ነሐሴ 20, 2021 | የታደሰው፦ ኅዳር 28, 2022
ሩሲያ

ወቅታዊ መረጃ—ብይን ተላለፈ | በዳግስታን የሚኖሩ ሦስት ወንድሞችና አንዲት እህት በማረፊያ ቤት ሳሉ ይሖዋ ደግፏቸዋል

አጫውት

ኅዳር 24, 2022 በዳግስታን ሪፑብሊክ፣ በማሃችካላ የሚገኘው የኪሮቭስኪ አውራጃ ፍርድ ቤት በወንድም ማራት አብዱልጋሊሞቭ፣ በወንድም አርሴን አብዱላዬቭ፣ በወንድም አንቶን ዴርጋሌቭ እና በእህት ማሪያ ካርፖቫ ላይ የጥፋተኝነት ብይን አስተላልፏል። ከስድስት ዓመት እስከ ስድስት ዓመት ተኩል የሚደርስ የገደብ እስራት ተፈርዶባቸዋል። በእርግጥ በአሁኑ ወቅት ወህኒ አይወርዱም።

የክሱ ሂደት

ግንቦት 27, 2020

ማራት፣ አርሴን፣ አንቶን እና ማሪያ ለ362 ቀናት በማረፊያ ቤት ከቆዩ በኋላ ወደ ቁም እስር ተዛወሩ
ሰኔ 4, 2019

በማሃችካላ የሚገኘው የሶቬትስኪ አውራጃ ፍርድ ቤት አራቱም ማረፊያ ቤት እንዲቆዩ አዘዘ
ሰኔ 1, 2019

የሩሲያ የደህንነት አባላት (የሩሲያ የሚስጥር ፖሊስ) በዳግስታን የሚኖሩ 13 የይሖዋ ምሥክሮችን ቤቶች ፈተሹ
ግንቦት 27, 2019

በዳግስታን የሚገኘው የሩሲያ የደህንነት ቢሮ በማራት፣ በአርሴን፣ በአንቶን እና በማሪያ ላይ የወንጀል ክስ መሠረተ

አጭር መግለጫ

ማራት አብዱልጋሊሞቭ

የትውልድ ዘመን፦ 1991 (ማሃችካላ፣ ዳግስታን ሪፑብሊክ)

ግለ ታሪክ፦ ሦስት ወንድሞችና እህቶች አሉት። እግር ኳስ መጫወት ይወዳል። የብየዳ ሥልጠና ወስዷል፤ በቅርቡ ጫማ ቤት ውስጥ ይሠራ ነበር

ከልጅነቱ አንስቶ መጽሐፍ ቅዱስ ማንበብ ይወድ ነበር። ክርስቶስን ከሚመስሉና ባልንጀራቸውን ከሚወዱ ሰዎች ጋር ጊዜ ማሳለፍ ያስደስተው ነበር። በ2013 ተጠምቆ የይሖዋ ምሥክር ሆነ

የሰጠው ሐሳብ

ለአንድ ዓመት ያህል በማረፊያ ቤት ስትቆይ ሁኔታውን በጽናት ለመቋቋም የረዳህ ምንድን ነው?

ስላለሁበት ሁኔታ ማሰላሰልና ሁኔታዬን ከዮሴፍ ጋር ማወዳደር ጀመርኩ። እኔ ግፋ ቢል አሥር ዓመት ብታሰር ነው። ዮሴፍ ግን የታሰረው ለ13 ዓመት ነው። በይሖዋ እርዳታ እኔም በማንኛውም ሁኔታ ውስጥ ታማኝ መሆን እችላለሁ። ይሖዋ ጸሎቴን የመለሰልኝ እንዴት እንደሆነ ስመለከት ሸክሜን ሁሉ በእሱ ላይ መጣል ጀመርኩ። መዝሙር 55:22 ይህን ፈተና በጽናት ለመቋቋም ረድቶኛል። ጥቅሱ ሸክሜን በይሖዋ ላይ ከጣልኩ እሱ እንደሚደግፈኝ ይናገራል። እኔም ያደረግኩት ይህንኑ ነው።

አርሴን አብዱላዬቭ

የትውልድ ዘመን፦ 1979 (ካሱምኬንት፣ ዳግስታን ሪፑብሊክ)

ግለ ታሪክ፦ ከወጣትነቱ አንስቶ መረብ ኳስ መጫወትና መጽሐፍ ማንበብ ይወዳል። በወይን ጠጅ አጠማመቅ ሙያ ዲግሪ አለው። በቅርቡ የማሞቂያና የቧንቧ ጥገና ላይ ይሠራ ነበር

ወላጆቹ መጀመሪያ ላይ የተቃወሙት ቢሆንም አርሴን በ2000 ተጠምቆ የይሖዋ ምሥክር ሆነ። ከሱዋት ጋር ትዳር መሠረተ። አንድ ትንሽ ልጅ አላቸው

የሰጠው ሐሳብ

ማረፊያ ቤት በቆየህበት ወቅት የተስፋ መቁረጥ ስሜትን መቋቋም የቻልከው እንዴት ነው?

መዝሙሮቻችን በጣም ረድተውኛል። ጥሩ ስሜት እንዲሰማኝ ይረዱኛል። ብዙ ጊዜ ለራሴ እዘምር ነበር። በጣም የምወደው መዝሙር “በልቤ የማሰላስለው ነገር” የሚለው መዝሙር 45 ነው። እርግጥ ተስፋ የቆረጥኩበት፣ በሁሉም ነገር የተሰላቸሁበት፣ የተበሳጨሁበትና ምንም ነገር ለማድረግ ተነሳሽነት ያጣሁበት ጊዜ ነበር። ሆኖም እንዲህ ያለው ስሜት ከአንድ ቀን እንዳያልፍ ጥረት አደርግ ነበር። እንዲህ ያለ ስሜት ሲሰማኝ ለራሴ እንዲህ እላለሁ፦ ‘ነገ ስትነሳ ሁሉም ነገር ይስተካከላል። እነዚህ ስሜቶች ያልፋሉ። ብቻ አንተ በርታ፤ ለቤተሰቦችህ ታስፈልጋለህ፤ ለወንድሞችህና ለእህቶችህም ታስፈልጋለህ።’

አንቶን ዴርጋሌቭ

የትውልድ ዘመን፦ 1985 (ሮስቶቭ-ኦን-ዶን፣ ሮስቶቭ ክልል)

ግለ ታሪክ፦ የአንቶን እናት እሱንና ወንድሙን ያሳደገቻቸው ብቻዋን ነው። እናቱና አያቱ የመጽሐፍ ቅዱስን መሠረታዊ ሥርዓቶች እንዲወድ አስተምረውታል። የኤሌክትሪክና የአካባቢ ማስዋብ ሥራ ሠርቷል። በ2002 ተጠምቆ የይሖዋ ምሥክር ሆነ

የሰጠው ሐሳብ

ይሖዋ በዚህ ፈተና ወቅት የደገፈህ እንዴት ነው?

ወንድሞችና እህቶች እኛን ለመንከባከብ ብዙ ጥረት አድርገዋል። አብሮኝ የታሰረው ሰው ጓደኞቼ ከተወሰኑ ወራት በኋላ ለእኔ ዕቃ መላክ እንደሚያቆሙ ነግሮኝ ነበር። ሆኖም ለስድስት ወር፣ አልፎ ተርፎም ለአንድ ዓመት ያህል ለእኔ ዕቃ መላካቸውን ሲቀጥሉ በጣም ተገረመ!

ሌሎች ለስደት ለመዘጋጀት ምን እንዲያደርጉ ትመክራለህ?

መሰብሰባቸውን እንዳይተዉ እመክራለሁ። ስብሰባዎች በጣም ናፍቀውኝ ነበር። ይሖዋ በሰጣችሁ አጋጣሚ ሁሉ ተጠቀሙ። መንፈሳዊነታችሁን ተንከባከቡ፤ እንዲሁም ምንም ነገር አትፍሩ። ይሖዋ ሁሌም ከጎናችን ነው!

ማሪያ ካርፖቫ

የትውልድ ዘመን፦ 1980 (ማጋዳን፣ ማጋዳን ክልል)

ግለ ታሪክ፦ ሁለት ወንድሞች አሏት። የበረዶ ላይ ሸርተቴ፣ ጉዞ እና ንባብ ትወዳለች። በእንስሳት ሕክምና ዲግሪ አላት

የወደፊቱን ጊዜ በተመለከተ ከመጽሐፍ ቅዱስ አጥጋቢ መልስ ስላገኘች የይሖዋ ምሥክር ለመሆን ወሰነች። በ1998 ተጠመቀች

የሰጠችው ሐሳብ

ማረፊያ ቤት በነበርሽበት ወቅት በጭንቀት እንዳትዋጪ የረዳሽ ምንድን ነው?

ብዙ የመጽሐፍ ቅዱስ ጥቅሶችን አስታውሼ ማስታወሻ ደብተሬ ላይ ጻፍኩ። እነዚህ ጥቅሶች መጽሐፍ ቅዱስ ማግኘት ባልቻልኩባቸው ሦስት ወራት አበረታተውኛል። ፊልጵስዩስ 4:6, 7 አበረታቶኛል። አንድ አስጨናቂ ሁኔታ ሲፈጠር ማስታወሻ ደብተሬን ከፍቼ ያንን ጥቅስ አነብና ለራሴ ‘ስለ ምንም ነገር አትጨነቂ’ እላለሁ። ከዚያ ወዲያው እረጋጋለሁ።

በዚህ አስቸጋሪ ጊዜ የይሖዋን እርዳታ ያየሽው እንዴት ነው?

[ማረፊያ ቤት በነበርኩበት ወቅት] አባቴን በሞት ሳጣ ይሖዋ ረድቶኛል። መርዶውን የሰማሁት ከማላውቀው ሰው ሳይሆን ከእናቴ ነው፤ ምክንያቱም መርማሪው እናቴን በስልክ እንዳነጋግር ፈቅዶልኝ ነበር። በተጨማሪም ሁለት የቅርብ ጓደኞቼ እኔን በመተካት ከእናቴ ጎን አልተለዩም። አብረዋት ተጉዘዋል፤ እንዲሁም በሐዘኑ ወቅት ደግፈዋታል። ወንድሞችና እህቶችም እናቴን አልረሷትም። ይደውሉላት፣ ደብዳቤ ይጽፉላት፣ ፖስት ካርድ ይልኩላት እንዲሁም ጉዳዬ በሚታይበት ወቅት ወደ ፍርድ ቤቱ መምጣት እንድትችል የገንዘብ ድጋፍ ያደርጉላት ነበር።

ይሖዋ አምላክ ምንጊዜም ልክ እንደ ስሙ ሕዝቦቹን ለመጠበቅና ለመደገፍ መሆን የሚያስፈልገውን ሁሉ እንደሚሆን ሙሉ በሙሉ እንተማመናለን።—ዘፀአት 3:14

ፍርድ ቤቱ ብይን የሚያስተላልፍበትን ቀን አስቀድሞ የማያሳውቅበት ጊዜ አለ።

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች