ግንቦት 6, 2024 | የታደሰው፦ ሐምሌ 11, 2024
ሩሲያ

ወቅታዊ መረጃ—እስራት ተፈረደባቸው | ‘ከይሖዋ ቁጥጥር ውጭ የሆነ ምንም ነገር የለም’

አጫውት

ሐምሌ 10, 2024 በፕሪሞርይስ ግዛት የሚገኘው የኮሮልስኪ አውራጃ ፍርድ ቤት፣ ወንድም ቦሪስ አንድሬቭ፣ ወንድም አናቶሊ ሊ እና እህት ናታሊያ ሻራፖቫ ጥፋተኛ ናቸው የሚል ብይን አስተላልፏል። ቦሪስ የስድስት ዓመት፣ አናቶሊ የስድስት ዓመት ከስድስት ወር፣ ናታሊያ ደግሞ የሦስት ዓመት እስራት ተፈርዶባቸዋል። ሦስቱም በአሁኑ ወቅት ማረፊያ ቤት ሲሆኑ በዚያው እስራታቸውን ይቀጥላሉ።

አጭር መግለጫ

ቦሪስ አንድሬቭ

ትውልድ፦ 1951 (ሞናስቲሪሽቼ፣ ፕሪሞርይስ ግዛት)

ግለ ታሪክ፦ የአምቡላንስ የድንገተኛ ሕክምና አገልግሎት ሰጪ ሆኖ ሠርቷል

ለጥያቄዎቹ ከመጽሐፍ ቅዱስ ላይ አሳማኝ መልስ ሲሰጠው እውነትን እንዳገኘ እርግጠኛ ሆነ። በ2004 ተጠምቆ የይሖዋ ምሥክር ሆነ

በ2020 ከአሌክሳንድራ ጋር ተጋቡ

የቦሪስ ባለቤት አሌክሳንድራ የሰጠችው ሐሳብ a

ባለቤትሽ ይህን ከባድ ሁኔታ እንድትቋቋሚ የረዳሽ እንዴት ነው?

ትዝ ይለኛል፣ ቦሪስ ከታሰረ በኋላ አንድ ቀን በጣም ከፍቶኝ ነበር። ስሜቴ በጣም ተደቆሰ፤ ከዚያም አለቀስኩ። ለቦሪስ ምን እንደተፈጠረና ምን እንደተሰማኝ በደብዳቤ ነገርኩት። መልሶ ሲጽፍልኝ ሁኔታዬን እንደሚረዳና ስሜቴን እንደሚጋራ ነገረኝ። በጣም የጠቀመኝ ግን፣ ከአሁን በፊት በይሖዋ እርዳታ የተወጣናቸውን ፈተናዎች አስታወሰኝ። በወቅቱ የሚያስፈልገኝ ይህ ነበር፤ ይሖዋ መቼም እንደማይተወን ይበልጥ እርግጠኛ እንድሆን ረዳኝ።

አናቶሊ ሊ

ትውልድ፦ 1985 (ኡዝቤኪስታን)

ግለ ታሪክ፦ ብዙ ቤተ ክርስቲያኖች ቢሄድም ለጥያቄዎቹ መልስ ሊያገኝ አልቻለም። ከይሖዋ ምሥክሮች ጋር ማጥናት ጀመረ፤ የመጽሐፍ ቅዱስን እውነት ሲማር በጣም ተደሰተ። በ2010 ተጠመቀ

በ2011 ከራይሳ ጋር ተጋቡ

የአናቶሊ ባለቤት ራይሳ የሰጠችው ሐሳብ b

አንቺም ሆንሽ ባለቤትሽ የይሖዋን ድጋፍ ያያችሁት እንዴት ነው?

አናቶሊ ማረፊያ ቤት እንደገባ አካባቢ ብቻዬን መሆኔ እንደሚያሳስበው ነግሮኝ ነበር። ከመታሰሩ በፊት በየቀኑ በመንፈሳዊ እንቅስቃሴዎች በመካፈል አብረን ጊዜ እናሳልፍ ነበር። ነገር ግን ይሖዋ በወንድሞቻችን አማካኝነት የሚያስፈልገኝን ነገር ሁሉ እያሟላልኝ እንደሆነ ሲመለከት ጭንቀቱ ቀለለለት። ሁለታችንም ይሖዋ ከልብ እንደሚያስብልንና መቼም እንደማይተወን ተመልክተናል።

ናታሊያ ሻራፖቫ

ትውልድ፦ 1972 (ካዛክስታን)

ግለ ታሪክ፦ በ1995 ከይሖዋ ምሥክሮች ጋር ተገናኘች፤ መጽሐፍ ቅዱስን እንድታጠና የተደረገላትን ግብዣም ተቀበለች። መጽሐፍ ቅዱስ የአምላክ ቃል እንደሆነ አረጋገጠች። በ2012 ተጠመቀች

የናታሊያ እናት ኒና የሰጠችው ሐሳብ c

ናታሊያ ማረፊያ ቤት ሳለች አዎንታዊ ሆና እንድትቀጥል እየረዳት ያለው ምንድን ነው?

ልጄ ማረፊያ ቤት ውስጥ የተለያዩ ተፈታታኝ ሁኔታዎች ያጋጥሟታል። ማረፊያ ቤቱ በጣም ቀዝቃዛ ነው። በዚያ ላይ ራስ ምታት በተደጋጋሚ ይነሳባታል። አንዳንዴ ቢከፋትም ከይሖዋ ቁጥጥር ውጭ የሆነ ምንም ነገር እንደሌለ እርግጠኛ ነች። እንዲህ ብላለች፦ “እዚህ ለዘላለም እንደማልኖር አውቀዋለሁ። ይሖዋ ትዕግሥት ይሰጠኛል፤ እኔም ለመጠበቅ ዝግጁ ነኝ።” እነዚህ ተፈታታኝ ሁኔታዎች ናታሊያ ይበልጥ ወደ ይሖዋ እንድትቀርብ አድርገዋታል። በእቅፉ ውስጥ ያለች ያህል ነው።

ይሖዋ ለቦሪስ፣ ለናታሊያ እና ለአናቶሊ እንዳደረገው ሁሉ በጭንቀት ቀን እንደሚሰማንና ለመጽናት የሚያስችል ጥንካሬ እንደሚሰጠን እርግጠኞች ነን።—መዝሙር 20:1

የክሱ ሂደት

ሐምሌ 28, 2022

የክስ ፋይል ተከፈተባቸው
ጥቅምት 6, 2022

ያሮስላቭስኪ መንደር ውስጥ አሥራ ሁለት ቤቶች ተፈተሹ። ቦሪስ እና ናታሊያ ጣቢያ ተወሰዱ
ጥቅምት 7, 2022

ቦሪስ እና ናታሊያ ማረፊያ ቤት ተላኩ
ጥቅምት 12, 2022

አናቶሊ ጣቢያ እንዲያድር ተደረገ
ጥቅምት 13, 2022

አናቶሊ ማረፊያ ቤት ገባ
ጥቅምት 5, 2023

ክሳቸው በፍርድ ቤት መታየት ጀመረ

a b c ይህ ርዕስ በተጠናቀረበት ወቅት ወንድም ቦሪስ፣ ወንድም አናቶሊ እና እህት ናታሊያ ማረፊያ ቤት ነበሩ፤ በመሆኑም የግል አስተያየታቸውን ማግኘት አልተቻለም።

በተጨማሪም ይህን ተመልከት

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች