ሐምሌ 14, 2021| የታደሰው፦ ታኅሣሥ 2, 2022
ሩሲያ

ወቅታዊ መረጃ—ብይን ተላለፈ | ሦስት ወንድሞች ለስደት መዘጋጀታቸው ታማኝነታቸውን እንዲጠብቁ ረድቷቸዋል

አጫውት

ኅዳር 30, 2022 በፕሪሞርይስ ክልል የሚገኘው የኡሱሪስኪ አውራጃ ፍርድ ቤት በወንድም አንቶን ቼርምኒክ፣ በወንድም ሰርጌ ኮሮልቹክ እና በወንድም ዲሚትሪ ቲሽቼንኮ ላይ የጥፋተኝነት ብይን አስተላልፏል። ሦስቱም የስድስት ዓመት የገደብ እስራት ተላልፎባቸዋል። በእርግጥ አሁን ወህኒ አይወርዱም።

የክሱ ሂደት

መስከረም 23, 2020

የአንቶን፣ የሰርጌና የዲሚትሪ ጉዳይ በፍርድ ቤት መታየት ጀመረ
ሐምሌ 7, 2020

አንቶን፣ ሰርጌ እና ዲሚትሪ “ጽንፈኛ” በሆነ እና እገዳ በተጣለበት ሃይማኖታዊ ድርጅት ውስጥ የአመራር ቦታ አላቸው የሚል ክስ ተመሠረተባቸው
ሰኔ 18, 2019

ሰርጌ ለሁለት ቀን ያህል በማረፊያ ቤት እንዲቆይ ተደረገ

አጭር መግለጫ

አንቶን ቼርምኒክ

የትውልድ ዘመን፦ 1987 (ማግዴቡርግ፣ ጀርመን)

ግለ ታሪክ፦ መንትያ ወንድም አለው። አባታቸው ቤተሰባቸውን ጥሎ በሄደበት ወቅት ትንሽ ልጅ ነበር። ትምህርቱን ከጨረሰበት ጊዜ አንስቶ የሶፍትዌር መሐንዲስ ሆኖ ሲሠራ ቆይቷል

እውነትን የተማረው ከእናቱ ነው። መጽሐፍ ቅዱስ የሕይወት ዓላማን አስመልክቶ የያዘው ግልጽ መልእክት ትኩረቱን ሳበው። በ2004 ተጠምቆ የይሖዋ ምሥክር ሆነ። በ2013 ከዬካተሪና ጋር ትዳር መሠረተ። ሚላና የምትባል ልጅ አለቻቸው

የሰጠው ሐሳብ

ለስደት አስቀድመህ ለመዘጋጀት ምን አድርገሃል?

ስለ ጉዳዩ ብዙ ጊዜ አስብ ነበር፤ እኔ ወይም ቤተሰቤ ሊያጋጥሙን የሚችሉ ሁኔታዎችን በአእምሮዬ እሥል ነበር። አዘውትሬ የግል ጥናት አደርጋለሁ። በተለይ ሩሲያ ውስጥ የይሖዋ ምሥክሮች መታሰር ሲጀምሩ እኔም መጽሐፍ ቅዱስ ወይም ሌሎች ጽሑፎች በማላገኝበት ማረፊያ ቤት ውስጥ ልታሰር እንደምችል አስቤ ነበር።

ሰርጌ ኮሮልቹክ

የትውልድ ዘመን፦ 1967 (ቭላዲቮስቶክ፣ ፕሪሞርይስ ክልል)

ግለ ታሪክ፦ የውትድርና ሥልጠና የወሰደ ሲሆን ኬጂቢ ውስጥ ሰላይ ነበር። በኋላም የቤት ዕቃ በሚያመርት ድርጅት ውስጥ ሠርቷል። ከተወሰነ ጊዜ ወዲህ ደግሞ የጽዳት ሥራ ይሠራ ነበር። በ1989 ከየሌና ጋር ትዳር መሠረተ። ሁለት ልጆች አሏቸው

መጽሐፍ ቅዱስ በዓለም ውስጥ እየተፈጸሙ ስላሉት ነገሮች የሚሰጠው ማብራሪያ እንዲሁም ስለ ወደፊቱ ጊዜ የሚሰጠው ተስፋ በጣም አስደነቀው። በ1993 ተጠምቆ የይሖዋ ምሥክር ሆነ

የሰጠው ሐሳብ

በዚህ ፈተና ውስጥ ስታልፍ፣ ወደፊት ለሚያጋጥሙህ የእምነት ፈተናዎች የሚረዳህ ምን ትምህርት አግኝተሃል?

ሁሉም ነገር ልክ ክርስቶስ በተናገረው መሠረት እየተፈጸመ እንዳለ በግልጽ ማየት ችያለሁ። ከልክ በላይ መጨነቅ አያስፈልገንም። ከዚህ ይልቅ መረጋጋት እንዲሁም አጋጣሚውን ስናገኝ ለሌሎች እውነትን በዘዴና በአክብሮት መናገር ይኖርብናል። ፍርድ ቤቱ ምንም ዓይነት ውሳኔ ቢያደርግ ውሳኔውን ለመቀበል ዝግጁ ነኝ፤ ቤተሰቤም ቢሆን ዝግጁ ነው።

ዲሚትሪ ቲሽቼንኮ

የትውልድ ዘመን፦ 1984 (ኡሱሪስክ፣ ፕሪሞርይስ ክልል)

ግለ ታሪክ፦ እሱና ታላቅ እህቱ የሌና ለመጽሐፍ ቅዱስ ፍቅር ያዳበሩት ገና በልጅነታቸው ነው። የማርኬቲንግ ባለሙያ ለመሆን ሥልጠና ወስዷል። በአሁኑ ወቅት አንድን ሕንፃ ያስተዳድራል። በ2001 ተጠምቆ የይሖዋ ምሥክር ሆነ። በ2003 ከአነስቴሲያ ጋር ትዳር መሠረተ። ወደተለያዩ ቦታዎች መጓዝ ይወዳሉ

የሰጠው ሐሳብ

ሌሎች ወደፊት ለሚያጋጥማቸው ስደት መዘጋጀት እንዲችሉ ምን ቢያደርጉ ጥሩ ነው ትላለህ?

በመጀመሪያ፣ ከይሖዋ ጋር ያላችሁን ዝምድና አጠናክሩ። ሁለተኛ፣ ፖሊሶች ቤታችሁ ሲመጡ ምን እንደምታደርጉ አስቀድማችሁ አስቡ፤ እንዲያውም ተለማመዱ።

በአንቶን፣ በሰርጌና በዲሚትሪ ላይ የሚደርሰው ፈተናና ስደት ቢቀጥልም ይሖዋ ለታማኝነታቸው እንደሚባርካቸው እርግጠኞች ነን።—ምሳሌ 28:20

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች