መጋቢት 22, 2023 | የታደሰው፦ ሚያዝያ 28, 2023
ሩሲያ

ወቅታዊ መረጃ—ወንድም ተፈረደበት | “ይሖዋ የሚጠብቅብኝን ማንኛውንም ነገር ለማድረግ ቆርጫለሁ”

አጫውት

ሚያዝያ 28, 2023 በቼልያቢንስክ ክልል የሚገኘው የአሻ ከተማ ፍርድ ቤት፣ ወንድም ቫዲም ፍዮዶሮቭ ጥፋተኛ ነው የሚል ብይን አስተላልፏል፤ የስድስት ዓመት የገደብ እስራትም ፈርዶበታል። በአሁኑ ወቅት ወህኒ አይወርድም።

አጭር መግለጫ

ቫዲም ፍዮዶሮቭ

የትውልድ ዘመን፦ 1968 (ሩድኒ፣ ካዛክስታን)

ግለ ታሪክ፦ የሚሠራው የዕቃ መጋዘን ውስጥ ነው

በ1991 ልዩቦቭን አገባ። አምስት ልጆች አሏቸው

በመጽሐፍ ቅዱስ ውስጥ የሚገኘው የዘላለም ሕይወት ተስፋ ማረከው። በ1993 እሱና ባለቤቱ ተጠምቀው የይሖዋ ምሥክሮች ሆኑ

የሰጠው ሐሳብ

ስደት እየደረሰባቸው ያሉ ወንድሞችና እህቶች ምሳሌነት ያበረታታህ እንዴት ነው?

በእምነታቸው ምክንያት በቅርብ ጊዜ ውስጥ ፍርድ ቤት ከቀረቡ የተለያዩ ወንድሞችና እህቶች ጋር የማውራት አጋጣሚ ነበረኝ። በተለይ ከወንድም ኒኮላይ ኩዚችኪን ጋር ያደረግሁት ውይይት በጣም አበረታትቶኛል። ማረፊያ ቤት እያለ ከባድ የጤና እክሎች አጋጥመውት ነበር። ዕድሜውና የጤንነቱ ሁኔታ ቢጫጫነውም የሚናገርበት መንገድ እንዲሁም ረጃጅም የመጽሐፍ ቅዱስ ጥቅሶችን በቃሉ ማስታወስ መቻሉ በጣም አስገረመኝ። የአምላክን ቃል ምን ያህል እንደሚወድ እንዲሁም ከይሖዋ ጋር ጠንካራ ወዳጅነት እንዳለው ምንም አያሻማም። ዕድሜም ሆነ የጤና እክል ወይም እስራት ከይሖዋ ጋር የጠበቀ ወዳጅነት እንዳንመሠርት ሊያግዱን እንደማይችሉ ከዚህ ተገንዝቤያለሁ። ከኒኮላይ ጋር ያደረግሁት ውይይት ያስገነዘበኝ ሌላው ነገር፣ ከሰብዓዊ ኃይል በላይ የሆነውን ኃይል ሊሰጠን የሚችለው ይሖዋ ብቻ እንደሆነ ነው።

እነዚህ ተፈታታኝ ሁኔታዎች የትኞቹን ባሕርያት እንድታዳብር ረድተውሃል?

በተፈጥሮዬ ችኩል ነኝ። አንዳንድ ጊዜ የማደርጋቸው ውሳኔዎች ስሜታዊነት የተንጸባረቀባቸው ናቸው። አሁን ያጋጠመኝ ሁኔታ ትዕግሥት ማዳበርን እያስተማረኝ ነው፤ በተለይም ይሖዋን መጠበቅና ሕይወቴን እሱ እንዲመራው መፍቀድ በሚኖርብኝ ጊዜ። ይሖዋ የሚጠብቅብኝን ማንኛውንም ነገር ለማድረግ ቆርጫለሁ።

እንደ ቫዲም ሁሉ እኛም፣ ይሖዋ እሱን ተስፋ የሚያደርጉትንና ‘መንገዱን የሚከተሉትን’ እንደሚባርካቸውና እንደሚያበረታቸው እንተማመናለን።—መዝሙር 37:34

የክሱ ሂደት

ሰኔ 11, 2021

የደህንነት ኃይሎች የቫዲምን እና የልጁን የአንድሬን ቤት በረበሩ
ሚያዝያ 29, 2022

ቫዲም የወንጀል ክስ ተመሠረተበት
ታኅሣሥ 1, 2022

ክሱ በፍርድ ቤት መታየት ጀመረ

በተጨማሪም ይህን ተመልከት

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች