ጥቅምት 5, 2021
ሩሲያ

ወቅታዊ መረጃ | ወንድም ቪታሊ ኦሜልቼንኮ ያገኘው ማበረታቻ ስደትን ለመቋቋም ረድቶታል

አጫውት

መስከረም 22, 2022 በሙርማንስክ ክልል የሚገኘው የኦክትያቢርስኪ የአውራጃ ፍርድ ቤት ወንድም ቪታሊ ኦሜልቼንኮን ጥፋተኛ ነው የሚል ብይን አስተላልፏል። የ580,000 ሩብል (9,526 የአሜሪካ ዶላር) ቅጣት ተበይኖበታል።

የክሱ ሂደት

ጥር 29, 2021

የቪታሊ ክስ ወደ ፍርድ ቤት ተመራ
ጥር 20, 2020

ሕግ አስከባሪ አካላት ለምርመራ በቁጥጥር ሥር አዋሉት። ለሁለት ቀን ጣቢያ ከቆየ በኋላ ተለቀቀ። በክሱ ውስጥ ከተካተቱ ሰዎች ጋር እንዳይነጋገርና ኢንተርኔት እንዳይጠቀም ታገደ
ታኅሣሥ 23, 2019

በሙርማንስክ ክልል የሚገኘው የሩሲያ ፌዴሬሽን የምርመራ ኮሚቴ በቪታሊ ላይ የወንጀል ክስ መሠረተ። የተከሰሰው በቤቱ ሆኖ በይሖዋ ምሥክሮች ሃይማኖታዊ እንቅስቃሴዎች በመካፈሉ ምክንያት ነው

አጭር መግለጫ

ቪታሊ ኦሜልቼንኮ

የትውልድ ዘመን፦ 1979 (ሮስልያኮቮ፣ ሙርማንስክ ክልል)

ግለ ታሪክ፦ ዳንስ፣ የበረዶ ላይ ጨዋታዎች እንዲሁም መዘመር ይወዳል። ለሁለት ዓመት በጦር ሠራዊት ውስጥ አገልግሏል

በ2000 ከይሖዋ ምሥክሮች ጋር መጽሐፍ ቅዱስን ማጥናት ጀመረ። በ2001 ተጠመቀ። በ2013 ከናታልያ ጋር ትዳር መሠረተ። ናታልያ ከአንድ ዓመት በኋላ በጠና የታመመች ሲሆን አሁን የአካል ጉዳተኛ ሆናለች

የሰጠው ሐሳብ

የደረሰብህን ፈተና ለመቋቋም የሚረዳ ሐሳብ በመናገር ያበረታታህ ሰው አለ?

እንደ አባቴ የምቆጥረው አንድ ወንድም ማረፊያ ቤት ሆኖ ደብዳቤ ልኮልኝ ነበር። ደብዳቤው እንዲህ ይላል፦ “ደፋር፣ ቆራጥ፣ ብርቱና ታማኝ መሆን እንዲሁም ሙሉ በሙሉ በአምላክ መታመንና ለጥርጣሬ ቦታ አለመስጠት አስፈላጊ እንደሆነ ከዚህ በፊት ተነጋግረን ነበር። አሁን እነዚህን ነገሮች በሥራ ላይ ማዋል የምንችልበት አጋጣሚ አግኝተናል።”

ስለ አንተ ውሸት ሲነገር ሁኔታውን በጽናት ለመቋቋም የረዳህ ምንድን ነው?

ማቴዎስ 5:11 ሰዎች ‘ክፉውን ሁሉ በውሸት እንደሚያስወሩብን’ ይናገራል። ይህን ማስታወሴ በፍርድ ቤት ውስጥ ስለ እኔ ውሸት ሲነገር ሁኔታውን በጽናት ለመቋቋም ረድቶኛል። ሰዎች ከይሖዋ ጋር ሲነጻጸሩ ኢምንት መሆናቸውን ለማስታወስ እሞክር ነበር።

ሌሎች ወደፊት ሊያጋጥሟቸው ለሚችሉት ፈተናዎች ለመዘጋጀት ከአሁኑ ምን እንዲያደርጉ ትመክራለህ?

ይሖዋ ድፍረት ለማሳየትና በትናንሽ ነገሮችም ጭምር በእሱ ለመታመን እንዲረዳችሁ ጸልዩ። በጉባኤ ስብሰባዎች ላይ አዘውትራችሁ ተገኙ፤ እንዲሁም ተሳትፎ አድርጉ። ከእምነት ባልንጀሮቻችሁ ጋር አብራችሁ አገልግሉ። እንዲህ ካደረግን ስደት በሚደርስብን ጊዜም ወንድሞቻችንና እህቶቻችን አብረውን እንዳሉ ሆኖ ይሰማናል።

ቪታሊ ከቅዱሳን መጻሕፍት ትምህርትና መጽናኛ ማግኘቱን ቀጥሏል፤ እኛም እሱ የተወው ምሳሌ ያበረታታናል።—ሮም 15:4