ሚያዝያ 20, 2023 | የታደሰው፦ ነሐሴ 14, 2024
ሩሲያ

ወቅታዊ መረጃ—ወንድም መቀጮ ተጣለበት | ወንድም ኦካፕኪን የፍጥረት ሥራዎችን መመልከቱ አበርትቶታል

አጫውት

ነሐሴ 13, 2024, በኢቫኖቮ ክልል የሚገኘው የኪንሸምስኪ ከተማ ፍርድ ቤት ወንድም አንድሬ ኦካፕኪን ጥፋተኛ ነው የሚል ብይን አስተላልፏል።የ540,000 ሩብል (6,064 የአሜሪካ ዶላር) መቀጮ ተጥሎበታል።

አጭር መግለጫ

አንድሬ ኦካፕኪን

የትውልድ ዘመን፦ 1962 (ዛቮልዥስክ፣ ኢቫኖቮ ክልል)

ግለ ታሪክ፦ የኮምፒውተር ፕሮግራመር እና የፊዚክስ መምህር ሆኖ ሠርቷል

በ1987 ከኢሪና ጋር ትዳር መሠረተ። ኢሪና በ1994 ከይሖዋ ምሥክሮች ጋር መጽሐፍ ቅዱስን ማጥናት ጀመረች። አንድሬ፣ ፈጣሪ መኖሩን አሳማኝ ማስረጃ ሲያገኝ አብሯት ማጥናት ጀመረ። ሁለቱም በ1995 ተጠመቁ

የሰጠው ሐሳብ

የቁም እስረኛ በነበርክበት ወቅት ተስፋ እንዳትቆርጥ የረዳህ ምንድን ነው?

የሚያስፈልገኝን ነገር ለይቼ በመጥቀስ አጭር ጸሎትም እንኳ ማቅረቤ፣ ስለደረሰብኝ ነገር እያሰብኩ እንዳልቆዝም ረድቶኛል። በተጨማሪም የተስፋ መቁረጥ ስሜት ሲሰማኝ ስለ ኢዮብ አስባለሁ። ይሖዋ፣ ግሩም የሆኑ ባሕርያቱን እንዲያስታውስ ኢዮብን ለመርዳት የፍጥረት ሥራዎቹን ጠቅሶለት ነበር። እኔም ስለ ይሖዋ ፍጥረት ለማሰብ ሞከርኩ። ጎህ ሲቀድ ማየት በጣም ያስደስተኛል። ደመናውን፣ ሰማዩን እንዲሁም ዛፎችን በተመስጦ እመለከታለሁ። ወፎች ሲበርሩ ያላቸው ቅልጥፍና ያስደንቀኛል። ከምንኖርበት ሕንፃ ውጭ የሚኖሩት ትናንሽ ድመቶችና ውሾች የሚያደርጓቸውን ነገሮች ልብ ብዬ አያለሁ። ወደ አምስት ወር ለሚጠጋ ጊዜ በረንዳችን ላይ ሆኜ እነዚህን ነገሮች በትኩረት እመለከት ነበር። ይህን ማድረጌ በፍጥረት ሥራዎች ላይ የተንጸባረቁትን የይሖዋን ባሕርያት ይበልጥ እንዳስተውል ረድቶኛል። ይሖዋ ምን ያህል አፍቃሪ አባት እንደሆነ አሁን ይበልጥ ተገንዝቤያለሁ።

መከራን በጽናት የተቋቋሙ ሌሎች ያበረታቱህ እንዴት ነው?

ማረፊያ ቤት እያለሁ፣ እስር ቤት ካለ አንድ ወንድም ደብዳቤ ደረሰኝ። ደብዳቤው እንዲህ ይላል፦ “ሰዎች ‘ፈርተህ ነበር?’ ብለው ይጠይቁኛል። ‘አልፈራሁም’ ብል ውሸት ይሆንብኛል። ሆኖም ፍርሃታችንን ማሸነፍ አለብን፤ ድፍረት የሚያስፈልገንም ለዚህ ነው። እኛ የይሖዋ አገልጋዮች የምንታወቀው በድፍረታችን ነው፤ ምክንያቱም ፍርሃት ሲያድርብን ይሖዋ ደፋሮች እንድንሆን ይረዳናል። ዋናው ነገር የእምነታችን ግዝፈት እንጂ የችግሮቻችን መብዛት እንዳልሆነ አስታውስ።” የዚህን ወንድምና የሌሎችን ተሞክሮዎች ማንበቤ፣ ከይሖዋ ጋር ያለኝን ወዳጅነት ማጠናከር እንዲሁም አእምሮዬንና ልቤን በመንፈሳዊ ምግብ መሙላት ምን ያህል አስፈላጊ መሆኑን እንድገነዘብ ረድቶኛል።

እንደ አንድሬ ሁሉ እኛም “የአምላክን ድንቅ ሥራዎች” እናደንቃለን፤ የይሖዋን ፍቅራዊ አሳቢነት እንድናስታውስ ይረዱናል።—ኢዮብ 37:14

የክሱ ሂደት

ኅዳር 18, 2021

በአንድሬ ላይ የክስ ፋይል ተከፈተ
ኅዳር 23, 2021

የአንድሬን ጨምሮ የስድስት የይሖዋ ምሥክሮች ቤቶች ተፈተሹ። አንድሬ በቁጥጥር ሥር ውሎ ጣቢያ እንዲያድር ተደረገ
ኅዳር 24, 2021

የወንጀል ክስ ተመሠረተበት
ኅዳር 25, 2021

ማረፊያ ቤት እንዲወርድ ተደረገ
የካቲት 17, 2022

ከማረፊያ ቤት ተለቀቀ፤ የቁም እስረኛ ተደረገ
ሐምሌ 14, 2022

ከቁም እስር ነፃ ሆነ፤ የጉዞ እገዳ ተጣለበት
ታኅሣሥ 15, 2022

ክሱ በፍርድ ቤት መታየት ጀመረ

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች