ኅዳር 2, 2021
ሩሲያ

ወቅታዊ መረጃ | በሳካሊን ስደት የደረሰባቸው አምስት ክርስቲያኖች በይሖዋ ድጋፍ ታምነዋል

አጫውት

ግንቦት 11, 2022 የሳካሊን ክልላዊ ፍርድ ቤት ወንድም ቭያቼስላቭ ኢቫኖቭ፣ ወንድም አሌክሳንደር ኮዝሊቲን፣ ወንድም ሰርጌ ኩላኮቭ፣ እህት ታትያና ኩላኮቫ እና ወንድም ዬቭጌኒ ዬሊን ያቀረቡትን ይግባኝ ውድቅ አደረገ። እርግጥ በአሁኑ ወቅት ወህኒ አይወርዱም።

ጥር 31, 2022 በሳካሊን ክልል የሚገኘው የኔቬልስኪ ከተማ ፍርድ ቤት ቭያቼስላቭ፣ አሌክሳንደር፣ ሰርጌ፣ ታትያና እና ዬቭጌኒ ጥፋተኛ ናቸው የሚል ብይን አስተላለፈ። ሰርጌ እና ዬቭጌኒ የስድስት ዓመት ከስድስት ወር የገደብ እስራት ተበይኖባቸዋል። ቭያቼስላቭ፣ አሌክሳንደር እና ታትያና ደግሞ የሁለት ዓመት የገደብ እስራት ተበይኖባቸዋል።

የክሱ ሂደት

ሐምሌ 2020

ቭያቼስላቭ፣ አሌክሳንደር፣ ሰርጌ እና ታትያና የጉዞ እገዳ ተጣለባቸው
ሚያዝያ 2, 2020

ዬቭጌኒ የጉዞ እገዳ ተጣለበት
ጥር 20, 2019

የፌዴራል ደህንነት (የሩሲያ የሚስጥር ፖሊስ) አባላት የይሖዋ ምሥክር ናቸው ተብለው የተጠረጠሩ ቢያንስ የ11 ዜጎችን ቤት በረበሩ። ፖሊሶቹ በቁጣ ተሞልተው የነበረ ሲሆን ለአካለ መጠን ያልደረሱ ልጆችንም ጭምር የወንጀል ምርመራ አካሂደውባቸዋል። ይህ የሆነው የሩሲያው ፕሬዚዳንት ቭላዲሚር ፑቲን በይሖዋ ምሥክሮች ላይ እየደረሰ ያለውን ስደት ለማጣራት ቃል ከገቡ ብዙም ሳይቆይ ነው

አጭር መግለጫ

ቭያቼስላቭ ኢቫኖቭ

የትውልድ ዘመን፦ 1970 (ዩዥኖ-ሳካሊንስክ፣ ሳካሊን ክልል)

ግለ ታሪክ፦ በልጅነቱ እግር ኳስ፣ ቴኒስ እና ሆኪ መጫወት ይወድ ነበር። በጦር ሠራዊት ውስጥ አገልግሏል፤ የሬዲዮ ምሕንድስና ሥልጠና ወስዷል። የኤሌክትሪክ ባለሙያ ሆኖ ይሠራ ነበር። በአሁኑ ወቅት፣ የቤት እድሳት ድርጅት ባለቤት ነው

በ1993 ተጠምቆ የይሖዋ ምሥክር ሆነ። በ2008 ከኢሪና ጋር ትዳር መሠረተ

የሰጠው ሐሳብ

የይሖዋን ድጋፍ ያስተዋልከው መቼ ነው?

ለመስበክ የሚያስችሉ አጋጣሚዎችን በሙሉ ስጠቀም የአምላክን ሰላም አጣጥማለሁ። በእሱ ጥበቃ ሥር እንዳለሁና ጠላቶቻችን ምንም ሊያደርጉኝ እንደማይችሉ ይሰማኛል።

ሰርጌ ኩላኮቭ

የትውልድ ዘመን፦ 1961 (ኔቬልስክ፣ ሳካሊን ክልል)

ግለ ታሪክ፦ ከ14 ዓመቱ አንስቶ የኖረው አዳሪ ትምህርት ቤት ውስጥ ነው። በልጅነቱ እግር ኳስና ቼዝ ይጫወት ነበር። ከሙያ ትምህርት ቤት ተመርቋል፤ የመርከብ ጥገና ሜካኒክነት ሥልጠና ወስዷል። አሁን ጡረታ ወጥቷል

በ2000ዎቹ እሱና ባለቤቱ ታትያና መጽሐፍ ቅዱስን ማጥናት ጀመሩ። በይሖዋ ምሥክሮች መካከል ያየው ፍቅር ልቡን ስለነካው በ2008 ተጠመቀ። ባልና ሚስቱ ሁለት ወንዶች ልጆች አሏቸው

የሰጠው ሐሳብ

ይሖዋ የትኞቹን ተፈታታኝ ሁኔታዎች እንድትቋቋም ረድቶሃል?

በጣም የከበደኝ መረጋጋትና ደስታዬን መጠበቅ ነበር። በመንፈሳዊ ነገሮች ስጠመድ “ታማኝ ለሆነ ሰው ታማኝ ትሆናለህ” የሚለው ጥቅስ እውነት መሆኑን እርግጠኛ ሆንኩ። (2 ሳሙኤል 22:26) ለይሖዋ ያለኝ ፍቅርና በእሱ ላይ ያለኝ እምነት ማደጉን ቀጥሏል። በተጨማሪም ይሖዋ ሁሉንም ነገር እንደሚቆጣጠር ስለማውቅ ወደፊት ምን ሊፈጠር እንደሚችል በማሰብ አልጨነቅም።

ታትያና ኩላኮቫ

የትውልድ ዘመን፦ 1973 (ኔቬልስክ፣ ሳካሊን ክልል)

ግለ ታሪክ፦ ከልጅነቷ ጀምሮ ማንበብ፣ ሥዕል መሣልና ሙዚቃ ትወዳለች። ለሳኝ እና ቀለም ቀቢ ሆና ሠርታለች። በ1996 ከሰርጌ ጋር ተጋቡ፤ ሁለት ወንዶች ልጆች አሏቸው

መጽሐፍ ቅዱስ ምድር ስለተፈጠረችበት ዓላማ እና ሙታን ስለሚገኝበት ሁኔታ ምን እንደሚናገር ከተማረች በኋላ ለመጽሐፍ ቅዱስ አድናቆት አደረባት። በ2003 ተጠምቃ የይሖዋ ምሥክር ሆነች

የሰጠችው ሐሳብ

ደፋር እንድትሆኚ ወይም በደስታ እንድትጸኚ የረዳሽ ጥቅስ የትኛው ነው?

ቤታችን ሲፈተሽ፣ በኋላም ክስ ተመሥርቶብኝ ወደ ፌዴራል ደህንነት ቢሮ ስሄድ ኤልሳዕ ለአገልጋዩ የተናገረውን ሐሳብ ማስታወሴ አበረታቶኛል፤ “ከእነሱ ጋር ካሉት ይልቅ ከእኛ ጋር ያሉት ይበልጣሉ” ብሎት ነበር። ሁሉን ቻይ አምላክ የሆነው ይሖዋ፣ ኢየሱስ እንዲሁም ስፍር ቁጥር የሌላቸው መላእክት ከጎኔ እንዳሉ ሆኖ ይሰማኝ ነበር። የእነሱ ድጋፍ እንዳለኝ ማወቄ ከልክ በላይ ከመጨነቅ ይልቅ ማድረግ ያለብኝን ነገር እንዳደርግ ረድቶኛል።

ዬቭጌኒ ዬሊን

የትውልድ ዘመን፦ 1974 (ዩዥኖ-ሳካሊንስክ፣ ሳካሊን ክልል)

ግለ ታሪክ፦ ከወጣትነቱ አንስቶ ሥዕል መሣል ይወዳል። የቤት ዲዛይነር ነው። የቤት እድሳት ድርጅት አለው። የቤት ውስጥ ዕቃዎችንም ዲዛይን ያደርጋል፤ እንዲሁም ይሠራል

በሁለተኛ ደረጃ ትምህርት ቤት እያለ መጽሐፍ ቅዱስን መመርመር ጀመረ። በ1990ዎቹ ከይሖዋ ምሥክሮች ጋር ተገናኘ፤ የይሖዋ ምሥክሮች የመጽሐፍ ቅዱስን መመሪያዎች በዕለታዊ ሕይወታቸው ተግባራዊ የሚያደርጉ መሆኑ አስደነቀው። በ1992 ተጠመቀ። በ2017 ከአናስታሲያ ጋር ትዳር መሠረተ

የሰጠው ሐሳብ

ሌሎች ወደፊት ሊያጋጥማቸው ለሚችለው ስደት ለመዘጋጀት ምን እንዲያደርጉ ትመክራለህ?

አእምሯቸውንና ልባቸውን በመንፈሳዊ ነገሮች እንዲሞሉ እመክራለሁ። የድርጅቱን መመሪያ መከተል እጅግ አስፈላጊ ነው። ስለ አዲሱ ዓለም የሚገልጹት ትንቢቶች የሚፈጸሙበትን ጊዜ በጉጉት እየተጠባበቅን ነው፤ ሆኖም ስደትም መፈጸም ካለባቸው ተያያዥ ትንቢቶች አንዱ ነው። ስደትን እየተጋፈጥን ከሆነ በዚህ ትንቢት ፍጻሜ እየተካፈልን ነው ማለት ነው። ይህ ደግሞ ልዩ መብት ነው!

ይሖዋ ውድ ወንድሞቻችንንና እህቶቻችንን መንከባከቡን እንደሚቀጥል እርግጠኞች ነን፤ እነሱም እንደ ነቢዩ ኢሳይያስ “አምላክ አዳኜ ነው! በእሱ እታመናለሁ፤ ምንም የሚያስፈራኝ ነገር የለም” ይላሉ።—ኢሳይያስ 12:2

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች