ታኅሣሥ 23, 2021 | የታደሰው፦ ነሐሴ 29, 2023
ሩሲያ

ወቅታዊ መረጃ—ባልና ሚስቱ ተፈረደባቸው | የይሖዋ ዝግጅቶች ወንድም ኦሌግ እና ባለቤቱ እህት አግኔሳ ውስጣዊ ሰላም እንዲያገኙ ረድተዋቸዋል

አጫውት

ነሐሴ 23, 2023 በአይሁዳውያን ራስ ገዝ ክልል የሚገኘው የቢሮቢድዣንስኪ አውራጃ ፍርድ ቤት፣ በወንድም ኦሌግ ፖስትኒኮቭ እና በእህት አግኔሳ ፖስትኒኮቫ ላይ የጥፋተኝነት ብይን አስተላልፏል። ኦሌግ የአምስት ዓመት ተኩል የገደብ እስራት፣ አግኔሳ ደግሞ የአራት ዓመት ተኩል የገደብ እስራት ተፈርዶባቸዋል። በአሁኑ ወቅት ወህኒ አይወርዱም።

ጥቅምት 11, 2022 የአይሁዳውያን ራስ ገዝ ክልል ፍርድ ቤት የወንድም ኦሌግ ፖስትኒኮቭን እና የእህት አግኔሳ ፖስትኒኮቫን የጥፋተኝነት ውሳኔ ሽሮታል። ጉዳያቸው ዳግመኛ እንዲታይ ይላካል።

ሚያዝያ 25, 2022 በአይሁዳውያን ራስ ገዝ ክልል የሚገኘው የቢሮቢድዣንስኪ አውራጃ ፍርድ ቤት ኦሌግ እና አግኔሳ ጥፋተኛ ናቸው የሚል ብይን አስተላልፏል። ኦሌግ የአምስት ዓመት ተኩል አግኔሳ ደግሞ የአምስት ዓመት የገደብ እስራት ተፈርዶባቸዋል። እርግጥ አሁን ወህኒ አይወርዱም።

የክሱ ሂደት

የካቲት 12, 2021

የፌደራል ደህንነት ቢሮው በእህት አግኔሳ ላይ የወንጀል ክስ መሠረተባት። እህት አግኔሳና ባለቤቷ “የወንጀለኛ” ቡድን በመመሥረትና ስለ ቡድኑ “ጽንፈኛ” ዓላማዎች በማስፋፋት ወንጀል ተከሰሱ። ኦሌግና አግኔሳ ከአካባቢው ርቀው እንዳይሄዱ ታዘዙ፤ የባንክ ሒሳባቸውን እንዳያንቀሳቅሱ ታገዱ፤ እንዲሁም ስማቸው በሩሲያ የአሸባሪዎች ዝርዝር ውስጥ ተካተተ
የካቲት 12, 2020

የፌደራል ደህንነት ቢሮው በኦሌግ ላይ የወንጀል ክስ መሠረተ

አጭር መግለጫ

ኦሌግ ፖስትኒኮቭ

የትውልድ ዘመን፦ 1965 (ቭያዜምስኪ፣ ካባረቭስክ ክልል)

ግለ ታሪክ፦ የቧንቧ ሠራተኛ ሆኖ ሠርቷል። በአሥራዎቹ ዕድሜ ሳለ አንድን የወሮበሎች ቡድን ተቀላቅሎ ነበር። በፈጸመው ወንጀል ምክንያት ታሰረ። እስር ቤት ሳለ መጽሐፍ ቅዱስ ማጥናት ጀመረ። ከእስር ከተፈታ በኋላ በ1986 ተጠምቆ የይሖዋ ምሥክር ሆነ

በ1989 ከአግኔሳ ጋር ትዳር መሠረተ። ሁለት ትላልቅ ልጆች አሏቸው

የሰጠው ሐሳብ

እስር ቤት ሳለህ እውነትን የሰማኸው እንዴት ነው?

ወታደራዊ አገልግሎት ለመስጠት ፈቃደኛ ባለመሆኑ ምክንያት የታሰረ አንድ የይሖዋ ምሥክር ነበር። . . . አምላክ መኖሩን በሚጠቁሙት ማስረጃዎችና የዝግመተ ለውጥ ጽንሰ ሐሳብ ባለው እንከን ላይ ከእሱ ጋር ለረጅም ጊዜ ተወያየን። በጽንፈ ዓለም ላይ ስለሚታየው ውስብስብ የሆነ ንድፍም አወራን። ያደረግነው ውይይት አስተሳሰቤን ሙሉ በሙሉ ቀየረው። . . . በኋላም በይሖዋ ምሥክሮች የተዘጋጁ በርካታ ጽሑፎችን አነበብኩ። . . . ከእስር ቤት ከወጣሁ በኋላ ማጥናቴን ቀጠልኩ፤ ከዚያም ተጠመቅኩ።

በይሖዋ ስለመታመን ምን ተምረሃል?

ከቀድሞው የበለጠ መጸለይ ጀመርኩ፤ በተለይ መርማሪው ፊት የምቀርብ ቀን ብዙ እጸልያለሁ። ከመርማሪው ጋር በተነጋገርኩባቸው ጊዜያት እንደተረዳሁት በራሴ ችሎታና ማስተዋል ብቻ እሱ የሚያቀርባቸውን መሰሪ ጥያቄዎች በጥበብ ልመልስና ታማኝነቴን ልጠብቅ አልችልም። መረጋጋትና በልበ ሙሉነት መልስ መስጠት ከፈለግኩ በይሖዋ ሙሉ በሙሉ መታመንና ምን ሊፈጠር እንደሚችል በማሰብ ከልክ በላይ መጨነቅ እንደሌለብኝ ተምሬያለሁ።

በዚያ ወቅት ያበረታታህ ጥቅስ ይኖር ይሆን?

በኢያሱ 1:9 ላይ ያለው ‘ይሖዋ በምትሄድበት ሁሉ ከአንተ ጋር ነው’ የሚለው ሐሳብ በተደጋጋሚ ወደ አእምሮዬ ይመጣ ነበር። ይህ ጥቅስ መሄድ ወደማልፈልግበት ቦታ ልሄድ ብችልም ይሖዋ አብሮኝ እንደሚሆን ያስታውሰኛል። ይሖዋ ‘እኔ አብሬህ እሄዳለሁ፤ አትጨነቅ። [እንደ ኢያሱ ካሉ ታማኝ ሰዎች] ጋር አብሬ እንደሄድኩ ሁሉ ከአንተም ጋር አብሬህ እሄዳለሁ’ እንዳለኝ ሆኖ ይሰማኛል። ይህም ስለ ነገ እንዳልጨነቅና ተስፋ በሚያስቆርጡ ሐሳቦች ላይ እንዳላውጠነጥን ይረዳኛል።

አግኔሳ ፖስትኒኮቫ

የትውልድ ዘመን፦ 1963 (ካዛክስታን)

ግለ ታሪክ፦ ከሰባት ልጆች አምስተኛዋ ናት። ልጅ ሳለች ዳንስ፣ ትወናና በረዶ ላይ መንሸራተት ትወድ ነበር። በአሁኑ ጊዜ ከከተማ ወጣ ማለት፣ አበቦችን መንከባከብና ተራራ መውጣት ያስደስታታል። የልብስ ስፌት ቤት ውስጥ ሠርታለች

በ1979 ተጠመቀች። ከኦሌግ ጋር በ1989 ትዳር መሠረተች

የሰጠችው ሐሳብ

በዚህ ከባድ ጊዜ ምን ድጋፍ አግኝተሻል?

በተገቢው ጊዜ መንፈሳዊ ምግብ እንድናገኝ ለሚያደርገው ለበላይ አካሉ ምስጋናዬን መግለጽ እፈልጋለሁ። መዝሙሮችን፣ ቪዲዮዎችን፣ የክልል ስብሰባዎችንና አዳዲስ የመጽሐፍ ቅዱስ ትርጉሞችን በማዘጋጀቱ ሥራ የሚካፈሉትን ወንድሞችም ባመሰግን ደስ ይለኛል። በዚህ ከባድ ጊዜ የሚያበረታታኝ አፍቃሪ ቤተሰብ ስለሰጠኝ ይሖዋን ከልብ አመሰግነዋለሁ።

ከይሖዋ ዝግጅቶች መካከል ይበልጥ የጠቀመሽ የትኛው ነው?

ወደ ይሖዋ መጸለዬ እንዲሁም ‘ያ አዲስ ዘመን’ እና ‘ሩቅ አይደለም ያ ጊዜ’ እንደሚሉት ያሉ መዝሙሮችን መዘመሬ ረድቶኛል። እነዚህ መዝሙሮች ስለ አዲሱ ዓለም የሚናገሩ ናቸው። መዝሙሮቹን መዘመሬ ያረጋጋኛል፤ አባቴ ይሖዋ ምን ያህል እንደሚወደኝም ያረጋግጥልኛል።

እነዚህ ተሞክሮዎች ይሖዋ ሕዝቦቹ ስደትን በተሳካ ሁኔታ እንዲወጡ አስቀድሞ እንዳዘጋጃቸው የሚያሳዩ ተጨማሪ ማስረጃዎች ናቸው። እንግዲያው ሁላችንም በይሖዋ ‘ታማኝ ፍቅርና ታማኝነት’ መታመናችንን እንቀጥል።—መዝሙር 115:1

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች