተብሎ ተከሰሰ፤ የጉዞ ክልከላዎችም ተጣሉበት
መጋቢት 3, 2022

ክሱ በፍርድ ቤት መታየት ጀመረ