ሮማን ባራኖቭስኪ

• የትውልድ ዘመን፦ 1974 (ባላኮቮ፣ ሳራቶቭ ክልል)

• ግለ ታሪክ፦ ቤቶች በማደስ ሙያ ላይ ተሰማርቶ ራሱንና እናቱን ያስተዳድራል። ጊታር፣ ቼዝና እግር ኳስ መጫወት ይወዳል

  በአሥራዎቹ ዕድሜ እያለ የሕይወት ዓላማ ያሳስበው ነበር። “አንዳንድ ጊዜ፣ አምላክ የሕይወትን መንገድ እንዲያሳየኝ እለምነው ነበር” ብሏል። በ1993 ከይሖዋ ምሥክሮች ጋር ማጥናት ጀመረ። በ1997 ተጠመቀ

ቫለንቲና ባራኖቭስካያ

• የትውልድ ዘመን፦ 1951 (ቫኖቭካ፣ ካዛክስታን)

• ግለ ታሪክ፦ በ2006 ጡረታ እስከወጣችበት ጊዜ ድረስ የሒሳብ ባለሙያ እና የፋይናንስ አማካሪ ሆና ትሠራ ነበር። ምግብ ማብሰል እንዲሁም ሙዚቃና ግጥም መጻፍ ትወዳለች

  በ1995 እሷም እንደ ልጇ ከይሖዋ ምሥክሮች ጋር መጽሐፍ ቅዱስን ማጥናት ጀመረች። በተለይ ልቧን የነካው አምላክ እንደማይዋሽ ማወቋ ነው። በ1996 ተጠመቀች

ሚያዝያ 10, 2019 ምሽት ላይ የአባካን ከተማ ፖሊሶች የወንድም ሮማን ባራኖቭስኪን እና የእናቱን የቫለንቲናን ቤት ጨምሮ አራት ቤቶችን በረበሩ። ፖሊሶቹ መጽሐፍ ቅዱሶቻቸውን፣ የኤሌክትሮኒክ መሣሪያዎቻቸውንና የግል ሰነዶቻቸውን ወረሱባቸው። ከዚያም በሮማን እና በቫለንቲና ላይ የወንጀል ክስ ተመሠረተ።

ሮማን እንዲህ ብሏል፦ “ቤታችን በተበረበረበት ወቅት በሳምንቱ መሃል ስብሰባ ላይ 1 ቆሮንቶስ 10:13⁠ን ተወያይተን መጨረሳችን ነበር። ጥቅሱ ጠቃሚ ሐሳብ ይዟል፤ ይሖዋ የሚደርስብንን ፈተና አይመርጥልንም። . . . ይሖዋ ‘አንተ ጠንካራ ስለሆንክ ይህን ፈተና ትችለዋለህ፤ አንተ ደግሞ ደካማ ስለሆንክ ቀለል ያለ ፈተና ይገጥምሃል’ አይልም። እንዲህ የሚያደርግ ቢሆን ኖሮ ሁሉም ነገር በእኛ አቅም ላይ የተመካ ይሆን ነበር። ማናችንም የተለያየ ፈተና ሊያጋጥመን ይችላል። ይሖዋ በሚሰጠን ኃይል ከታመንን ሁላችንም ፈተናውን በጽናት መወጣት እንችላለን።”

ሐምሌ 2020 ቫለንቲና አንጎሏ ውስጥ ደም ፈሰሰ። እንዲህ ብላለች፦ “የጤናዬ ሁኔታ እየተባባሰ በሄደ መጠን ይሖዋ ከጎኔ እንደሆነ ይበልጥ በግልጽ ይታየኝ ነበር። ይህ የሆነው መጸለዬን ስላላቋረጥኩ ነው፤ ይሖዋ እቅፍ ያደረገኝ ያህል ሆኖ ይሰማኝ ነበር። የነበረኝን ሰላምና መረጋጋት በቃላት መግለጽ ይከብደኛል።”

ቫለንቲና ያጋጠሟት ነገሮች የሚከተለው መደምደሚያ ላይ እንድትደርስ አድርገዋታል፦ “አባታችንን ለዘላለም ለማገልገልና ምንም ነገር ቢያጋጥመኝ ምንጊዜም ለእሱ ታማኝ ለመሆን ቁርጥ ውሳኔ አድርጌያለሁ።”

ሮማን በመጽሐፍ ቅዱስ ውስጥ በሚገኙ እንዲሁም በዘመናችን ባሉ የጽናት ምሳሌዎች ላይ ማሰላሰሉ እምነቱን እንዳጠናከረለት ተናግሯል። እንዲህ ባሉት ምሳሌዎች ላይ ሲያሰላስል ብዙውን ጊዜ ራሱን እንዲህ በማለት ይጠይቃል፦ ‘ምን ዓይነት ፈተና አጋጥሟቸዋል? ፈተና የደረሰባቸው ለምንድን ነው? ታማኝነታቸውን ለመጠበቅ የረዳቸው ምንድን ነው? ይሖዋ በመንፈሱ አማካኝነት የደገፋቸው እንዴት ነው?’ ሮማን ለእነዚህ ጥያቄዎች ያገኘው መልስ “ይሖዋ አስፈላጊ ከሆነ ከሰብዓዊ ኃይል በላይ የሆነ ኃይል” እንደሚሰጠው ይበልጥ እንዲተማመን አድርጎታል።

ሮማን፣ ቫለንቲና እንዲሁም በሩሲያ የሚገኙ ውድ ወንድሞቻችን እና እህቶቻችን በሙሉ ይሖዋን መጠጊያቸውና ብርታታቸው አድርገው ማየታቸውን እንዲቀጥሉ እንጸልያለን።—መዝሙር 46:1