ሚያዝያ 1, 2022
ሩሲያ

ወቅታዊ መረጃ | ወንድም ሰርጌ ቤሉሶቭ ለአምላክ ስም ጥብቅና ቆሟል

አጫውት

ሰኔ 30, 2022 የቶምስክ ክልላዊ ፍርድ ቤት ወንድም ሰርጌ ቤሉሶቭ ያቀረበውን ይግባኝ ውድቅ አድርጓል። በአሁኑ ወቅት ወህኒ አይወርድም።

ሚያዝያ 14, 2022 በቶምስክ ክልል የሚገኘው የሴቬርስኪ ከተማ ፍርድ ቤት፣ ሰርጌ ጥፋተኛ ነው የሚል ብይን ያስተላለፈ ሲሆን የሦስት ዓመት የገደብ እስራት ፈርዶበታል።

የክሱ ሂደት

ሐምሌ 14, 2020

የፌዴራል ደህንነት አባላት፣ የሰርጌን ጨምሮ የሰባት የይሖዋ ምሥክሮችን ቤቶች በረበሩ። ከብርበራው በፊት ባሉት ወራት፣ አንድ የመንግሥት ሰላይ መጽሐፍ ቅዱስን የመማር ፍላጎት ያለው መስሎ በመቅረብ የይሖዋ ምሥክሮቹ የሚያደርጓቸውን ስብሰባዎች ይቀርጽ ነበር
መጋቢት 25, 2021

በሰርጌ ላይ የክስ ፋይል ተከፈተ
መጋቢት 30, 2021

ሰላዩ የቀረጸውን ስብሰባ ማስረጃ በማድረግ በሰርጌ ላይ ክስ ተመሠረተበት። ሰርጌ የተከሰሰው በኢንተርኔት የቪዲዮ ኮንፈረንስ አማካኝነት በሃይማኖታዊ ፕሮግራም ላይ በመካፈሉ፣ በፕሮግራሙ ላይም በመዘመሩና ለይሖዋ አምላክ በመጸለዩ ነው

አጭር መግለጫ

ሰርጌ ቤሉሶቭ

የትውልድ ዘመን፦ 1978 (ኤሲል፣ ካዛክስታን)

ግለ ታሪክ፦ ያደገው ሙዚቀኛ በሆነ ቤተሰብ ውስጥ ነው። በአንድ የኬሚካል ማብላያ ፋብሪካ ውስጥ የኤሌክትሪክ ባለሙያና የሳይት ተቆጣጣሪ ሆኖ ሠርቷል። በኋላም በአንድ የዲዛይን መሥሪያ ቤት ውስጥ የፕሮጀክት አርቃቂ ሆኖ ሠርቷል። በ1999 ከስቬትላና ጋር ትዳር መሠረተ። አንዲት ልጅ አለቻቸው

በ2001 ከይሖዋ ምሥክሮች ጋር ተገናኘ። መጽሐፍ ቅዱስን ሲማር የአምላክ ስም ይሖዋ እንደሆነ አወቀ፤ ያሳስቡት ለነበሩ ጥያቄዎችም የሚያረካ መልስ አገኘ። በ2002 ተጠመቀ

የሰጠው ሐሳብ

ወንድሞችና እህቶች አንተንም ሆነ ቤተሰብህን የረዷችሁ እንዴት ነው?

ውድ ወንድሞቻችንና እህቶቻችን ሁሌም ከጎናችን ነበሩ። ብርበራው በተካሄደ በማግሥቱ እኛንና ዘመዶቻችንን ሊጠይቁን መጡ፤ ድጋፍና ማበረታቻም ሰጡን። በብርበራው ወቅት የኤሌክትሮኒክ መሣሪያዎቻችን በሙሉ ተወስደውብን ስለነበር መጽሐፍ ቅዱስ እንኳ ማንበብ አልቻልንም ነበር። ወንድሞች ግን የራሳቸውን የኤሌክትሮኒክ መሣሪያዎች ይዘውልን መጡ፤ ይህ በመሆኑም አንድም ቀን መንፈሳዊ ምግብ አልቀረብንም።

እንድትጸና እየረዳህ ያለው ምንድን ነው?

የፍርድ ቤቱ ውሳኔ ምንም ይሁን ምን በይሖዋ ዓይን አሸናፊዎች እንደሆንን ለማስታወስ እሞክራለሁ። ጎበዝ ጠበቃ አይደለም የሚያስፈልገን፤ ከዚህ ይልቅ ከአምላክ ጋር ጠንካራ ዝምድና መመሥረት ነው የሚያስፈልገን። የሠራነው አንዳች ወንጀል የለም። የምንኖረው በዓይነቱ ለየት ባለ ዘመን ነው። ከዚህ ጋር በተያያዘ የራሳችንን ድርሻ ማበርከት መቻል በራሱ ትልቅ መብት ነው! . . . የአምላክ ሉዓላዊነት እንዲረጋገጥ [አስተዋጽኦ ማበርከት] ግባችን ነው። ችሎት ፊት የምንቀርበው ንጽሕናችንን ለማረጋገጥ አይደለም። ፍርድ ቤት የምንሄደው ለይሖዋ ስም ጥብቅና ለመቆም ነው።

እንደ ሰርጌ የይሖዋን ስም የሚያወድሱ ሁሉ እሱ ‘የሕዝቡን ብርታት ከፍ እንደሚያደርግ’ እርግጠኞች ናቸው።—መዝሙር 148:13, 14