ጥር 7, 2022
ሩሲያ

ወቅታዊ መረጃ | ወንድም ቭላዲሚር ቼስኖኮቭ፣ ወንድም ቭላዲሚር ዱትኪን እና ወንድም ቫለሪ ያኮቭሌቭ በእምነታቸው ምክንያት ፍርድ ቤት ቀረቡ

አጫውት

ሚያዝያ 13, 2022 የቹቫሽ ሪፑብሊክ ጠቅላይ ፍርድ ቤት ወንድም ቭላዲሚር ቼስኖኮቭ፣ ወንድም ቭላዲሚር ዱትኪን እና ወንድም ቫለሪ ያኮቭሌቭ ያቀረቡትን ይግባኝ ውድቅ አደረገ። በመሆኑም የተጣለባቸው ቅጣት ተፈጻሚ ይሆናል።

የካቲት 10, 2022 በቼቦክሳሪ የሚገኘው የካሊኒንስኪ አውራጃ ፍርድ ቤት በወንድም ቭላዲሚር ቼስኖኮቭ፣ በወንድም ቭላዲሚር ዱትኪን እና በወንድም ቫለሪ ያኮቭሌቭ ላይ ፍርድ አስተላልፏል። ወንድም ቭላዲሚር ዱትኪን 500,000 ሩብል (6,715 የአሜሪካ ዶላር)፣ ወንድም ቭላዲሚር ቼስኖኮቭ እና ወንድም ቫለሪ ያኮቭሌቭ ደግሞ እያንዳንዳቸው 400,000 ሩብል (5,372 የአሜሪካ ዶላር) መቀጮ እንዲከፍሉ በይኗል። ወንድሞች እስር ቤት አይገቡም።

የክሱ ሂደት

ሰኔ 7, 2021

ቭላዲሚር ቼስኖኮቭ እና ቫለሪ ያኮቭሌቭ በወንጀል ክሱ ውስጥ ተካተቱ
ታኅሣሥ 30, 2020

ቭላዲሚር ዱትኪን ክስ ተመሥርቶበት የጉዞ እገዳ ተጣለበት
ኅዳር 25, 2020

ቭላዲሚር ዱትኪን ቤቱ ከተበረበረ በኋላ የወንጀል ክስ ተከፈተበት። ለምርመራ ወደ ጣቢያ ተወሰደ

አጭር መግለጫ

ቭላዲሚር ቼስኖኮቭ

የትውልድ ዘመን፦ 1959 (ባክሙቶቮ፣ ቹቫሽ ሪፑብሊክ)

ግለ ታሪክ፦ ከውትድርና ማሠልጠኛ ሌተናል ሆኖ ተመረቀ። እሱና ባለቤቱ ኒና ሦስት ወንዶች ልጆችን አሳድገዋል

በጦር ሠራዊት ውስጥ በነበረበት ወቅት፣ ሰዎች “ሰይፋቸውን ማረሻ፣ጦራቸውንም ማጭድ ለማድረግ” እንደሚቀጠቅጡ ስለሚናገረው የመጽሐፍ ቅዱስ ተስፋ ተማረ። (ኢሳይያስ 2:4) ከጦር ሠራዊት ጡረታ ከወጣ በኋላ በ1993 ተጠመቀ

የሰጠው ሐሳብ

ወንድሞች በግለሰብ ደረጃ ምን ዓይነት እርዳታ አድርገውልሃል?

ወንድሞችና እህቶች በእጅጉ እየረዱን ነው። . . . የባንክ ካርዳችን ከታገደ ገንዘብ ሊያስፈልገን ስለሚችል ምን ዓይነት እርዳታ እንደሚያስፈልገን ቅድሚያውን ወስደው ጠይቀውን ነበር። ይህም በባለቤቴ ላይ በጎ ተጽዕኖ አሳድሯል፤ ባለቤቴ እምነቴን አትጋራም። አሁን ባለቤቴ የመጽሐፍ ቅዱስን እውነቶች ተግባራዊ ማድረግ ያለውን ጥቅም እየተገነዘበች ነው። ለእውነት አዎንታዊ አመለካከት ማዳበር ጀምራለች፤ ይሖዋን እንዳላመልክ እንደ በፊቱ አትቃወመኝም።

ቭላዲሚር ዱትኪን

የትውልድ ዘመን፦ 1963 (ኖቮአልታይስክ፣ አልታይ ክልል)

ግለ ታሪክ፦ በልጅነቱ መረብ ኳስን፣ እግር ኳስን እና ሆኪን ጨምሮ የተለያዩ ስፖርቶችን ይጫወት ነበር። የኢንሹራንስ ወኪል ሆኖ ይሠራል

የመጽሐፍ ቅዱስን ትንቢቶች ማጥናቱ ትንቢቶቹ እንዲፈጸሙ ያደረገው ይሖዋ አምላክ እንደሆነ አሳምኖታል። በ2002 ተጠመቀ

የሰጠው ሐሳብ

በዚህ አስቸጋሪ ጊዜ ብርታት የሚሰጥህ ምንድን ነው?

ቤቴ ከተፈተሸ በኋላ ይሖዋ ደስታና ጥበብ እንዲሰጠኝ ጸለይኩ። በዚህ ሁሉ መከራ ወቅት መልካም ምግባሬ የይሖዋን ስም የሚያስቀድሰው እንዴት እንደሆነ አስብ ነበር። . . . ይህን ማሰቤ ብርታት ይሰጠኛል።

ያገኘኋቸውን በረከቶች ለወንድሞቼና ለእህቶቼ መናገርም [ያስደስተኛል]። እምነታቸውን እንደሚያጠናክረው ይሰማኛል። . . . ብዙዎቹ የእኔን ምሳሌ ካዩ በኋላ ፍርሃታቸው እንደቀነሰ ሲናገሩ ስሰማ በጣም ደስ ይለኛል።

ቫለሪ ያኮቭሌቭ

የትውልድ ዘመን፦ 1968 (ቩርማንካስ ያድሪኖ፣ ቹቫሽ ሪፑብሊክ)

ግለ ታሪክ፦ የቧንቧ ሠራተኛ ነው። በ1989 ከናዴዥዳ ጋር ትዳር መሠረተ። ሁለት ወንዶች ልጆችና አንዲት ሴት ልጅ አላቸው

በመጽሐፍ ቅዱስ ውስጥ ስለሚገኘው የትንሣኤ ተስፋ መማሩ አጽናንቶታል። በ1996 ተጠመቀ

የሰጠው ሐሳብ

በዚህ አስቸጋሪ ወቅት በምን ላይ ትኩረት ታደርጋለህ?

ይሖዋ በሰጠኝ በረከቶች እና በአገልግሎት ላይ አተኩራለሁ። ከይሖዋ ጋር ያለኝን ዝምድና ለማጠናከር ጥረት አደርጋለሁ፤ እንዲሁም ምንጊዜም ስላለሁበት ሁኔታ አዎንታዊ አመለካከት ለመያዝ እሞክራለሁ።

ወንድሞቻችንና እህቶቻችን በመንፈስ መሪነት የተጻፈውን የአምላክን ቃል ማንበባቸውና ማሰላሰላቸው በየዕለቱ የሚያጋጥሟቸውን ተፈታታኝ ሁኔታዎች ለመወጣትና ይሖዋ “በመዓት ቀን በመጠለያው” እንደሚሸሽጋቸው ለማስተዋል ረድቷቸዋል።—መዝሙር 27:5

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች