መስከረም 21, 2022 | የታደሰው፦ ጥር 19, 2023
ሩሲያ

ወቅታዊ መረጃ—ወንድም ተፈረደበት | “ሁሉንም ነገር አብረን እንወጣዋለን”

አጫውት

ጥር 17, 2023 በኒዥኒ ኖቭጎሮድ የሚገኘው የአቭታዛቮትስኪ አውራጃ ፍርድ ቤት፣ ወንድም ጊዬቮርግ ጊዬቮርክያን ጥፋተኛ ነው በማለት የስድስት ዓመት የገደብ እስራት በይኖበታል። እርግጥ አሁን ወህኒ አይወርድም።

የክሱ ሂደት

ሐምሌ 17, 2019

ፖሊሶች ቤቱን ፈተሹ። የኤሌክትሮኒክ መሣሪያዎቹንና ሰነዶቹን ወሰዱበት
ሐምሌ 18, 2019

በሥራ ቦታው በቁጥጥር ሥር ውሎ ለምርመራ ተወሰደ። ለአሥር ሰዓት ያህል እዚያው እንዲቆይ ተደረገ
ነሐሴ 26, 2021

የጉዞ እገዳ ተጣለበት
ኅዳር 24, 2021

የይሖዋ ምሥክሮችን ስብሰባ መርተሃል በሚል ክስ ተመሠረተበት
ጥር 26, 2022

ጉዳዩ ወደ አቃቤ ሕጉ ተመለሰ

አጭር መግለጫ

ጊዬቮርግ ጊዬቮርክያን

የትውልድ ዘመን፦ 1971 (ትክቫርቼሊ፣ አብካዢያ ሪፑብሊክ)

ግለ ታሪክ፦ የ15 ዓመት ልጅ እያለ ቤተሰቦቹ ወደ ተብሊሲ፣ ጆርጂያ ሄዱ። በኋላ ላይ በአካባቢው ጦርነት በመነሳቱ ወደ ሩሲያ ሸሹ። ፋብሪካ ውስጥ ፎርክሊፍት ላይ ይሠራ ነበር

ሕይወት—እንዴት ተገኘ? በዝግመተ ለውጥ ወይስ በፍጥረት? (በአማርኛ አይገኝም) የተባለው መጽሐፍ ከሕይወት አመጣጥ ጋር የተያያዙ ጥያቄዎችን እንዲመረምር አነሳሳው። መጽሐፍ ቅዱስን አጥንቶ በ1996 ተጠመቀ። በዚያው ዓመት ከያና ጋር ትዳር መሠረተ

የሰጠው ሐሳብ

አንተም ሆንክ ቤተሰብህ ደስታችሁን እንዳታጡ የረዳችሁ ምንድን ነው?

እኔና ባለቤቴ አዎንታዊ አመለካከት ለመያዝ እንጥራለን፤ ሆኖም አንዳንድ ጊዜ ነገሮች ጭልምልም ይሉብኛል። ይህ በሚሆንበት ጊዜ አንዳችን ለሌላው ፍቅራችንን እንገልጻለን እንዲሁም እንበረታታለን

ይሖዋ ፍቅሩን ያሳየህ እንዴት ነው?

የእምነት ባልንጀሮቼ በተለይ ደግሞ ምርመራ እየተደረገባቸው ያሉ ወንድሞቼ ያሳዩኝ ፍቅርና ያደረጉልኝ እንክብካቤ በጣም ልቤን ነክቶታል። ለመጀመሪያ ጊዜ ፍርድ ቤት ስቀርብ ከጉባኤያችን ወንድሞችና እህቶች በተጨማሪ የማላውቃቸው የእምነት ባልንጀሮቼም ተገኝተው ነበር። ፈገግታቸውና የተናገሯቸው የሚያበረታቱ ቃላት አጠናክረውኛል። ይሖዋ በእነሱ ተጠቅሞ ‘ሁሉንም ነገር አብረን እንወጣዋለን’ ያለኝ ያህል ነው።

የጊዬቮርግ ምሳሌ እንደሚያሳየው “በመላው የወንድማማች ማኅበር ውስጥ ያሉት [ወንድሞቻችን] ተመሳሳይ መከራ እየደረሰባቸው እንዳለ” ማስታወሳችን ሁላችንም ሰይጣንን እንድንቃወምና ‘በእምነት ጸንተን እንድንቆም’ ይረዳናል።—1 ጴጥሮስ 5:9