ታኅሣሥ 21, 2021 | የታደሰው፦ ጥር 24, 2024
ሩሲያ

ወቅታዊ መረጃ—እህት ተፈረደባት | እህት ዬሌና ሜንቺኮቫ ታማኝ የአምላክ አገልጋዮች በተዉት ምሳሌ ላይ ማሰላሰሏና የቅርብ ወዳጇ ወደሆነው ወደ ይሖዋ መጸለይዋ አጠናክሯታል

አጫውት

ጥር 23, 2024 በካራቻዬቮ ቺርኬሲያ ሪፑብሊክ የሚገኘው የቺርክየስክ ከተማ ፍርድ ቤት እህት ዬሌና ሜንቺኮቫ ጥፋተኛ ናት የሚል ብይን ያስተላለፈ ሲሆን የአራት ዓመት ከስድስት ወር የገደብ እስራት ፈርዶባታል። አሁን ወህኒ አትወርድም።

ታኅሣሥ 5, 2022 አምስተኛው ጠቅላይ ይግባኝ ሰሚ ፍርድ ቤት፣ በእህት ዬሌና ሜንቺኮቫ ላይ የተላለፈውን ብይን ቀለበሰ። ጉዳይዋ በድጋሚ እንዲታይ ወደ ታችኛው ፍርድ ቤት ይላካል።

የክሱ ሂደት

ታኅሣሥ 15, 2021

በካራቻዬቮ ቺርኬሲያ ሪፑብሊክ የሚገኘው የቺርክየስክ ከተማ ፍርድ ቤት ዬሌና ጥፋተኛ ናት የሚል ውሳኔ በማስተላለፍ በአምስት ዓመት የገደብ እስራት እንድትቀጣ ወሰነ
ሰኔ 9, 2021

ክሱ በፍርድ ቤት መታየት ጀመረ
መጋቢት 9, 2021

መርማሪው ለሁለተኛ ጊዜ ክስ የመሠረተባት ሲሆን ክሱ የተመሠረተው በጽንፈኛ ድርጅት እንቅስቃሴ ውስጥ ሌሎችን ለማካተት “የወንጀል ዕቅድ አውጥታለች” በሚል ነው
የካቲት 10, 2021

ዬሌና የመጽሐፍ ቅዱስ ጥቅሶችን በመጠቀም ሁኔታውን ለማስረዳት ብትሞክርም መርማሪው ዬሌና ክሱ እንዲሰረዝላት ያቀረበችውን ጥያቄ ውድቅ አደረገ። እንዲያውም ዬሌና የተካፈለችባቸው እንቅስቃሴዎች “ወንጀል ነክ” እንደሆኑ የሚያረጋግጠው አንዱ ማስረጃ የመጽሐፍ ቅዱስ ጥቅሶችን መጠቀሟ እንደሆነ ገለጸ
ኅዳር 13, 2020

መርማሪው ዬሌና መዝሙር በመዘመሯና ወደ ይሖዋ በመጸለይዋ የወንጀል ክስ መሠረተባት
ኅዳር 12, 2020

ባለሥልጣናት ለሁለተኛ ጊዜ የዬሌናን ቤት ፈተሹ
ታኅሣሥ 16, 2019

የቺርክየስክ የፌደራል ደህንነት ቢሮ አባላት የዬሌናን ጨምሮ የአሥር የይሖዋ ምሥክር ቤተሰቦችን ቤቶች ፈተሹ

አጭር መግለጫ

ዬሌና ሜንቺኮቫ

የትውልድ ዘመን፦ 1964 (ዛፖርዤ፣ ዩክሬን)

ግለ ታሪክ፦ ያደገችው በሕፃናት ማሳደጊያ ውስጥ ነው። በኑክሌር ኃይል ማመንጫ ጣቢያዎች ግንባታ ተሰማርታ የነበረ ሲሆን ይህም የጤና ችግር አስከትሎባታል። ከ2003 አንስቶ የሥነ ሕንፃ ባለሙያ ሆና እየሠራች ነው

በአምላክ መኖር አታምንም ነበር። ከይሖዋ ምሥክሮች ጋር መጽሐፍ ቅዱስን ስታጠና ፈጣሪ እንዳለና ለምድር አስደሳች ዓላማ እንዳለው ተገነዘበች። በ1995 ተጠመቀች። ተራራ መውጣትና ሥዕል መሣል ትወዳለች

የሰጠችው ሐሳብ

ጸሎት ከይሖዋ ጋር ያለሽን ዝምድና ለማጠናከር የረዳሽ እንዴት ነው?

ውብ ተፈጥሮ ወዳለበት አካባቢ ሄጄ በተፈጥሮ ተከብቤ ለረጅም ጊዜ መጸለይ [ያስደስተኛል]። የልቤን አውጥቼ ወደ ይሖዋ እጸልያለሁ፤ ሐሳቤን፣ ስሜቴንና የሚያስጨንቀኝን ነገር ሁሉ ለእሱ ግልጥልጥ አድርጌ እነግረዋለሁ። ይሖዋም በምላሹ የማያቋርጥ ውስጣዊ ሰላምና መረጋጋት ይሰጠኛል፤ ይህም ወደ እሱ ይበልጥ እንድቀርብ አድርጎኛል።

ይሖዋ ከማንም ይበልጥ የምቀርበው ወዳጄ ሆኖልኛል። ማንኛውም ችግር በሚያጋጥመኝ ጊዜ እኔን ለመርዳት ዝግጁ ነው። በሐዘኔም ሆነ በደስታዬ ሁሌም እሱን ላነጋግረው እችላለሁ።

በመጽሐፍ ቅዱስ ውስጥ የተጠቀሱ ታማኝ ሴቶች ምሳሌ የጠቀመሽ እንዴት ነው?

እንደ ሣራ፣ ረዓብ፣ ሐና እና ማርያም ያሉ ታማኝ ሴቶች ምሳሌ በጣም ጠቅሞኛል። . . . እነዚህ ሴቶች በጣም ከባድ ተፈታታኝ ሁኔታዎች አጋጥመዋቸዋል። ያም ሆኖ ድፍረት ለማሳየትና ለእምነት ብርቱ ተጋድሎ ለማድረግ አቅማቸው የፈቀደውን ሁሉ አድርገዋል፤ ይሖዋም ላሳዩት ታማኝነት ወሮታ ከፍሏቸዋል።

ይሖዋ እህት ዬሌናን ጨምሮ ስደትን እየተጋፈጡ ያሉ ታማኝ አገልጋዮቹን በሙሉ ማጽናናቱንና ማበረታታቱን እንዲቀጥል ጸሎታችን ነው።—መዝሙር 119:49, 50

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች