የካቲት 16, 2022 | የታደሰው፦ ግንቦት 10, 2023
ሩሲያ

ወቅታዊ መረጃ—ወንድም ተፈረደበት | ወንድም ኢቫን ሹልዩክ በትዕግሥት ስደትን ተቋቁሟል

አጫውት

ግንቦት 10, 2023 በክራስናያርስክ ክልል የሚገኘው የናዛሮቭስኪ ከተማ ፍርድ ቤት፣ ወንድም ኢቫን ሹልዩክ ጥፋተኛ ነው የሚል ብይን አስተላልፏል፤ የሰባት ዓመት የገደብ እስራትም ፈርዶበታል። በአሁኑ ወቅት ወህኒ አይወርድም።

የክሱ ሂደት

ሰኔ 18, 2020

የታጠቁ ፖሊሶች የእነ ኢቫን ሹልዩክን ቤት ከበረበሩ በኋላ ኢቫንን በቁጥጥር ሥር አዋሉት። ከዚያም ጊዜያዊ ማረፊያ ቤት ውስጥ አቆዩት
ሰኔ 19, 2020

ፍርድ ቤቱ ኢቫን ወደ ማረፊያ ቤት እንዲዛወር አዘዘ
ሐምሌ 9, 2020

ከማረፊያ ቤት ተለቀቀ። ከቤቱ ውጪ ያለፈቃድ ማንንም እንዳያነጋግር ተከለከለ። ከጠዋቱ 12:00 እስከ ምሽቱ 5:00 ባለው ጊዜ ከቤት እንዳይወጣ ታገደ፤ በመሆኑም ሥራ መሥራት አልቻለም
ነሐሴ 14, 2020

መርማሪው በኢቫን ላይ የተጣሉት እገዳዎች እንዲራዘሙ ፈልጎ ነበር፤ ሆኖም ኢቫን ጥሩ ስም ስለነበረው ጥያቄው ተቀባይነት አላገኘም። አብዛኞቹ እገዳዎች ተነሱለት
ነሐሴ 17, 2020

የጉዞ እገዳ ተጣለበት
መስከረም 15, 2021

የፍርድ ሂደቱ ጀመረ

አጭር መግለጫ

ኢቫን ሹልዩክ

የትውልድ ዘመን፦ 1976 (ናዛሮቮ)

ግለ ታሪክ፦ በ14 ዓመቱ ወላጆቹን አጣ። ሁለት ታላላቅ ወንድሞች አሉት። አያቱ የሞተው በእምነቱ ምክንያት ታስሮ በነበረበት ወቅት ነው። ሴት አያቱ ወደ ሳይቤሪያ በግዞት ተወስዳለች።

ሙያው የቧንቧ ሥራ ነው። ወጣ ብሎ ተፈጥሮን ማድነቅ፣ ጫካ ውስጥ እንጉዳይ መሰብሰብና ዓሣ ማጥመድ ይወዳል

በ1994 ተጠምቆ የይሖዋ ምሥክር ሆነ። በ2002 ከዩሊያ ጋር ትዳር መሠረተ

የሰጠው ሐሳብ

ይህን ከባድ ጊዜ በትዕግሥትና በጽናት ማሳለፍ የቻልከው እንዴት ነው?

[መጀመሪያ ላይ] ስለ ባለቤቴ፣ ስለ ጉባኤውና ቤታቸው ስለተፈተሸባቸው ሌሎች ወንድሞችና እህቶች እያሰብኩ እጨነቅ ነበር። ‘ምን ይሆኑ ይሆን?’ የሚለው ጉዳይ ያሳስበኝ ነበር። ማረፊያ ቤት ውስጥ ባሳለፍኳቸው የመጀመሪያዎቹ ጥቂት ቀናት ‘በሕልሜ ነው በውኔ’ እያልኩ አስብ ነበር።

ውሎ አድሮ ግን በጎ በጎውን ማሰብ እንዳለብኝ ተገነዘብኩ። ፈተናዎችን ሁሉ የሚያመሳስላቸው አንድ ነገር አለ፦ ይዋል ይደር እንጂ ማብቂያ አላቸው።

ብርታት የሆነልህ የመጽሐፍ ቅዱስ ሐሳብ የትኛው ነው?

በ2 ነገሥት 6:16 ላይ የሚገኘውን ኤልሳዕ የተናገረውን ሐሳብ እወደዋለሁ። በተለይ ማረፊያ ቤት በነበርኩበት ወቅት ብቻዬን እንደሆንኩና ሁሉ ሰው እንደተነሳብኝ ተሰምቶኝ ነበር። ይህ ጥቅስ ግን ‘ከእነሱ ጋር ካሉት ከእኔ ጋር ያሉት እንደሚበልጡ’ ያስታውሰኛል፤ ይህን ሳስብ በጣም እረጋጋለሁ።

“ይሖዋ፣ ለአምላክ ያደሩ ሰዎችን ከፈተና እንዴት እንደሚያድን . . . ያውቃል”፤ ይህን በማወቃችን ምንኛ አመስጋኞች ነን!—2 ጴጥሮስ 2:9