ኅዳር 4, 2022
ሩሲያ

ወቅታዊ መረጃ—ባልና ሚስቱ ተፈረደባቸው | ከመጽሐፍ ቅዱስ የእምነት ምሳሌዎች ብርታት ማግኘት

አጫውት

ኅዳር 8, 2022 በካምቻትካ ክልል የሚገኘው የፔትሮፓቭሎቭስክ-ካምቻትስኪ ከተማ ፍርድ ቤት በወንድም ዲሚትሪ ሴሞኖቭ እና በባለቤቱ በናዴዥዳ ላይ የጥፋተኝነት ብይን አስተላልፏል። በሁለቱም ላይ የአራት ዓመት የገደብ እስራት በይኗል። በእርግጥ በአሁኑ ወቅት ወህኒ አይወርዱም።

የክሱ ሂደት

መስከረም 3, 2021

ከዲሚትሪና ከናዴዥዳ ጋር መጽሐፍ ቅዱሳዊ ውይይት የምታደርግ አንዲት ሴት ለፌዴራል ደህንነት አባላት መረጃ ማቀበል ጀመረች። እሷ ባቀበለችው መረጃ ላይ የተመረኮዘ የወንጀል ክስ ተመሠረተባቸው። ሌሎች ሰዎች ጽንፈኛ ድርጅትን እንዲቀላቀሉና በእንቅስቃሴዎቹ እንዲሳተፉ ቀስቅሰዋል በሚል ተከሰሱ
መስከረም 6, 2021

መኖሪያ ቤታቸው ተፈተሸ። ለምርመራ ተወሰዱ፤ የጉዞ እገዳም ተጣለባቸው
ሐምሌ 26, 2022

ጉዳያቸው በፍርድ ቤት መታየት ጀመረ

አጭር መግለጫ

ዲሚትሪ ሴሞኖቭ

የትውልድ ዘመን፦ 1984 (ፔትሮፓቭሎቭስክ-ካምቻትስኪ)

ግለ ታሪክ፦ ሒሳብና ኮምፒውተር ሳይንስ አጥንቷል። የኮምፒውተር ፕሮግራመር ነው

ስለ ይሖዋ ምሥክሮች ለመጀመሪያ ጊዜ ያወቀው የቤተሰቡ አባል ከሆነ ሰው ነው። በ2006 ተጠመቀ። በወታደራዊ አገልግሎት ምትክ አማራጭ የሲቪል አገልግሎት ሰጥቷል

በ2010 ከናዴዥዳ ጋር ተጋቡ

የሰጠው ሐሳብ

በይሖዋ ላይ ያለህን እምነት ለማጠናከር የረዳህ የትኛው የመጽሐፍ ቅዱስ ባለታሪክ ነው?

ይህ ስደት ከመጀመሩ በፊትም በኤርምያስ ምሳሌ ላይ አሰላስል ነበር፤ በተለይም ባቢሎናውያን ኢየሩሳሌምን በከበቡበት ወቅት በእስር ቤት እንዳሳለፈ የሚገልጸው ታሪክ ያስገርመኛል። ኤርምያስ ሁሉ ነገር የጨለመበት ይመስል ይሆናል፤ ሆኖም ይሖዋ በጣም እንግዳ በሆነ መንገድ ተንከባክቦታል። የኢየሩሳሌም ነዋሪዎች በረሃብ በተጠቁበት ወቅት ኤርምያስ ምግብ አላጣም፤ በከተማዋ ላይ ከደረሰው ጥፋትም ተርፏል። (ኤርምያስ 37:21) ይሖዋ ስለ አንድ ሁኔታ ያለው እይታ ከሰዎች ፈጽሞ የተለየ ነው፤ ነገሮች ወዴት እንደሚያመሩም አሳምሮ ያውቃል። ሰማይ የተደፋብን በሚመስልበት ጊዜም እንኳ ይሖዋ በትክክለኛው ጊዜ መውጫውን ያዘጋጅልናል።

ናዴዥዳ ሴሞኖቫ

የትውልድ ዘመን፦ 1985 (ዬካተሪንበርግ፣ ስቬርድሎቭስክ ክልል)

ግለ ታሪክ፦ ልጅ ሳለች በትምህርት ቤቷ የመዘምራን ጓድ ውስጥ ዘማሪና ተወዛዋዥ ነበረች። በአንድ ሱቅ ውስጥ የመጋዘን ተቆጣጣሪ ነች

እውነትን የሰማችው ቀደም ብላ መጽሐፍ ቅዱስን ማጥናት ከጀመረች ታላቅ እህቷ ነው። ናዴዥዳ፣ እናቷና እህቷ የይሖዋ ምሥክሮች ሆነዋል። የተጠመቀችው በ1997 ነው

በ2010 ከዲሚትሪ ጋር ተጋቡ

የሰጠችው ሐሳብ

እምነትሽን ለማጠናከር የረዳሽ የትኛው የመጽሐፍ ቅዱስ ባለታሪክ ነው?

በቅርቡ የሰራፕታዋ መበለት በተወችው ምሳሌ ላይ ተወያይተን ነበር፤ ይህች መበለት በረከት ያገኘችው እምነት እንዳላት ካሳየች በኋላ ነው። የተወያየንበት ርዕስ ‘አምላክ እምነት ያላቸውን ሰዎች ይባርካል’ የሚል ሐሳብ አለው። ከዚያም ከ1898 የጽዮን መጠበቂያ ግንብ እትም ላይ በመጥቀስ እንዲህ ይላል፦ “እኛም በሕይወት መንገድ ስንጓዝ ጌታ እምነታችንን የሚፈትኑ ነገሮች እንዲያጋጥሙን ይፈቅዳል፤ ሆኖም ውጤቱ የተመካው በእኛ ላይ ነው። እምነት ካሳየን በረከቱን እናገኛለን፤ እምነት ካላሳየን ግን በረከቱ ይቀርብናል።”

ይህ ሐሳብ አንድ ቁም ነገር አስተምሮኛል፤ የሚያጋጥመኝ መከራ ምንም ያህል ከባድ ቢሆን ለይሖዋ እንዲሁም ለወንድሞቼና ለእህቶቼ ምንጊዜም ታማኝ በመሆን የበኩሌን ድርሻ መወጣቴ በጣም አስፈላጊ ነው። ይህን ካደረግኩ ይሖዋ የሚያስፈልገኝን ድፍረት፣ እምነትና ብርታት በመስጠት እንድጸና ይረዳኛል።

ዲሚትሪ እና ናዴዥዳ በራሳቸው ሕይወት እንዳዩት ይሖዋ ስደት የሚደርስባቸው አገልጋዮቹን ደፋርና ጠንካራ እንዲሆኑ ይረዳቸዋል። መቼም ቢሆን አይተዋቸውም።—ኢያሱ 1:9