መስከረም 14, 2023 | የታደሰው፦ መስከረም 22, 2023
ሩሲያ

ወቅታዊ መረጃ—እህቶች ተፈረደባቸው | ሦስት እህቶች በጸሎት ብርታት አግኝተዋል

አጫውት

መስከረም 21, 2023 በአሙር ክልል የሚገኘው የዜያ አውራጃ ፍርድ ቤት፣ በእህት ማርጋሪታ ሞይሴዬንኮ ላይ የሦስት ዓመት፣ በእህት ጋሊና ያትሲክ ላይ የሁለት ዓመት እዲሁም በእህት የሌና ያትሲክ ላይ የሁለት ዓመት ተኩል የገደብ እስራት ፈረደባቸው። አሁን ወህኒ አይወርዱም።

አጭር መግለጫ

ማርጋሪታ ሞይሴዬንኮ

ትውልድ፦ 1978 (ክራስነያርስክ፣ ክራስነያርስክ ግዛት)

ግለ ታሪክ፦ ልብስ ሰፊ ነች። በ1998 ኮንስታንቲንን አገባች። ኮንስታንቲን ሐምሌ 14, 2021 ጥፋተኛ ነው ተብሎ የተበየነበት ሲሆን የስድስት ዓመት የገደብ እስራት ተፈርዶበታል

የ18 ዓመት ወጣት ሳለች ከቅርብ ዘመዷ ሕልፈተ ሕይወት በኋላ መጽሐፍ ቅዱስን ማጥናት ጀመረች። በ2001 ተጠምቃ የይሖዋ ምሥክር ሆነች

የሰጠችው ሐሳብ

በጽናት እንድትቀጥዪ የረዳሽ ምንድን ነው?

በ2018 በተደረገው “ደፋር ሁኑ”! የክልል ስብሰባ ላይ ምሳሌ 21:31 ሲብራራ አስታውሳለሁ። ጥቅሱ እንዲህ ይላል፦ “ፈረስ ለጦርነት ቀን ይዘጋጃል፤ መዳን ግን ከይሖዋ ዘንድ ነው።” ፈረስ በተፈጥሮው ድንጉጥ እንስሳ ነው። በውጊያ ወቅት እንዳይደነብር አስቀድሞ ‘ሊዘጋጅ’ ወይም ሊለማመድ ይገባል። ለእኛም ሁኔታው ተመሳሳይ ነው። እምነትና ድፍረት ይዘናቸው የምንወለዳቸው ነገሮች አይደሉም። እነዚህን ባሕርያት በማዳበር ለየራሳችን የውጊያ ግንባር መዘጋጀት አለብን። እንዲህ ማድረግ እንድችል ራሴን በመንፈሳዊ መመገብና መጽሐፍ ቅዱስን በጥልቀት ማጥናት እንዳለብኝ ተረድቻለሁ፤ ወደፊት ምንም ዓይነት ሁኔታ ቢያጋጥመኝ እምነቴ እንዳይዋልል መጸለይም አለብኝ።

ጋሊና ያትሲክ a

ትውልድ፦ 1950 (ዜያ)

ግለ ታሪክ፦ በከተማ ግንባታና ጥገና ቢሮዎች ውስጥ የወጪ ምጣኔ ትንተና ባለሙያ ነበረች። አሁን በጡረታ ላይ ናት

በ1971 ቫለሪን አገባች። አንዲት ሴትና አንድ ወንድ ልጅ አፍርተዋል። በ1995 ባለቤቷ ሕይወቱ አለፈ

ያደገችው በአምላክ መኖር በማያምን ቤተሰብ ውስጥ ነው። ሕይወት እንዴት እንደተገኘ ጥያቄ ሆኖባት ነበር። መጠበቂያ ግንብ እና ንቁ! መጽሔቶችን ማንበብና በስብሰባዎች ላይ መገኘት ጀመረች። ፈጣሪ እንዳለም አሳማኝ ማስረጃ አገኘች። በ1994 ተጠመቀች

የሰጠችው ሐሳብ

ይህ አስቸጋሪ ጊዜ፣ ጸሎት ስላለው ኃይል ምን አስገንዝቦሻል?

ያልተጠበቁ ነገሮች በሚከሰቱበት ጊዜ አጭር ጸሎት ማድረግ ያለውን ጥቅም በደንብ ተገንዝቤአለሁ። እንድረጋጋና ተገቢ የሆነ ምላሽ እንድሰጥ ይረዳኛል። ሌሎች ስለ እኔ እንደሚጸልዩ ማወቄም በጣም አበረታቶኛል። ያዕቆብ 5:16 “ጻድቅ ሰው የሚያቀርበው ምልጃ ታላቅ ኃይል አለው” ይላል። ውስጣዊ ሰላም እንዲኖረኝና እንዳልሸበር አስተዋጽኦ ካደረጉልኝ ነገሮች መካከል አንዱ ሌሎች ስለ እኔ የሚያቀርቡት ጸሎት እንደሆነ ይገባኛል። እኔ ራሴም ሆንኩ ሌሎች ስለ እኔ የሚያቀርቡት ጸሎት እንደ ሕይወት አድን መንሳፈፊያ ሆኖልኛል።

የሌና ያትሲክ b

ትውልድ፦ 1972 (ዜያ)

ግለ ታሪክ፦ ልብስ ሰፊ ነች

በ1994 አንድሬን አገባች። አንዲት ሴት ልጅ አለቻቸው

የየሌና እናት እና ታናሽ ወንድሟ ዬቭጌኒ ቢቱሶቭ ከይሖዋ ምሥክሮች ጋር መጽሐፍ ቅዱስን ማጥናት ጀመሩ። የሌናም የመጽሐፍ ቅዱስ መሠረታዊ ሥርዓቶች ጠቃሚ መሆናቸውንና የእሷንም ሕይወት እንዴት እንዳሻሻሉት ተመለከተች። በ1997 ተጠመቀች

የሰጠችው ሐሳብ

የደረሰብሽ ስደት በአንቺ ላይ ምን ተጽዕኖ አሳድሮብሻል?

ከይሖዋ ጋር ያለኝ ወዳጅነት ተጠናክሯል። ይሖዋ እንዲያረጋጋኝ እጸልያለሁ፤ ውስጣዊ ሰላም በመስጠት ጸሎቴን ሲመልስም ተመልክቻለሁ። ለወንድሞቼና ለእህቶቼ ያለኝ አድናቆትም አድጓል። በችግሬ ፈጥነው እንደሚደርሱልኝ ማወቄ ያጽናናኛል። እውነትም የአንድ ትልቅ ቤተሰብ አባል እንደሆንኩ ይሰማኛል። እንደ ወንድሜ ዬቭጌኒ በእስር ቤት ላሉት መጸለይ አስፈላጊ እንደሆነም ይበልጥ ተረድቻለሁ። ስለ እነሱ በየቀኑ እጸልያለሁ።

የእህቶቻችን ተሞክሮ፣ ይሖዋ ጸሎታችንን እንደሚሰማና ማንኛውንም መከራ ለመቋቋም የሚያስችሉንን ባሕርያት እንድናዳብር እንደሚረዳን ያስታውሰናል።—1 ዮሐንስ 5:14

የክሱ ሂደት

መጋቢት 21, 2019

የእነማርጋሪታ ቤት ተፈተሸ
ጥቅምት 13, 2020

የየሌና እና የጋሊና ቤቶች ተፈተሹ
ኅዳር 22, 2021

የክስ ፋይል ተከፈተባቸው
የካቲት 15, 2022

የጉዞ ገደብ ተጣለባቸው
ሚያዝያ 24, 2023

ክሳቸው በፍርድ ቤት መታየት ጀመረ

a b እህት ጋሊና ያትሲክ እና የሌና ያትሲክ የሥጋ ዝምድና የላቸውም

በተጨማሪም ይህን ተመልከት

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች