ግንቦት 2, 2023 | የታደሰው፦ ሐምሌ 3, 2023
ሩሲያ

ወቅታዊ መረጃ—ወንድም ተፈረደበት | የእምነት ምሳሌዎች አበረታተውታል

አጫውት

ሰኔ 30, 2023 በኖቮሲቢርስክ የሚገኘው የሌኒንስኪ አውራጃ ፍርድ ቤት፣ ወንድም ዲሚትሪ ዶልዢኮቭ ጥፋተኛ ነው የሚል ብይን በማስተላለፍ የሦስት ዓመት እስራት ፈርዶበታል። ዳኛው፣ ፍርዱ እስራት መሆኑ ቀርቶ በጉልበት ሥራ ካምፕ ሦስት ዓመት እንዲሠራ በይኗል። በአሁኑ ወቅት ወህኒ አይወርድም። በጉልበት ሥራ ካምፕ በሚሠራበት ወቅት ከደሞዙ 10 በመቶው ለመንግሥት ገቢ ይደረጋል። ከከተማው መውጣትም አይችልም።

አጭር መግለጫ

ዲሚትሪ ዶልዢኮቭ

የትውልድ ዘመን፦ 1978 (ካሚሽዬቭካ፣ ሮስቶቭ ክልል)

ግለ ታሪክ፦ በፋብሪካ ውስጥና ግንባታ ላይ ሠርቷል

ከይሖዋ ምሥክሮች ጋር የተገናኘው እናቱ መጽሐፍ ቅዱስን ማጥናት ስትጀምር ነው። በይሖዋ ምሥክሮች ትልቅ ስብሰባ ላይ ሲገኝ ፍቅራቸውና አንድነታቸው አስገረመው። በ1997 ተጠመቀ

በ2008 ከማሪና ጋር ትዳር መሠረተ

የሰጠው ሐሳብ

ለስደት ለመዘጋጀት ምን አድርገሃል?

በ2017 ወንድም ዴኒስ ክሪስተንሰን በቁጥጥር ሥር ሲውልና በኋላም እስራት ሲፈረድበት፣ እኔም ከመያዜ በፊት እምነቴን ማጠናከር ስለምችልበት መንገድ አሰብኩ። በመዝሙር 26:2 ላይ ያለው ዓይነት ጸሎት አቀረብኩ፤ ዳዊት፣ ይሖዋ እንዲመረምረው እንዲሁም ሐሳቡንና ልቡን እንዲያጠራለት ልመና አቅርቧል። እኔም ድክመቶቼን ለይቼ ለማወቅ እንዲረዳኝ ወደ ይሖዋ መጸለይ ጀመርኩ። እንደ አዋጅ ነጋሪዎች (በአማርኛ አይገኝም) እና ኢየሱስ—መንገድ፣ እውነት፣ ሕይወት ያሉትን መጻሕፍት ደግሜ አነበብኳቸው። በተጨማሪም ይሖዋ፣ ፈተና ያጋጠማቸው አገልጋዮቹን እንደሚረዳቸው የገባውን ቃል የያዙ የመጽሐፍ ቅዱስ ጥቅሶችን በቃሌ አጠናኋቸው።

ለመጽናት የረዳህ የትኛው የመጽሐፍ ቅዱስ ታሪክ ነው?

የኤልያስ ምሳሌ አበረታቶኛል። ከክፉዋ ንግሥት ኤልዛቤል በሸሸበት ወቅት የይሖዋ እርዳታ አስፈልጎት ነበር። ይሖዋ በዚህ ወቅት ለኤልያስ ታላቅ ኃይሉን በማሳየት ብቻ አልተወሰነም፤ አጽናንቶታል፣ እንዲሁም ብቻውን እንዳልሆነ በመግለጽ አረጋግቶታል። ይሖዋ ከእኔ ጋር እንደሆነና በሚያስፈልገኝ ወቅት እንደሚደርስልኝ ማወቄ ፍርሃቴን እንዳሸንፍ ረድቶኛል።

ይሖዋ፣ የዲሚትሪንም ሆነ የሁሉንም አገልጋዮቹን እምነትና ጽናት እንደሚያስተውል ብሎም እንደሚያበረታታቸው እርግጠኞች ነን።—ራእይ 2:19

የክሱ ሂደት

ግንቦት 13, 2022

የክስ ፋይል ተከፈተበት
መስከረም 8, 2022

መኖሪያ ቤቱ ተፈተሸ። ጣቢያ እንዲያድር ተደረገ
መስከረም 9, 2022

ምርመራ ተደረገበት፤ ከዚያም ከቼልያቢንስክ 1,500 ኪሎ ሜትር በላይ ርቆ በኖቮሲቢርስክ ወደሚገኝ ማረፊያ ቤት በአውሮፕላን ተወሰደ
ኅዳር 11, 2022

ክሱ በፍርድ ቤት መታየት ጀመረ
ኅዳር 24, 2022

ከማረፊያ ቤት ተለቅቆ የቁም እስረኛ ተደረገ

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች