ጥቅምት 21, 2021 | የታደሰው፦ ታኅሣሥ 26, 2022
ሩሲያ

ወቅታዊ መረጃ—ተጨማሪ ቅጣት ተጣለባቸው | ሩሲያ ውስጥ ለረጅም ጊዜ በማረፊያ ቤትና በቁም እስር ቢቆዩም ደስታቸውን ጠብቀዋል

አጫውት

ታኅሣሥ 22, 2022 አራተኛው ጠቅላይ ይግባኝ ሰሚ ፍርድ ቤት በወንድም ሩስታም ዲያሮቭ፣ በወንድም ሰርጌ ክሊኩኖቭ፣ በወንድም ዬቭጌኒ ኢቫኖቭና ባለቤቱ ኦልጋ ላይ ተጨማሪ ቅጣት አስተላልፏል። የእስር ጊዜያቸውን ሲጨርሱ ከአስትራካን ከተማ የመውጣት እግድ እንዲጣልባቸው ዳኛው በይነዋል። ወንድሞችና እህት ማረፊያ ቤት ሆነው ችሎቱን በቪዲዮ ኮንፈረንስ ተከታትለዋል።

መጋቢት 3, 2022 የአስትራካን አውራጃ ፍርድ ቤት ወንድም ሩስታም ዲያሮቭ፣ ወንድም ሰርጌ ክሊኩኖቭ፣ ወንድም ዬቭጌኒ ኢቫኖቭ እና ባለቤቱ ኦልጋ ያቀረቡትን ይግባኝ ውድቅ አድርጓል። አራቱም እንደታሰሩ ይቆያሉ።

የክሱ ሂደት

ጥቅምት 25, 2021

በአስትራካን የሚገኘው የትሩሶቭስኪ አውራጃ ፍርድ ቤት በሩስታም ፣ በዬቭጌኒ እና በሰርጌ ላይ የስምንት ዓመት እስራት በይኗል። የዬቭጌኒ ሚስት ኦልጋ የሦስት ዓመት ከስድስት ወር እስራት ተበይኖባታል። ሦስቱ ወንድሞች ቀድሞውንም ማረፊያ ቤት ነበሩ። ኦልጋ ደግሞ ወዲያውኑ ወደ እስር ቤት ተወስዳለች
ሰኔ 11, 2020

ሩስታም፣ ዬቭጌኒ እና ሰርጌ ማረፊያ ቤት ገቡ። ኦልጋ ደግሞ በቁም እስር እንድትቆይ ተደረገ
ሰኔ 9, 2020

ከ100 የሚበልጡ ፖሊሶች በአስትራካን ከተማ የሚኖሩ 27 የይሖዋ ምሥክሮችን ቤቶች በረበሩ። ሩስታም፣ ዬቭጌኒ፣ ኦልጋ እና ሰርጌ በጊዜያዊ ማረፊያ ቤት እንዲቆዩ ተደረገ
ሰኔ 8, 2020

በሩስታም፣ በዬቭጌኒ፣ በኦልጋ እና በሰርጌ ላይ የወንጀል ክስ ተመሠረተ። ወንድሞች የጽንፈኝነት እንቅስቃሴዎችን በማደራጀትና በገንዘብ በመደገፍ ወንጀል ተከሰሱ። ኦልጋ ደግሞ በጽንፈኝነት እንቅስቃሴ በመካፈል ወንጀል ተከሰሰች

አጭር መግለጫ

ሩስታም ዲያሮቭ

የትውልድ ዘመን፦ 1973 (ሳማርካንድ፣ ኡዝቤኪስታን)

ግለ ታሪክ፦ እናቱ የቲያትር ዳይሬክተር ነበረች። ሥልጠና ከወሰደ በኋላ የአሻንጉሊት ቲያትር ተዋናይ ሆነ

በ1997 ከየሌና ጋር ትዳር መሠረተ። በ1998 ከይሖዋ ምሥክሮች ጋር መጽሐፍ ቅዱስን ማጥናት ጀመሩ፤ ከዚያም በ1999 ተጠመቁ

የሰጠው ሐሳብ

ማረፊያ ቤት ሳለህ በጣም ያበረታታህ የትኛው የመጽሐፍ ቅዱስ ምሳሌ ነው?

ኢየሱስ ልክ ከመሞቱ በፊት የተወው ምሳሌ በተለይ እኔ አሁን ላለሁበት ሁኔታ በጣም ጠቃሚ ነው። ኢየሱስ ከስብከቱ ሥራችን ጋር በተያያዘ ብቻ ሳይሆን መከራን መቋቋም ከምንችልበት መንገድ ጋር በተያያዘም ምሳሌ ትቶልናል። እያንዳንዱን ቀን ለይሖዋ ያለንን ታማኝነት ማሳየት የምንችልበት የመጨረሻ አጋጣሚ አድርገን መመልከት እንዳለብን [ያስታውሰኛል]።

ኦልጋ ኢቫኖቫ

የትውልድ ዘመን፦ 1982 (ቮልዥስኪ፣ ቮልጎግራድ ክልል)

ግለ ታሪክ፦ በልጅነቷ አኮርዲዮን መጫወት ተምራለች። ሥነ ቋንቋ ከተማረች በኋላ የእንግሊዝኛ አስተማሪ ሆና ሠርታለች

በልጅነቷ ሞትን ትፈራ ነበር። በአሥራዎቹ ዕድሜ እያለች እናቷ ከይሖዋ ምሥክሮች ጋር ተገናኘች፤ ከዚያም ኦልጋን ስለ መጽሐፍ ቅዱስ አስተማረቻት። ኦልጋ በ1997 ተጠመቀች

የሰጠችው ሐሳብ

ከባለቤትሽ ተለይተሽ ባለሽበት በዚህ ወቅት ተስፋ መቁረጥን ለማሸነፍ የረዳሽ ምንድን ነው?

ይሖዋ እና ኢየሱስ የተዉት ምሳሌ ተስፋ እንዳልቆርጥ አበረታቶኛል። ይሖዋ እኔን ጨምሮ ሁሉንም ሰው ለማዳን ሲል ለ33 ዓመት ተኩል ያህል ከወዳጁ ከኢየሱስ ተለይቶ መቆየት አስፈልጎታል። ባለቤቴ የቅርብ ጓደኛዬ ነው፤ በጣም ይናፍቀኛል። ሆኖም [የይሖዋንና የኢየሱስን] ያህል ረጅም ጊዜ ተለያይተን የምንቆይ አይመስለኝም። በይሖዋ እርዳታ ሁሉንም ነገር በጽናት መቋቋም እንደምንችል እርግጠኛ ነኝ።

ሰርጌ ክሊኩኖቭ

የትውልድ ዘመን፦ 1975 (አስትራካን)

ግለ ታሪክ፦ ማረፊያ ቤት ከመግባቱ በፊት የብየዳ ባለሙያ ነበር። እሱና ባለቤቱ ኢሪና መጽሐፍ ቅዱስን ማጥናት የጀመሩት ተመሳሳይ ጊዜ ላይ ነው። የመጽሐፍ ቅዱስ መመሪያዎች ማጨሱን እንዲያቆም ረድተውታል። በ2007 ተጠመቀ። ሁለት ሴቶች ልጆች አሏቸው። በትርፍ ጊዜው ዓሣ ማጥመድና ጊታር መጫወት ይወዳል

የሰጠው ሐሳብ

በማረፊያ ቤት ቆይታህ ታማኝነትህን ለመጠበቅ የረዳህ ምንድን ነው?

እዚህ ከገባሁበት ጊዜ አንስቶ ለጸሎት ያለኝ አድናቆት ጨምሯል። በተለይ እዚህ ጸሎት በጣም አስፈላጊ ነው። ለስድስት ወር ያህል ብቻዬን ታስሬያለሁ። እርግጥ ሁኔታው ቀላል አይደለም፤ ሆኖም ጸሎት ሁሉንም ነገር በጽናት መቋቋም እንድችል ረድቶኛል። ሁኔታው በጣም ከባድ ሲሆንብኝ እንበረከክና የልቤን አውጥቼ ወደ አባቴ እጸልያለሁ። በዚህ ጊዜ ልቤ ይረጋጋል፤ ወዲያውኑ ጥሩ ስሜት ይሰማኛል። የአባታችንን ኃያል እጅ ማየት በጣም አስደናቂ ነው። በእሱ ላይ ሙሉ እምነት አለኝ፤ ስለዚህ አልፈራም።

ይሖዋ በመከራ ጊዜ ለታማኝ አገልጋዮቹ ቅርብ እንደሆነ ማወቃችን በእጅጉ ያጽናናናል።—መዝሙር 139:5, 10