መጋቢት 19, 2024 | የታደሰው፦ ኅዳር 5, 2024
ሩሲያ

ወቅታዊ መረጃ—ብይኑ ተሻረ | ‘የሚያጽናናኝ ይሖዋ ራሱ ነው’

አጫውት

ጥቅምት 30, 2024 በቭላዲቮስቶክ የሚገኘው ዘጠነኛው ጠቅላይ ይግባኝ ሰሚ ፍርድ ቤት፣ በወንድም ሰርጌ ቼቹሊን እና በባለቤቱ በእህት ዬሌና ቼቹሊና ላይ ተላልፎ የነበረውን ፍርድ ሽሮታል። ክሳቸው በድጋሚ እንዲታይ ወደ መጀመሪያው ፍርድ ቤት ይመለሳል።

ሚያዝያ 22, 2024 በካምቻትካ ግዛት የሚገኘው የፔትሮፓቭሎቭስክ ካምቻትስኪ ከተማ ፍርድ ቤት፣ በወንድም ሰርጌ ቼቹሊን እና በባለቤቱ በእህት ዬሌና ቼቹሊና ላይ የጥፋተኝነት ብይን አስተላልፏል። ሁለቱም የሁለት ዓመት የገደብ እስራት ተበይኖባቸዋል። በአሁኑ ወቅት እስር ቤት አይገቡም።

አጭር መግለጫ

ሰርጌ ቼቹሊን

ትውልድ፦ 1968 (ቲምላት፣ ካምቻትካ ግዛት)

ግለ ታሪክ፦ ያደገው በሕፃናት ማሳደጊያ ውስጥ ነው። በአንድ የማሞቂያ መሣሪያዎች ድርጅት ውስጥ የጥገና ባለሙያ ነው

ከይሖዋ ምሥክሮች ጋር ማጥናት የጀመረ አንድ ጓደኛው በጉባኤ ስብሰባ ላይ እንዲገኝ ጋበዘው። ሰርጌ ለጥያቄዎቹ አሳማኝ መልስ አገኘ። በ1995 ተጠመቀ

በ2000 ዬሌናን አገባ። አንድ ልጅ አላቸው

የሰጠው ሐሳብ

አንተም ሆንክ ባለቤትህ በተለይ በዚህ ወቅት ያበረታታችሁ የመጽሐፍ ቅዱስ ጥቅስ አለ?

የጉዞ ገደቦች ተጥለውብናል፤ መኪናችን ተወርሷል፤ የባንክ ሒሳባችንም ተዘግቷል። “ሸክምህን በይሖዋ ላይ ጣል፤ እሱም ይደግፍሃል። ጻድቁ እንዲወድቅ ፈጽሞ አይፈቅድም” የሚለው በመዝሙር 55:22 ላይ የሚገኘው ጥቅስ ሙሉ በሙሉ የገባን አሁን ነው። ይሖዋ አጽንቶ እንደሚያቆመን ቃል ገብቷል። እሱ እየረዳን ስለሆነ እነዚህ ሁኔታዎች ኃይላችንን አላሟጠጡትም። በይሖዋና በወንድሞቻችን ይበልጥ መታመንን እየተማርን ነው። ለይሖዋ በተሟላ መንገድ አምልኮ ማቅረባችንን ለመቀጠል ከመቼውም ጊዜ ይበልጥ ቆርጠናል።

ዬሌና ቼቹሊና

ትውልድ፦ 1978 (ፔትሮፓቭሎቭስክ ካምቻትስኪ)

ግለ ታሪክ፦ ነርስ ናት

የዬሌና እናት ከይሖዋ ምሥክሮች ጋር ማጥናት ጀመረች። ይህ አጋጣሚ ዬሌናም የራሷን መንፈሳዊ ፍላጎት እንድታስብ አደረጋት፤ በመሆኑም መጽሐፍ ቅዱስ ለማጥናት ጠየቀች። በ2000 ተጠመቀች

በ2000 ሰርጌን አገባች

የሰጠችው ሐሳብ

በዚህ ተሞክሮ ማለፍሽ ስለ ይሖዋ ምን አስተምሮሻል?

በሕይወቴ ውስጥ ለውጦች ሲያጋጥሙኝ መጽሐፍ ቅዱስን የምረዳበት መንገድ እየጠለቀ እንደሚሄድ አስተውያለሁ። ለምሳሌ ያህል፣ በስደት ማለፌ በሮም 8:38, 39 ላይ የሚገኘውን ሐሳብ በደንብ እንድረዳው አስችሎኛል። “ምክንያቱም ሞትም ቢሆን፣ ሕይወትም ቢሆን፣ መላእክትም ቢሆኑ፣ መንግሥታትም ቢሆኑ፣ አሁን ያሉት ነገሮችም ቢሆኑ፣ ወደፊት የሚመጡት ነገሮችም ቢሆኑ፣ ማንኛውም ኃይል ቢሆን፣ ከፍታም ቢሆን፣ ዝቅታም ቢሆን፣ ሌላ ማንኛውም ፍጥረት ቢሆን በጌታችን በክርስቶስ ኢየሱስ አማካኝነት ከተገለጸው የአምላክ ፍቅር ሊለየን እንደማይችል ሙሉ በሙሉ እርግጠኛ ነኝ” ይላል። ይሖዋ ለእኔ ያለውን ፍቅር ከመግለጽ ሊያግደው የሚችል አንዳች ነገር የለም። ይህን የሚያደርገው ደግሞ የሚያጽናናኝ እሱ ራሱ እንደሆነ በማያጠራጥር መንገድ ነው። ይሖዋ ለአገልጋዮቹ ያለውን ፍቅር ከመግለጽ ወደኋላ አይልም። ይህ ተሞክሮ፣ ከፊቴ የሚጠብቀኝን ማንኛውም ፈተና በጽናት እንድወጣ እንደሚረዳኝ አውቃለሁ።

እንደ ሰርጌና ዬሌና ሁሉ እኛም ፍጹም የሆነውን የአምላክ ቃል ከፍ አድርገን እንመለከተዋለን፤ በፈተና ወቅት በታማኝነት መጽናት እንድንችል ኃይላችንን ያድስልናል እንዲሁም ጥበብ ይሰጠናል።—መዝሙር 19:7

የክሱ ሂደት

መስከረም 25, 2022

የወንጀል ክስ ተመሠረተባቸው
ጥቅምት 17, 2022

ቤታቸው ተፈተሸ
መስከረም 6, 2023

ሰርጌ የጉዞ ገደቦች ተጣሉበት
መስከረም 7, 2023

ዬሌና የጉዞ ገደቦች ተጣሉባት
ታኅሣሥ 26, 2023

ክሳቸው በፍርድ ቤት መታየት ጀመረ

በተጨማሪም ይህን ተመልከት

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች