የካቲት 21, 2022 | የታደሰው፦ ሐምሌ 31, 2023
ሩሲያ

ወቅታዊ መረጃ—መቀጮ ተጣለባቸው | ከእምነት አጋሮቻቸው ያገኙት ድጋፍ እምነታቸውን አጠናክሮላቸዋል

አጫውት

ሐምሌ 28, 2023 በካሬሊያ ሪፑብሊክ የሚገኘው የፔትሮዛቮድስክ ከተማ ፍርድ ቤት ወንድም ማክሲም አሞሶቭ፣ ወንድም ሚካኼል ጎርድዬቭ፣ ወንድም ኒኮላይ ሌሼንኮ እና ወንድም ዲሚትሪ ራቭኑሽኪን ጥፋተኛ ናቸው የሚል ብይን አስተላልፏል። ወንድሞች ከ450,000 ሩብል (4,909 የአሜሪካ ዶላር) እስከ 500,000 ሩብል (5,455 የአሜሪካ ዶላር) የገንዘብ መቀጮ ተጥሎባቸዋል።

የክሱ ሂደት

ሐምሌ 31, 2019

የፌዴራል ደህንነት አባላት የ16 የይሖዋ ምሥክሮችን ቤቶችና የሥራ ቦታዎች ፈተሹ
ነሐሴ 2, 2019

መርማሪው፣ ማክሲም አገር ለቆ እንዳይወጣ አገደ። ባለሥልጣናቱ በኒኮላይ ላይ የወንጀል ምርመራ የጀመሩ ሲሆን አካባቢውን ለቆ እንዳይሄድ እገዳ ጣሉበት
ነሐሴ 6, 2019

መርማሪው፣ በማክሲም እና በኒኮላይ ላይ ክስ መሠረተ፤ ወንጀላቸው መጽሐፍ ቅዱስን ማጥናታቸው ነው
መስከረም 5, 2019

የፌዴራል ደህንነት አባላት ሚካኼልን ሥራ ቦታው ሄደው በቁጥጥር ሥር አዋሉት፤ ኮምፒውተሩንም ወሰዱበት። መርማሪው በሚካኼል ላይ የወንጀል ምርመራ ጀመረ
መስከረም 20, 2019

የፌዴራል ደህንነት አባላት የዲሚትሪን የሥራ ቦታ ፈተሹ፤ ስልኩንም ወሰዱበት። መርማሪው ዲሚትሪን ለአራት ሰዓት ያህል መረመረው፤ በእሱ ላይ የወንጀል ምርመራ እንዲከፈት ያደረገ ሲሆን አካባቢውን ለቆ እንዳይሄድ አዘዘው
ጥቅምት 18, 2021

ክሱ መታየት ጀመረ

አጭር መግለጫ

ሚካኼል ጎርድዬቭ

የትውልድ ዘመን፦ 1959

ግለ ታሪክ፦ ውኃ ዋና እና ሙዚቃ ይወዳል

ገና ከልጅነቱ ጀምሮ ስለ አምላክና ስለ ሕይወት ትርጉም ጥያቄዎች ነበሩት። የመጀመሪያ ሚስቱ የሞተችበት ልጃቸው ትንሽ እያለ ነው። ከሐዘኑ ለመጽናናት የሚረዳው ነገር እየፈለገ በነበረበት ወቅት ከአንድ የይሖዋ ምሥክር ጋር ተነጋገረ፤ በውይይቱም የአምላክን ስም አወቀ። ከተወሰኑ ዓመታት በኋላ ከይሖዋ ምሥክሮች ጋር በድጋሚ ሲገናኝ መጽሐፍ ቅዱስን ለማጥናት ወዲያውኑ ተስማማ። በ1996 ተጠመቀ

በ1999 ከዬሊዛቬታ ጋር ትዳር መሠረተ። ራሳቸውን ችለው መኖር ያልጀመሩ ሁለት ሴት ልጆች አሏቸው

የሰጠው ሐሳብ

ቤተሰብህን ለስደት ለማዘጋጀት ምን አድርገሃል?

እገዳው ከተጣለ በኋላ . . . ከባድ የእምነት ፈተና እንደተጋረጠብን ተገነዘብኩ። ስለዚህ የራሴንም ሆነ የቤተሰቤን እምነት ለማጠናከር ቆርጬ ተነሳሁ። አዘውትረን መጽሐፍ ቅዱስን አብረን እናነባለን፤ እንዲሁም ድፍረት ለማግኘት አብረን እንጸልያለን። ፈተናዎችን በጽናት ስለተቋቋሙ ወንድሞቻችንና እህቶቻችን የሚገልጹ ተሞክሮዎችም እናነባለን።

ከይሖዋ ልዩ እርዳታ እንዳገኘህ የተሰማህ ጊዜ አለ?

ብርበራው ከተካሄደ ከአንድ ወር ገደማ በኋላ [መርማሪዎቹ] ወደ ሥራ ቦታዬ መጥተው ወሰዱኝ። ለምርመራ አስገቡኝ፤ ከዚያም የተከሰስኩበትን ወንጀል አነበቡልኝ። በምርመራው ወቅት መርማሪዎቹ ብዙ ጫና ሊያደርጉብኝ ሞክረዋል። በእምነት አጋሮቼ ላይ ለመመሥከር ፈቃደኛ ካልሆንኩ ማረፊያ ቤት እንደሚያስገቡኝ ዛቱብኝ። በጣም ፈታኝ ጊዜ ነበር። ጥበብና ጥንካሬ እንዲሰጠኝ ይሖዋን ለመንኩት። እሱም መጽናት እንድችልና በጫናው እንዳልሸነፍ ረድቶኛል።

ኒኮላይ ሌሼንኮ

የትውልድ ዘመን፦ 1962 (ፖልታቫ፣ ዩክሬን)

ግለ ታሪክ፦ በ1984 ከስቬትላና ጋር ትዳር መሠረተ። በ1988 በፖላንድ ወታደር ሆኖ እያገለገለ ሳለ የይሖዋ ምሥክር ከሆኑ አንድ ባልና ሚስት ጋር ተገናኙ። በ1989 ለመጀመሪያ ጊዜ በመታሰቢያው በዓል ላይ ተገኙ። በ1993 ወደ ሩሲያ ከተመለሱ በኋላ መጽሐፍ ቅዱስን ማጥናት ጀመሩ፤ በዚያው ዓመት መጨረሻ ላይ ተጠመቁ።

የሰጠው ሐሳብ

የጉዞ እገዳ በተጣለብህ ወቅት የይሖዋን እጅ ያየኸው እንዴት ነው?

በ2019 መጨረሻ አካባቢ ስሜቴ ጥሩ አልነበረም። ስቬትላና ዋርሶ፣ ፖላንድ ውስጥ በተካሄደው የክልል ስብሰባ ላይ ለመገኘት ሄዳ ነበር። በወቅቱ በፖላንድ ይኖሩ የነበሩ አንዳንድ ጓደኞቻችንን አገኘች። በቪዲዮ ኮንፈረንስ አማካኝነት እንዳዋራቸው ዝግጅት አደረገች። እነዚህ ጓደኞቻችን ምን እንዳሉኝ አሁን በትክክል ትዝ አይለኝም፤ ካዋራኋቸው በኋላ ግን በጣም እንደተበረታታሁ ትዝ ይለኛል። . . . ይህ የይሖዋ እጅ እንዳለበት ገብቶኝ ነበር፤ ይሖዋ አጋጣሚውን ተጠቅሞ እያበረታታኝ ነበር።

በሩሲያ ያሉ ወንድሞቻችን ስደት ቢደርስባቸውም በእውነት ውስጥ እየተመላለሱ በመሆናቸው እንኮራባቸዋለን።—3 ዮሐንስ 4

a b ቃለ መጠየቅ ማድረግ አልተቻለም።

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች