ሚያዝያ 8, 2024 | የታደሰው፦ ሐምሌ 1, 2024
ሩሲያ

ወቅታዊ መረጃ—እስራት ተፈረደባቸው | ማረፊያ ቤት ውስጥ የይሖዋን እንክብካቤ መቅመስ

አጫውት

ሰኔ 26, 2024 በሮስቶቭ ክልል የሚገኘው የኖቮቼርካስክ ከተማ ፍርድ ቤት፣ እህት ልዩቦቭ ጋሊትሲና፣ ወንድም ጋሬጊን ኻቻቱርያን እና ወንድም ጌቮርግ ዬሪትስያን ጥፋተኛ ናቸው የሚል ብይን አስተላልፏል። እህት ልዩቦቭ የሁለት ዓመት ከሦስት ወር እስራት ተፈርዶባታል፤ ሆኖም ማረፊያ ቤት ካሳለፈችው ጊዜ አንጻር የእስራት ጊዜዋን እንደጨረሰች ተቆጥሮላታል። አሁን ወህኒ አትወርድም። ጋሬጊን የስድስት ዓመት ከስድስት ወር፣ ጌቮርግ ደግሞ የስድስት ዓመት ከሁለት ወር እስራት ተበይኖባቸዋል። ወንድሞች እስር ቤት ይቆያሉ።

አጭር መግለጫ

ልዩቦቭ ጋሊትሲና

ትውልድ፦ 1959 (ፕላስቱኖቭስካያ፣ ክራስናዳር ግዛት)

ግለ ታሪክ፦ በጡረታ ከመገለሏ በፊት በአንድ ፋብሪካ ውስጥ ሜካኒካል መሐንዲስ ሆና ትሠራ ነበር

መጽሐፍ ቅዱስ፣ ወደፊት ሕመምና ሞት የሌለበት ዓለም እንደሚመጣ የሚሰጠውን ተስፋ ስትሰማ መጽሐፍ ቅዱስን የመማር ፍላጎት አደረባት። በ1995 ተጠምቃ የይሖዋ ምሥክር ሆነች

በ2015 ባለቤቷ አረፈ

የሰጠችው ሐሳብ

ማረፊያ ቤት በቆየሽበት የአንድ ዓመት ከአራት ወር ጊዜ ውስጥ የይሖዋን ድጋፍ ያየሽው እንዴት ነው?

ከአደንዛዥ ዕፅ ተጠቃሚዎች፣ ከሌቦች እና ከሌሎች ወንጀለኞች ጋር በአንድ ክፍል ውስጥ መታሰር በጣም ከባድ ነበር። ውጥረት የሚፈጥር ነበር። አንዳንዴ ሌሊቱን ሙሉ ይሖዋ ሁኔታውን ለመቋቋም እንዲረዳኝ ስጸልይ አድራለሁ። ማረፊያ ቤት በነበርኩበት ወቅት 25 የተለያዩ ሰዎች እኔ የታሰርኩበት ክፍል ገብተው ወጥተዋል። ይሖዋ፣ ከሁሉም ጋር ጥሩ ግንኙነት መፍጠር እንድችል ረድቶኛል። በዚህ ሁኔታ ተጠቅሞ የራሴን ድክመቶች ለይቼ እንዳውቅና እንድሠራባቸውም አግዞኛል። እንደ ክርስቲያን መጠን ማደግ የምችልበት አጋጣሚ ስለሆነልኝ አመስጋኝ ነኝ።

ጋሬጊን ኻቻቱርያን

ትውልድ፦ 1967 (አዘርባጃን)

ግለ ታሪክ፦ አናጺ ነበር። ፖላንድና ጀርመን ይኖር ነበር፤ በኋላም በ1995 ሩሲያ መኖር ጀመረ

በመጽሐፍ ቅዱስ ትክክለኛነት እንዲሁም ምክሮቹን ተግባራዊ ማድረግ በሚያስገኛቸው ጥቅሞች ተደነቀ። በ1994 ተጠመቀ

በ2008 ከክሴኒያ ጋር ተጋቡ። አንድ ወንድ ልጅ አላቸው

የጋሬጊን ባለቤት ክሴኒያ የሰጠችው ሐሳብ a

አንቺም ሆንሽ ባለቤትሽ እንድትጸኑ የረዳችሁ ምንድን ነው?

ጋሬጊን እንዲህ ሲል ጽፎልኝ ነበር፦ “ይሖዋ ለሚያደርግልን ድጋፍ በጣም አመስጋኝ ነኝ። በጉባኤ ካሉ ወዳጆቻችን የሚደርሱኝ ደብዳቤዎች ብዙ መንፈሳዊ ማበረታቻ ሰጥተውኛል። ወንድሞችና እህቶች አንቺንም እየተንከባከቡሽ እንዳለ ማወቄም ያረጋጋኛል። ከይሖዋ ጋር ይህን ያህል ተቀራርቤ አላውቅም።” እኔም በጋሬጊን ሐሳብ እስማማለሁ። ሁለታችንም ወደ ይሖዋ ይበልጥ እንደቀረብን ይሰማኛል፤ ከመቼውም ጊዜ ይበልጥ የእሱን እጅ በየቀኑ በሕይወታችን እያየን ነው።

ጌቮርግ ዬሪትስያን b

ትውልድ፦ 1987 (ኖቮቼርካስክ)

ግለ ታሪክ፦ የይሖዋ ምሥክር ከመሆኑ በፊት ፖሊስ ነበር። በአሁኑ ወቅት ከታናሽ ወንድሙ ጋር የአንድ ካፌ ባለቤት ነው

በ2010 ሜሊናን አገባ። ሁለት ትናንሽ ልጆች አሏቸው

የጌቮርግ እናት የይሖዋ ምሥክር የሆነችው በ1990ዎቹ ዓመታት ነው። በኋላ ላይ ጌቮርግም መጽሐፍ ቅዱስን ማጥናት ጀመረ፤ ማርሻል አርትስ መተውን ጨምሮ በሕይወቱ ለውጦች አደረገ። በ2013 ተጠመቀ

ይህ ዜና በተጠናቀረበት ወቅት ጌቮርግ ማረፊያ ቤት ስለነበር የእሱንም ሆነ የባለቤቱን አስተያየት ማግኘት አልተቻለም

ተቃዋሚዎቻችን ጉዳት ሊያደርሱብን ቢያስቡም ይሖዋ ታማኝ አገልጋዮቹን መባረኩን እንደሚቀጥልና “ነገሩን ለመልካም [እንደሚያደርገው]” እንተማመናለን።—ዘፍጥረት 50:20

የክሱ ሂደት

ነሐሴ 11, 2022

ልዩቦቭ፣ ጋሬጊን እና ጌቮርግ የክስ ፋይል ተከፈተባቸው። ቤቶቻቸው ተፈተሹ። ጋሬጊን እና ጌቮርግ ጣቢያ ተወሰዱ
ነሐሴ 12, 2022

ጋሬጊን እና ጌቮርግ ማረፊያ ቤት ገቡ
ነሐሴ 16, 2022

ልዩቦቭ ጣቢያ ተወሰደች
ነሐሴ 17, 2022

ልዩቦቭ ማረፊያ ቤት ገባች
መስከረም 20, 2023

ክሳቸው በፍርድ ቤት መታየት ጀመረ
ታኅሣሥ 25, 2023

ልዩቦቭ ከማረፊያ ቤት ተለቀቀች፤ የቁም እስረኛ ሆነች