ታኅሣሥ 16, 2021
ሩሲያ

ወቅታዊ መረጃ | አምስት ወንድሞችና አንዲት እህት መጽሐፍ ቅዱስን ማንበባቸው ስደትን ለመቋቋም ረድቷቸዋል

አጫውት

ነሐሴ 25, 2022 በሳራንስክ የሚገኘው የሌኒንስኪ አውራጃ ፍርድ ቤት ወንድም ዴኒስ አንቶኖቭ፣ ወንድም ቭላዲሚር አትርያኪን፣ ወንድም አሌክሳንደር ኮሮሌቭ፣ ወንድም ጌኦርጊ ኒኩሊን፣ እህት ዬሌና ኒኩሊና እና ወንድም አሌክሳንደር ሼቭቹክ ጥፋተኛ ናቸው የሚል ብይን አስተላልፏል። ዴኒስ፣ አሌክሳንደር ኮሮሌቭ እና አሌክሳንደር ሼቭቹክ እያንዳንዳቸው የሁለት ዓመት እስራት ተበይኖባቸዋል። ጌኦርጊ እና ዬሌና የአራት ዓመት ከሁለት ወር እስራት፣ ቭላዲሚር ደግሞ የስድስት ዓመት እስራት ተፈርዶባቸዋል። ሁሉም ወዲያውኑ ወደ ወህኒ ተወስደዋል።

የክሱ ሂደት

ሰኔ 11, 2021

በሳራንስክ በሚገኘው የሌኒንስኪ አውራጃ ፍርድ ቤት የመጀመሪያው ችሎት ተሰየመ
ሚያዝያ 2, 2021

ዬሌና ጽንፈኛ በሆነ ድርጅት እንቅስቃሴ በመካፈልና አባላትን በመመልመል ወንጀል ተከሰሰች
መጋቢት 31, 2021

ቭላዲሚር የጽንፈኛ ድርጅትን እንቅስቃሴ በማስተባበር ወንጀል ተከሰሰ
ሐምሌ 2, 2019

አሌክሳንደር ሼቭቹክ እና ጌኦርጊ ከማረፊያ ቤት የተለቀቁ ሲሆን አካባቢውን ለቀው እንዳይሄዱ ታዘዙ
መጋቢት 28, 2019

ቭላዲሚር ከማረፊያ ቤት የተለቀቀ ሲሆን አካባቢውን ለቆ እንዳይሄድ ታዘዘ
የካቲት 8, 2019

አሌክሳንደር ሼቭቹክ፣ ቭላዲሚር እና ጌኦርጊ ወደ ማረፊያ ቤት ገቡ
የካቲት 4, 2019

የፌደራል ደህንነት ቢሮ ጽንፈኛ የሆነን ድርጅት እንቅስቃሴ አስተባብረዋል በሚል በአምስት ወንድሞችና በእህት ዬሌና ላይ ክስ መሠረተ

አጭር መግለጫ

ዴኒስ አንቶኖቭ

የትውልድ ዘመን፦ 1976 (ሲክቲቭካር፣ ኮሚ ሪፑብሊክ)

ግለ ታሪክ፦ ልጅ ሳለ በአባቱ የሥራ ጠባይ ምክንያት ቤተሰቡ በተደጋጋሚ ከቦታ ቦታ ይዘዋወር ነበር። የቴክኒክ ትምህርት ቤት ገብቶ የማዕድን ቁፋሮ መሣሪያ የኤሌክትሪክ ባለሙያና የመካኒክነት ሥልጠና አግኝቷል

በማዕድን ማውጫ ውስጥ የኤሌክትሪክ ቴክኒሺያን ሆኖ ለአምስት ዓመት ሠርቷል። ፎቶግራፍ ማንሳትና ቼዝ መጫወት ይወዳል

ስለ አምላክ ብዙ ጥያቄዎች ነበሩት፤ ሃይማኖታዊ ጽሑፎችንና መጽሐፍ ቅዱስን ለመረዳት ጥረት ቢያደርግም አልተሳካለትም። በጦር ሠራዊት ውስጥ ሳለ ከይሖዋ ምሥክሮች ጋር መጽሐፍ ቅዱስን ያጠና ከነበረ አንድ ጓደኛው ጋር ደብዳቤ ይጻጻፍ ነበር። መጽሐፍ ቅዱስ እርስ በርሱ እንደሚስማማና የአምላክ ስም ይሖዋ እንደሆነ ሲያውቅ ልቡ ተነካ። በ1998 ተጠምቆ የይሖዋ ምሥክር ሆነ። በ2015 ከኦልጋ ጋር ትዳር መሠረተ

የሰጠው ሐሳብ

ደፋር እንድትሆንና እንድትጸና የረዳህን አንድ የመጽሐፍ ቅዱስ ጥቅስ ልትነግረን ትችላለህ?

ከምወዳቸው ጥቅሶች መካከል አንዱ ዘፍጥረት 15:1 ነው። . . . የፌደራል ደህንነት አባላት ቤታችን መጥተው ለምርመራ በወሰዱኝ ምሽት ላይ ይህ ጥቅስ በተደጋጋሚ ወደ አእምሮዬ ይመጣ ነበር፤ ይህም ጥቅሱን ይበልጥ እንድወደው አድርጎኛል። . . . እንድረጋጋና ታማኝ ሆኜ እንድቀጥል ረድቶኛል።

ቭላዲሚር አትርያኪን

የትውልድ ዘመን፦ 1987 (ሮዥዲየስትቪዬኖ፣ ሞርዶቪያ ሪፑብሊክ)

ግለ ታሪክ፦ ያደገው በነጠላ ወላጅ ነው። ታናሽ ወንድም አለው። እግር ኳስ፣ መረብ ኳስና ሆኪ መጫወት ይወዳል። ያጠናው ኮምፒውተር ፕሮግራሚንግ ነው። የሚሠራው የኮምፒውተር ሲስተም ባለሙያ ሆኖ ነው

መጽሐፍ ቅዱስን የማወቅ ፍላጎት ያደረበት ገና ተማሪ ሆኖ ነው። በ2004 ተጠምቆ የይሖዋ ምሥክር ሆነ። በ2009 ከማሪያ ጋር ትዳር መሠረተ። ሁለት ትናንሽ ልጆች አሏቸው። ቭላዲሚር በታሰረበት ወቅት ልጆቹ ዘጠኝ ወርና ሁለት ዓመት ነበሩ

የሰጠው ሐሳብ

በእነዚህ ፈታኝ ጊዜያት ከይሖዋ ጋር ያለህ ዝምድና ይበልጥ የተጠናከረው እንዴት ነው?

ከቤተሰቤ በመለያየቴ በጣም አዝኜና ተጨንቄ ነበር። ወደ ማረፊያ ቤት ስወሰድ አንዱ ሠራተኛ የሆኑ ሰነዶችን እየሞላ ነበር። ሰውየው ለምን እንደታሰርኩ ጠየቀኝ። በዚህ ጊዜ ያሳሰበኝን ነገር [የቤተሰቤን ጉዳይ] የነገርኩት ይመስለኛል። እሱም ያለአንዳች ጥርጥር “የእናንተ ሰዎች ቤተሰቦችህን ፈጽሞ አይተዉአቸውም” አለኝ። . . . የእምነት ባልንጀሮቼ ቤተሰቤን እንደሚንከባከቧቸው እርግጠኛ ነበር። . . . ይሖዋ በእሱ ልተማመንበት እንደምችል በዚህ ጠባቂ አማካኝነት እያስታወሰኝ እንዳለ ተሰማኝ። ከማረፊያ ቤት ወጥቼ ባለቤቴን ሳነጋግራትና ይሖዋ በእምነት ባልንጀሮቻችን ተጠቅሞ ምን ያህል ቤተሰባችንን እንደተንከባከበ ስትነግረኝ በጣም ነው የተገረምኩት።

አሌክሳንደር ኮሮሌቭ

የትውልድ ዘመን፦ 1978 (ዜሜትቺኖ፣ ፔንዛ ክልል)

ግለ ታሪክ፦ ያደገው ያለአባት ነው። ልጅ ሳለ ዓሣ ማጥመድና ኳስ መጫወት ይወድ ነበር። የሁለተኛ ደረጃ ትምህርቱን ካጠናቀቀ በኋላ የከባድ መኪና ሹፌር እና የማሽን ባለሙያ ሆኖ ሠርቷል። እረኛና ከብት አርቢ ሆኖም ሠርቷል። አሁን አናጺ ነው

ከይሖዋ ምሥክሮች ጋር መጽሐፍ ቅዱስ ሲያጠና ለበርካታ ዓመታት በአእምሮው ውስጥ ሲጉላሉ ለነበሩ ጥያቄዎች መልስ አገኘ። በ1998 ተጠመቀ። በ2006 ከናታልያ ጋር ትዳር የመሠረተ ሲሆን የእሷን ልጅ አብረው እያሳደጉ ነው

የሰጠው ሐሳብ

በሳምንታዊ ስብሰባዎች ላይ መገኘትህ ምን ጥቅም አስገኝቶልሃል?

በሳምንቱ መሃል ስብሰባ ላይ የሚኖረው የመጽሐፍ ቅዱስ ንባብ በጣም ጠቅሞኛል። በጥንት ጊዜ የነበሩ የይሖዋ አገልጋዮች በተዉት ምሳሌ ላይ ሳሰላስል ባሳዩት ድፍረትና እምነት እበረታታለሁ። በስብሰባዎች ላይ የሚሰጡንን ምክሮች ተግባራዊ ማድረጌ ለሌሎች ደግነት እንዳሳይ ይረዳኛል። ተገቢ የሆነ ምግባር ለማሳየትና . . . በይሖዋ ስም ላይ ነቀፋ የሚያመጣ ነገር ከማድረግ ለመቆጠብ እንዲረዳኝ ሁሌም ወደ ይሖዋ እጸልያለሁ።

ጌኦርጊ ኒኩሊን

የትውልድ ዘመን፦ 1963 (ሮቬንኪ፣ ዩክሬን)

ግለ ታሪክ፦ የሹፌርነት እና የመካኒክነት ሥልጠና አጠናቋል። በተጨማሪም የግራፊክ ዲዛይን፣ የሳተላይት ሬዲዮ ጥገና፣ የተለያዩ መሣሪያዎች ጥገናና በእንጨት ላይ ቅርጽ የማውጣት ሙያ አለው

ከድሮ ጀምሮ አዳዲስ ነገሮችን ማጥናትና መማር ያስደስተዋል። በተለይ ስለ ሰው ልጆች አመጣጥ የማወቅ ከፍተኛ ጉጉት አለው። ከይሖዋ ምሥክሮች ጋር መጽሐፍ ቅዱስ ሲያጠና ለበርካታ ጥያቄዎቹ አጥጋቢ መልስ ማግኘት ችሏል

የሰጠው ሐሳብ

በማረፊያ ቤት ሳለህ እምነትህ እንዳይዳከምና ደፋር ሆነህ እንድትቀጥል የረዳህ ምንድን ነው?

በመጽሐፍ ቅዱስ ላይ ምርምር ማድረጌና በጥቅሶች ላይ ማሰላሰሌ ረድቶኛል። ደግሞም [መጽሐፍ ቅዱስ] እምነትና ድፍረት ስላሳዩ በርካታ የይሖዋ አገልጋዮች የሚናገሩ ዘገባዎችን ይዟል። የእነሱን ምሳሌ መኮረጅ መቻሌ በጣም ያስደስተኛል።

ሰይጣን መሠረተ ቢስ የሆኑ ውሸቶችን በመጠቀም ጽኑ አቋማችንን ለማዳከም እንደሚሞክር በጥንት ዘመን ከተፈጸመው ነገር እንረዳለን። ከእኛ ጋር በተያያዘም ይህንኑ እንደሚያደርግ እናውቃለን፤ በመሆኑም ለእነዚህ ውሸቶችና መሠረተ ቢስ ወሬዎች ጆሮ መስጠትም ሆነ መደናገጥ የለብንም።

ዬሌና ኒኩሊና

የትውልድ ዘመን፦ 1968 (ሞናስቲርስኮዬ፣ ሞርዶቪያ ሪፑብሊክ)

ግለ ታሪክ፦ ልጅ ሳለች የበረዶ ሸርተቴና ልብስ ስፌት ትወድ ነበር። መጀመሪያ ላይ ልብስ ስፌት በኋላም ፓተርን ማውጣት ተማረች። ሥራ ፍለጋ ወደ ሳራንስክ እና ቶልያቲ ተዛወረች። ልብስ ሰፊ ሆና ሠርታለች። አሁን የጽዳት ሥራ እየሠራች ነው

በ2016 ከጌኦርጊ ጋር ትዳር መሠረተች። ባልና ሚስቱ መጽሐፍ ቅዱስን የማወቅ ፍላጎት አደረባቸው። አምላክ በሰዎች ላይ የሚደርሰውን ሥቃይ ቸል ብሎ እንደማያልፍ፣ ስሜታችንን እንደሚረዳና አፍቃሪ እንደሆነ ተማረች። በ2017 ተጠምቃ የይሖዋ ምሥክር ሆነች

የሰጠችው ሐሳብ

ወንድሞችሽና እህቶችሽ ያደረጉልሽ እርዳታ የጠቀመሽ እንዴት ነው?

[ፖሊሶች] ቤታችንን ከበረበሩ ከአንድ ዓመት በኋላ እሳት አደጋ ተነስቶ ቤታችን ወደመ። . . . ዘመዶቻችን ወንድሞችና እህቶች ያደረጉልንን እንክብካቤ ሲያዩ በጣም ተገረሙ። አሁን የመጽሐፍ ቅዱስን ምክር ተግባር ላይ እያዋሉና [መንፈሳዊ እድገት እያደረጉ ነው]።

አሌክሳንደር ሼቭቹክ

የትውልድ ዘመን፦ 1989 (ፕያቲጎርስክ፣ ስታቭሮፖል ክልል)

ግለ ታሪክ፦ በመሬት አቀማመጥ ንድፍና በግንባታ ሙያ ሠልጥኗል። በኋላ ወደ ሳራንስክ ተዛወረ። የቤት ዕቃዎች በሚያመርት ድርጅት ውስጥ ተቀጥሮ ሠርቷል። ቅርጫት ኳስና የጠረጴዛ ቴኒስ ይወዳል

ቅድመ አያቶቹ የይሖዋ ምሥክር በመሆናቸው ምክንያት ወደ ሳይቤሪያ በግዞት ተወስደው ነበር። ሁለቱም ወላጆቹ የተወለዱት ሳይቤሪያ ነው

በ2006 ተጠመቀ። በወታደራዊ አገልግሎት ፋንታ አማራጭ የሲቪል አገልግሎት ሰጥቷል

የሰጠው ሐሳብ

በማረፊያ ቤት ባሳለፍካቸው አራት ወራት ያጋጠሙህን ተፈታታኝ ሁኔታዎች ለመወጣት የረዱህ የትኞቹ መንፈሳዊ ልማዶች ናቸው?

በየቀኑ ጠዋት ጠዋት ከቁርስ በፊት በቤተሰብ አብረን የዕለት ጥቅስ የማንበብ ልማድ አለን፤ በጣም ልጅ በነበርኩበት ጊዜም ማለት ነው። ይህ ልማድ በውስጤ ተቀርጿል፤ እስር ቤት ከገባሁ በኋላም ይህን ልማድ ይዤ ለመቀጠል ሞክሬያለሁ። መጀመሪያ ላይ መጽሐፍ ቅዱስ ስላልነበረኝ ጥቅሶችን ወይም አንድ የይሖዋ አገልጋይ የተወውን ምሳሌ ለማስታወስና በዚያ ላይ ማሰላሰል ጥረት አደርግ ነበር። በዚህ መልኩ መጀመሪያ ካስታወስኳቸው ጥቅሶች አንዱ ኢሳይያስ 40:26-31 ነው። በጣም ከምወዳቸው ጥቅሶች አንዱ ነው። ይህ ጥቅስ ይሖዋ ፈጣሪ መሆኑን እንዲሁም አስደናቂ የሆነ ኃይል እንዳለው እንዳልዘነጋ ረድቶኛል። ይሖዋ ይህን ኃይሉን ደካማ ፍጡር የሆንነውን የሰው ልጆችን ለመርዳት ይጠቀምበታል፤ ከባድ ሁኔታ ውስጥ ስንሆን ኃይሉን በመስጠት ያጠነክረናል።

ይሖዋ በሩሲያ ስደት እየደረሰባቸው ላሉት በእሱ የሚታመኑ ውድ ወንድሞቻችንና እህቶቻችን ታማኝ ፍቅር ማሳየቱን እንደሚቀጥል እርግጠኞች ነን።—ዘፍጥረት 32:10