ሰኔ 7, 2022 | የታደሰው፦ ሚያዝያ 3, 2023
ሩሲያ

ወቅታዊ መረጃ— እስራት ተፈረደባቸው | ወንድሞቻችን በይሖዋ መታመናቸው ለመጽናት ረድቷቸዋል

አጫውት

መጋቢት 31, 2023 በሞስኮ የሚገኘው የባቡሽኪንስኪ የአውራጃ ፍርድ ቤት ወንድም ኢቫን ቻይኮቭስኪ፣ ወንድም ዩሪ ቼርኒሼቭ፣ ወንድም ቪታሊ ኮማሮቭ፣ ወንድም ሰርጌ ሸታሎቭ እና ወንድም ቫርዳን ዜካርያን ጥፋተኛ ናቸው የሚል ብይን አስተላልፏል። ኢቫን፣ ዩሪ፣ ቪታሊ እና ሰርጌ እያንዳንዳቸው የስድስት ዓመት ከሦስት ወር እስራት ተፈርዶባቸዋል። ቫርዳን የአራት ዓመት ከሦስት ወር እስራት ተፈርዶበታል። ሁሉም ከፍርድ ቤት ወደ ወህኒ ተወስደዋል።።

የክሱ ሂደት

ኅዳር 24, 2020

የሩሲያ ባለሥልጣናት በሞስኮ የሚገኙ ቢያንስ 20 የይሖዋ ምሥክሮች ቤቶችን በረበሩ። ፖሊሶች ኢቫንን፣ ዩሪን፣ ቪታሊን እና ሰርጌን ወደ ማረፊያ ቤት ከወሰዷቸው በኋላ ለየብቻ ነጣጥለው አሰሯቸው። የዩሪ ቤት ሲበረበርና እሱና ቤተሰቡ ምርመራ ሲደረግባቸው በቪዲዮ ካሜራ ይቀረጽ ነበር። ይህ ቪዲዮ በኋላ ላይ በመንግሥት የቴሌቪዥን የዜና ጣቢያዎች ተላልፏል
ኅዳር 26, 2020

ሰርጌ ከማረፊያ ቤት ተለቆ የቁም እስረኛ ተደረገ። ቤቱ በተበረበረበት ወቅት በደረሰበት ጉዳት የተነሳ ሆስፒታል ገብቶ የነበረው ቫርዳን ደግሞ ማረፊያ ቤት ውስጥ ለብቻው ተነጥሎ እንዲቆይ ተደረገ
ኅዳር 27, 2020

ፍርድ ቤቱ ኢቫን፣ ዩሪ እና ቪታሊ ከማረፊያ ቤት ተፈትተው የቁም እስረኛ እንዲሆኑ ወሰነ
ኅዳር 30, 2020

ባለሥልጣናቱ ቫርዳን ከማረፊያ ቤት እንዲለቀቅና የቁም እስረኛ እንዲሆን ወሰኑ፤ ቫርዳን ፖሊሶች ሕጋዊ ባልሆነ መንገድ በኃይል እንደተጠቀሙ በመግለጽ ለአቃቤ ሕግ ቢሮ ቅሬታ አቀረበ
የካቲት 16, 2022

ክሱ በፍርድ ቤት መታየት ጀመረ

አጭር መግለጫ

ዩሪ ቼርኒሼቭ

የትውልድ ዘመን፦ 1963 (ሞስኮ)

ግለ ታሪክ፦ የኢንዱስትሪ እና የሲቪል ምሕንድስና ተምሯል። የግንባታ መሐንዲስ ነው

እሱና ባለቤቱ ዬካተሪና የተጠመቁት በ1997 ነው። በአሥራዎቹ ዕድሜ ላይ የምትገኝ ልጅ አለቻቸው

የሰጠው ሐሳብ

ወንድሞችና እህቶች ቤተሰባችሁን እየደገፉ ያሉት እንዴት ነው?

ውድ ወንድሞቼና እህቶቼ ለሚያደርጉልን ድጋፍ በጣም አመስጋኝ ነኝ! . . . አንዳንዶች አዘውትረው አስቤዛ ያመጡልናል እንዲሁም በሚያስፈልገን ነገር ያግዙናል። . . . ማቴዎስ 6:31-33 ላይ የሚገኘውን ሐሳብ እውነተኝነት ተመልክተናል። በእርግጥም የሚያስፈልገን ነገር ሁሉ አለን።

ቪታሊ ኮማሮቭ

የትውልድ ዘመን፦ 1976 (ሞስኮ)

ግለ ታሪክ፦ ሞስኮ በሚገኘው የሩሲያ የቴሌቪዥንና የራዲዮ ብሮድካስቲንግ ቢሮ ውስጥ የሥራ ኃላፊ ሆኖ ሠርቷል። ንብ ማነብ ይወዳል

በ1999 ከየሌና ጋር ትዳር መሠረተ። በመጽሐፍ ቅዱስ ውስጥ የሚገኙ ትንቢቶች መፈጸም መጽሐፍ ቅዱስ ትክክለኛ መሆኑን እንዲያምን አደረገው። በ2003 ተጠመቀ

የሰጠው ሐሳብ

ከደረሰብህ ፈተና ምን ትምህርት አግኝተሃል?

ልክ ከመያዜ በፊት የወጣቶች ጥያቄ—ሕይወቴን እንዴት ብጠቀምበት ይሻላል? የሚለውን ቪዲዮ በድጋሚ ተመልክቼ ነበር። በዕድሜ የገፋው ወንድም ማጎሪያ ካምፕ ውስጥ ስላገኘው ትምህርት የተናገረውን ሐሳብ በጣም ወድጄው ነበር። ብዙ ነገር አላስፈለገውም። ሳህኑና ማንኪያው እስካሉ ድረስ በልቶ ማደር ይችል ነበር። በተያዝኩ በሁለተኛው ቀን የዚህን ሐሳብ እውነተኝነት በገዛ ዓይኔ ተመልክቻለሁ። ሙሉ ቀን ፍርድ ቤት ውዬ ወደ ማረፊያ ቤቱ ስመለስ ከምሽቱ 3:00 ሆኖ ነበር፤ የራት ሰዓት አልፏል። አብሮኝ የታሰረው ሰው፣ ዘበኞቹን ለሻይ የሚሆን የፈላ ውኃ እንድጠይቃቸው የራሱን ብርጭቆ ሰጠኝ። በዚያ ቅጽበት ያ ቪዲዮ ትዝ አለኝ። በዚያ ወቅት ይበልጥ የሚያስፈልገኝ አንድ ብርጭቆ ሻይ እንጂ መኪና ወይም ሞባይል ስልክ አይደለም፤ ድሮ ቢሆን ያለነዚህ ነገሮች መኖር የምችል አይመስለኝም ነበር።

ሰርጌ ሸታሎቭ

የትውልድ ዘመን፦ 1969 (ስታቭሮፖል፣ ስታቭሮፖል ክልል)

ግለ ታሪክ፦ ወጣት እያለ ቼዝ፣ የጠረጴዛ ቴኒስና መረብ ኳስ መጫወት ይወድ ነበር። ባሕር ኃይል ውስጥ አገልግሏል፤ በዚያ ወቅት በደረሰበት ጉዳት የተነሳ የአካል ጉዳተኛ ነው። አሁን መልእክተኛ ሆኖ ይሠራል

ከየሌና ጋር የተጋቡት በ1995 ሲሆን በዚያው ዓመት መጨረሻ አካባቢ ተጠመቁ

የሰጠው ሐሳብ

ይሖዋ እነዚህን ፈተናዎች መቋቋምህን እንድትቀጥል እንደሚረዳህ የምትተማመነው ለምንድን ነው?

ይሖዋ አምላክ በዓለም ዙሪያ ያሉ ወንድሞቼ ስለ እኔ የሚያቀርቡትን ጸሎት እንደሚሰማ እርግጠኛ ነኝ። እንዲህ ያለ መተማመን ያደረብኝ መጽሐፍ ቅዱስ ይሖዋ ጸሎትን እንደሚሰማ ስለሚናገር ብቻ አይደለም፤ እኔ ራሴ ያለኝ ደስታና ሰላም ይህን አረጋግጦልኛል።

ለይተህ በመጥቀስ የጸለይክበት ጉዳይ አለ? ይህን ማድረግህ የጠቀመህ እንዴት ነው?

አምላክ እንደ አንበሳ ደፋር ለመሆን እንዲረዳኝ አዘውትሬ በጸሎት እጠይቀዋለሁ። እንዲህ ያለ ድፍረት ካለኝ ማንኛውንም ሰውም ሆነ የሚያጋጥመኝን መጥፎ ሁኔታ አልፈራም። ከዚህም በተጨማሪ እስር ቤት ስላሉ ወንድሞቼ፣ ስለ ቤተሰቦቻቸው እንዲሁም እስር ቤት ባይሆኑም እንኳ እንደ እኔ ዓይነት ተፈታታኝ ወይም አስጨናቂ ሁኔታ እያጋጠማቸው ስላሉ ወንድሞቼ እጸልያለሁ።

ቫርዳን ዜካርያን

የትውልድ ዘመን፦ 1971 (የረቫን፣ አርሜንያ)

ግለ ታሪክ፦ ልጅ እያለ ከአያቱ ጋር አትክልት መንከባከብ ያስደስተው ነበር። ልብስ ሰፊ ነው

ጦር ሠራዊት ውስጥ አገልግሏል። ከዚያ በኋላ መጽሐፍ ቅዱስን አጥንቶ በ1996 ተጠመቀ

የሰጠው ሐሳብ

በጣም የረዳህን የመጽሐፍ ቅዱስ ጥቅስ ልትነግረን ትችላለህ?

ዘዳግም 32:4 “እሱ ዓለት፣ የሚያደርገውም ነገር ሁሉ ፍጹም ነው፤ መንገዶቹ ሁሉ ፍትሕ ናቸውና። እሱ ፈጽሞ ፍትሕን የማያጓድል ታማኝ አምላክ ነው” ይላል። ስለዚህ ምንም ዓይነት ፈተና ቢደርስብን መጽናት እንችላለን ማለት ነው።

ውድ ወንድሞቻችንና ቤተሰቦቻቸው ምንጊዜም ወደ ይሖዋ ለመቅረብ ጥረት ሲያደርጉ ይሖዋም ወደ እነሱ እየቀረበ መሆኑን ማየታችን በጣም ያበረታታናል።—ያዕቆብ 4:8

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች